Sekuestrimi i fonisë së takimeve të opozitës, PD paralajmëron padi për shefin e Komisariatit Nr.1 dhe ministrin e Brendshëm

Koordinatori rajonal i PD për Tiranën, Klevis Balliu njoftoi në një deklaratë nga selia blu se do të padisë shefin e Komisariatit NR. 1, Robert Losha dhe ministrin e Brendshëm, Ervin Hoxha.

Padia nga PD vjen pasi Losha ka sekuestruar bazën materiale, foninë e takimeve të Berishës dhe opozitës.

Balliu deklaroi se ndaj Loshës dhe Hoxhës do të ketë një padi sipas ligjit, për shkelje të ligjit dhe mohim të së drejtës për tubim dhe protestë.

PD ka dënuar sekuestron e policisë dhe ka bërë thirrje të mos e provokojnë opozitën.

DEKLARATA:

Kushtetuta dhe ligji nuk lënë vend për interpretime sa i takon të drejtës së protestës dhe tubimit. Protesta është e drejtë universale që parashikohet dhe mbrohet me konventa dhe ligje kombëtare e ndërkombëtare. Ligji parashikon qartë se Policia njoftohet për tubimin, vendin, orën dhe qëllimin e saj. Ajo nuk jep leje, por vetëm monitoron dhe siguron rendin.

Për terroristët e kuq ligji, Kushtetuta dhe konventat nuk kanë rëndësi. Ata nuk janë policë të ligjit, por të urdhrit.

Pasi përndoqën opozitën dhe dështuan me turp, tani kanë vendosur të bllokojnë bazën materiale të Partisë Demokratike. Dje policët dhe shefi i Komisariatit 1, Robert Losha, kanë marrë urdhër nga ai që urdhërohet nga bandat, narkoministri Hoxha, që të sekuestrojnë bazën materiale të Partisë Demokratike, e cila përdoret në protestat apo takime të kryetarit të opozitës.

Narkopolicët që i tremb hija e narkobanditëve, kanë filluar operacione publicitare për të ndaluar foninë, mikrofonat, pultin e regjisë të takimeve të Sali Berishës dhe opozitës.

Deri këtu e ka poshtëruar veten policia e të birit të Kristaqit dhe nipit të Enverit.

Partia Demokratike e dënon me forcë dhe e neverit këtë polici ‘që fut duart’ në rraqet e opozitës pasi i ka ngritur duart përballë krimit.

Për shefin e komisariatit nr. 1 Rober Losha dhe për ministrin e Brendshëm, do të ketë padi penale për shkelje të ligjit dhe mohim të së drejtës për tubim dhe protestë.

Përdhunuesit serial të Kushtetutës, po nga Kushtetuta dhe ligji që shkelen do të dënohen. Në Librin e Zi të shkelësve të ligjit, emrat e tyre do të shënohen me të kuqe, në mënyrë që nesër të marrin përgjigjen, jo të hakmarrjes, por të rivendosjes së ligjit.

NarkoProdës i bëjmë thirrje të mos e provokojë opozitën dhe të mos e bëjë qesharake armën e Policisë.

Ky akt antiligjor që dhunon të drejtën e protestës dhe ligjin për tubimet, tregon qartë porosinë që ka marrë narkopolica në prag të zgjedhjeve të 11 majit. Çdo gjë kundër opozitës dhe Sali Berishës!

Edhe ne do t’u përgjigjemi me çdo gjë, me çdo mjet, me çdo mënyrë.