Tabaku: Ekonomia po rëndon xhepin e familjeve shqiptare

Në raportin më të fundit, Fondi Monetar Ndërkombëtar ka vënë në dukje shqetësime të thella për ekonominë shqiptare, duke reflektuar problemet që çdo qytetar ndjen çdo ditë.

Çmimet e ushqimeve, energjisë dhe qirave po rriten me ritme të papërballueshme, ndërkohë që pagat dhe pensionet mbeten në vendnumëro.

Deputetja e Partisë Demokratike, Jorida Tabaku, ka reaguar ndaj këtij raporti me një postim në rrjetet sociale, duke theksuar se situata ekonomike në vend është pasojë e një sistemi të kapur, që i shërben vetëm një grushti njerëzish të pasur, ndërsa familjet shqiptare përballen me vështirësi të mëdha.

“ Çdo ditë shohim rritje çmimesh dhe shpenzimesh, ndërsa familjet e zakonshme e kanë gjithnjë e më të vështirë të përballojnë jetesën. Sistemi ekonomik është i padrejtë dhe i pabarabartë, duke favorizuar vetëm oligarkët dhe të privilegjuarit, ” tha Tabaku.

Ajo theksoi gjithashtu se mungesa e mundësive për të rinjtë është një tjetër tregues alarmant. “ Rinia jonë nuk sheh shpresë këtu dhe po largohet, sepse Shqipëria nuk po ofron as mundësi të ndershme, as të ardhme për ta. ”

Në reagimin e saj, deputetja Tabaku propozoi disa masa konkrete për të përmirësuar gjendjen ekonomike:

•             Taksa të ulëta dhe të drejta për bizneset e vogla dhe të mesme, të cilat janë shtylla kryesore e ekonomisë familjare shqiptare.

•             Rritje të pensioneve dhe mbështetje për familjet me të ardhura të ulëta, duke ndihmuar në përballimin e krizës së jetesës.

•             Reforma ekonomike gjithëpërfshirëse, që të garantojë një sistem të drejtë, ku përfitimet nuk i marrin vetëm të pasurit.

“ Shqipëria nuk mund të vazhdojë kështu! Ekonomia duhet të shërbejë për qytetarët dhe familjet shqiptare, jo për të pasuruar një grusht njerëzish, ” përfundoi Tabaku.

 

Raporti i FMN dhe reagimi i deputetes vijnë në një kohë kur shumë familje ndihen të lëna në harresë nga politikat aktuale, duke kërkuar zgjidhje të menjëhershme dhe të drejta për të përballuar sfidat ekonomike.