Shpëtim Idrizi: Marrëveshja me PD-në është çështje ditësh, preferoj të kandidoj në këto dy qarqe

Lulzim Basha me Shpëtim Idrizin

Kreu i PDIU-së, Shpëtim Idrizi deklaroi se marrëveshja me Partinë Demokratike është çështje ditësh, pasi diskutimet janë drejt konkretizimit.

Ai shton se marrëveshjet për krijimin e koalicionit me PD-në nuk ka të bëjë me sistemimin e kandidatëve për deputetë diku në një zonë por qëllimi është të krijohet një sinergji dhe një mirëbesim.

Sa i përket qarkut ku do të kandidojë në zgjedhjet e 25 prillit, Idrizi tha në "Report Tv" se preferon që të jetë pjesë e listave në Tiranës ose në Vlorë, ku beson se ka peshën më të madhe.

"Ky është një lajm i mirë që disa nga krerët e partive opozitare kanë arritur marrëveshje me PD ndërkohë që dhe PDIU është në fazë të përcaktimit dhe përmbylljes së kësaj marrëveshje. PDIU është bërë pjesë e opozitës së bashkuar në 2018.

Ne jemi në fazë negociatash për të bërë një listë të përbashkët të frontit opozitar drejt qëllimit të përbashkët, fitoren në 25 prill.  Është një marrëveshje dhe diskutim në kompleks. Nuk kemi hyrë me emra dhe zona të caktuara.

Nëse do kërkoja një preferencë personale, do ishte shumë mirë qarku i Vlorës dhe Tiranës por kjo do shihet në dinamikën e përbashkët. PDIU shton valencën për të prodhuar mandate shtesë. Ne kemi një marrëveshje me PD, por do të kemi parasysh edhe sensitivitetet, peshën, ruajtjen e kauzave",  tha Idrizi.

Deri më tani, kryedemokrati Lulzim Basha ka mbyllur marrëveshjen me 3 aleatë, Agron Dukën, Dashamir Shehin dhe Nard Ndokën.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm