"Shqipëria strehë e krimit të organizuar" Vokshi ngre alarmin në KiE: Europa në rrezik!

Deputetja demokrate Albana Vokshi ka ngritur alarmoin për situatën e rëndë në Shqipëri, duke e cilësuar vendin si strehë të krimit të organizuar dhe pastrimit të parave që rrezikon sigurinë në gjithë Europën.

Gjatë fjalës së saj në Asamblenë Parlamentare të Këshillit të Europës, Vokshi solli në vëmendje raportin e fundit të Departamentit Amerikan të Shtetit për klimën e biznesit në Shqipëri, ku theksohet korrupsioni sistemik, abuzimet me kontratat PPP, trafiku i drogës dhe një sistem gjyqësor i dobët, të cilat pengojnë investimet e huaja dhe krijojnë presion ndaj bizneseve.

Deputetja theksoi edhe ndërtimin masiv të kullave dhe resorteve luksoze në qytete si Tirana, Durrësi, Vlora, Saranda dhe Himara, ku mbi 40 mijë apartamente mbeten bosh dhe shërbejnë për pastrimin e parave të pista.

Vokshi paralajmëroi se pa ndërhyrje të menjëhershme, Shqipëria rrezikon trazira sociale, përplasje mes klaneve kriminale dhe eksport të pasigurisë drejt Europës.

Në fjalën e saj, ajo bëri thirrje për veprime të forta nga Këshilli i Europës, duke kërkuar që korrupsioni dhe pastrimi i parave të mos tolerohen dhe të mbrohet demokracia në Shqipëri.

Fjala e Albana Vokshit në Asamblenë Parlamentare të Këshillit të Evropës:

Do të flas mbi raportet ndërkombëtare në lidhje me situatën në Shqipëri:

Vetëm pak ditë më parë, Departamenti i Shtetit i SHBA publikoi raportin e vitit 2025 për klimën e biznesit në Shqipëri. Gjetjet e raportit janë alarmante: Shqipëria mbetet e goditur nga korrupsioni sistemik dhe nga një fluks i madh fondesh të paligjshme, kryesisht nga trafiku i drogës, që shtrembërojnë konkurrencën dhe pengojnë investimet e huaja. Korrupsioni në prokurime, përdorimi abuziv i kontratave PPP, pasiguria e të drejtave të pronësisë dhe një gjyqësor i dobët kanë krijuar një mjedis ku bizneset përballen me presione nga administrata publike por edhe nga grupet kriminale.

Nëse vizitoni Tiranën, apo Vlorën, apo Durrësin, Sarandën dhe Himarën, do të shihni resorte luksoze dhe kulla të larta në vend të lagjeve historike, teatrove dhe stadiumeve. Duken moderne, të këndshme, por mbi 40 mijë apartamente janë bosh. Çmimet nga 3 mijë, 5 mijë deri në 10 mijë euro për metër katror tregojnë të vërtetën: këto kulla nuk janë për shqiptarët, por janë mjete për pastrimin e parave të pista.

Titujt ndërkombëtarë e konfirmojnë këtë. Gazeta Caras y Caretas në Uruguaj raportoi së fundi për shkatërrimin e një klani të fuqishëm shqiptar që trafikonte kokainë nga Amerika e Jugut drejt Europës, duke pastruar miliarda përmes ndërtimit dhe madje duke ndikuar edhe në çmimet e drogës në tregun ndërkombëtar. Ajo që është shqetësuese është bashkëpunimi i qeverisë dhe institucioneve shtetërore me krimin e organizuar, duke e shndërruar problemin e Shqipërisë në një problem europian e më gjerë.

Europa nuk mund të përballojë që të ketë një strehë të sigurt për krimin e organizuar. Pa veprime vendimtare, Shqipëria rrezikon trazira sociale, përplasje të dhunshme mes klaneve, emigrim masiv dhe eksport të pasigurisë në gjithë Europën.

Prandaj, i bëj thirrje kësaj Asambleje të dërgojë një mesazh të qartë dhe të fortë: korrupsioni, pastrimi i parave, mbytja e medias dhe manipulimi zgjedhor nuk do të tolerohen.

Dhe ju nxis të përdorni çdo instrument të mundshëm për ta detyruar qeverinë shqiptare të luftojë krimin e organizuar dhe të mbrojë demokracinë.