Tabaku: E majta në Shqipëri e ka treguar me fakte që është kundër integrimit

Deputetja e Partisë Demokratike Jorida Tabaku ka komentuar dhe deklarata e sotme të elementëve të qeverisë, që akuzonin opozitën se po hidhnin baltë ndaj Shqipërisë në Bruksel.

Tabaku tha në Syri TV se në Shqipëri e majta që është aktualisht në pushtet, e ka treguar me fakte se, është kundër integrimit të vendit drejt BE-së.

‘Nuk kam asnjë kompleks për ato që thotë e majta në Shqipëri.

E kanë treguar me fakte. Për NATO-n, kanë nisur shkresa, për liberalizimin e vizave ka nisur shkresa, për procesin e integrimit u bllokua dy vite me 3 ligjet dhe kur erdhën në pushtet në 2013, filluan dhe i ndërruan prap nga fillimi.

U ndryshua ligji i shërbimit civil.

Nuk kam asnjë kompleks nga ato, pasi politika nuk është ajo çfarë thua, por çfarë bën.

Mos harrojmë faktin që nuk është se ne e kemi gojë e mbyllur dhe do ti ngrejmë këto shqetësime për hir të qytetarëve dhe atyre që na kanë votuar.

Nuk e shoh veten në mënyrë absolute, as antishqiptare, as destruktive, përkundrazi e shoh veten që këto gjëra ndihmojnë Shqipërinë.

Tani nëse nuk flasim dhe ngrejmë këto shqetësime, për çfarë jemi aty.

Askush nga ne nuk është pjesë e një dekori. Ky proces do të jetë gjithë përfshirës ku secili do të ketë hapësirën e vet për të ngritur zërin.

Nëse ne ankohemi për çdo lloj kritike, ja mbyllim zërin medias, shoqërisë civile, opozitës, atëherë ku po shkojmë? Nuk na duhet fare Europa, shkojmë atje ku ishin 50 vite përpara dhe jemi në rregull’, tha Jorida Tabaku në SYRI TV.