SPAK kundër SPAK, Këlliçi: Prokurorë të kësaj strukture inkurajojnë leçjanin Karlo Bollino, të godasë kolegët e tyre

Belind Këllici, anëtari i Kryesisë së PD, deklaroi se përgjimet e publikuara së fundmi të Erion Veliajt në qeli, tregojnë se Carlo Bollino është i përfshirë në skemën mediatike të kryebashkiakut të Tiranës për të sulmuar prokurorët.

Këllici deklaron nga selia blu se ka denoncuar edhe më herët pagesat që media e Carlos ka marrë nga inceneratori i Tiranës për fushatën elektorale të vitit 2021.

Demokrati shton se prej më shumë se një viti i gjysmë Partia Demokratike ka depozituar 2 kallëzime penale në SPAK për aferat e Carlo Bollinos, të cilat sipas informacionit zyrtar janë bashkuar në një kallëzim të vetëm, ku është regjistruar vepra penale, por ende pa autor.

DEKLARATA:

Ditën e djeshme portali CNA.al dhe televizioni CNA ka nisur publikimin e komunikimeve të Erion Veliajt me familjarët e tij, nga ambjentet e burgut të Durrësit.

Nga këto përgjime kuptohet fare qartë se leçjani Carlo Bollino është pjesë thelbësore e skemës mediatike të kryebashkiakut në qeli, për të sulmuar prokurorët e SPAK, Ols Dado dhe Altin Dumani. Deri këtu asgjë e re nuk po ndodh, pasi për këtë strukturë kriminale që linçon këdo për ti shërbyer pushtetit, kemi vite që flasim dhe SPAK nuk ka reaguar, e sot kjo strukurë po sulmon vetë prokurorët e posaçëm dhe sistemin e ri të drejtësisë, të cilët deri dje i quante kolegë të nderuar, të disiplinuar dhe të mirëorganizuar.

Nga kjo foltore kam bërë publike disa herë lidhjet dhe përdorimin e medias së Carlo Bollinos me këtë strukturë kriminale.

Kam bërë publike email-et për pagesat që merrte media e Carlos nga Inceneratori inekzistent i Tiranës për fushatën elektorale të vitit 2021.

Kam bërë publike paratë që Carlo ka marrë nga buxheti i AKSHI-t për të ndërtuar godinën, nga ku sot shpif e linçon në mënyrë permanente opozitën, e tashmë edhe SPAK-un.

Kam bërë publike aferën 1 euro me firmën e Edi Ramës dhe Erion Veliajt, për ti dhënë Carlos 4120 m 2 truall publik, i cili ishte i destinuar për shkollë dhe përfundoi në një mejhane mediatike që shpif e baltos çdo ditë këdo që kritikon grupin e strukturuar kriminal të inceneratorit Tiranë apo 5D

Prej më shumë se një vitit e gjysëm Partia Demokratike e Shqipërisë, ka depozituar 2 kallëzime penale në SPAK për aferat e Carlo Bollinos, të cilat sipas informacionit zyrtar janë bashkuar në një kallëzim të vetëm, ku është regjistruar vepra penale, por ende pa autor.

Pavarësisht se autorin, nuk ka njeri me logjikë normale, që nuk e kupton se kush është.

Ajo ç’ka përbën sot interes madhor për opinionin publik është identiteti i prokurorit të posaçëm që po mban në sirtar këtë dosje kriminale, duke e NXITUR kështu Carlon të vazhdojë të shpifë e të baltosë çdo ditë jo vetëm opozitën, por tashmë siç e faktojnë dhe përgjimet, edhe vetë strukturën e posaçme.

Kush është ky prokuror që po i shërben verbërisht grupit të strukturuar kriminal 5D?

Përse SPAK i jep kohë banditëve të tillë mediatikë, duke fshehur faktet dhe provat e depozituara nga Partia Demokratike prej 18 muajsh?

Kush është zyrtari i lartë i Partisë Socialiste, ish ministër e sot kandidat për deputet, që fshihet jo vetëm pas këtij prokurori, por sipas gazetarëve dhe pas shantazhimit me nxjerrjen e dosjeve hetimore të prokurorëve që po hetojnë Erion Veliajn.

Këto janë pyetje të cilave duhet tu jepet përgjigje sot.

Kushdo që shkel ligjin, duhet të trajtohet i barabartë përpara Ligjit.

Pak rëndësi ka nëse quhet Carlo, Erion apo Edvin.