Tabaku: Integrimi në BE nuk është pronë e Qeverisë, por e shqiptarëve!

Kryetarja e Këshillit Kombëtar të Integrimit Europian (KKIE) dhe deputetja e Partisë Demokratike, Jorida Tabaku, ka shprehur shqetësimin e saj të madh për pengesat institucionale dhe politike që kanë bllokuar procesin e integrimit të Shqipërisë në Bashkimin Europian. Në një deklaratë gjatë mbledhjes së KKIE-së, Tabaku theksoi se për muaj të tërë ky këshill është penguar të ushtrojë funksionet e tij për shkak të lëvizjeve të mazhorancës për të krijuar komisione paralele, duke dobësuar kështu institucionet demokratike.

“Një demokraci europiane respekton institucionet e saj dhe nuk i dublon ato. Ata që e bëjnë këtë e kanë shumë të qartë situatën, por fatkeqësisht veprojnë me një arrogancë të jashtëzakonshme,” deklaroi, por fatkeqësisht veprojnë me një arrogancë të jashtëzakonshme,” deklaroi Tabaku.

Ajo shtoi se vendi ndodhet në një moment vendimtar për procesin e negociatave me BE-në, pasi po afrohen zgjedhjet dhe Shqipëria është në prag të hapjes së negociatave me katër grupkapituj. “Një proces që, në gjykimin tim dhe të forcës politike që unë përfaqësoj, duhej të kishte nisur që në vitin 2013. Por për shkak të vendimeve të qeverisë Rama, të udhëhequra nga interesa politike dhe jo kombëtare, ky proces është zvarritur dhe është penguar vit pas viti,” u shpreh ajo.

Integrimi nuk matet me propagandë, por me rezultate

Duke komentuar mbi progresin e integrimit, Tabaku theksoi se Shqipëria nuk duhet të mburret me hapjen e kapitujve, por duhet të fokusohet në mbylljen e tyre me sukses.

“Nuk matemi dot me sa kapituj kemi hapur, por me sa grupkapituj kemi mbyllur me sukses. Sot Shqipëria është në një moment kritik që duhet të provojë tre gjëra: A funksionojnë institucionet demokratike? A mund të mbajmë zgjedhje të lira dhe të ndershme? A mund të tregojmë se jemi të aftë të zbatojmë standardet europiane që aspirojmë?” pyeti ajo, duke ngritur shqetësime të drejtpërdrejta për mungesën e reformave kyçe që duhen për përparimin e negociatave.

Tabaku iu referua edhe raportit të OSBE/ODIHR, duke vënë në dukje dështimin e mazhorancës për të zbatuar një reformë të plotë zgjedhore: “Zgjedhjet e lira dhe të ndershme janë themeli i demokracisë. Sot ne kemi përpara një detyrë të qartë: ose do të ndërtojmë një proces zgjedhor që reflekton standardet europiane, ose do të vijojmë të justifikojmë dështimet me retorikë boshe.”

BE e sheh Ballkanin si çështje sigurie – qeveria shqiptare nuk ka një vizion

Një tjetër pikë e rëndësishme që ngriti deputetja demokrate ishte ndryshimi i qasjes së BE-së ndaj zgjerimit, ku Tabaku theksoi se zgjerimi i Ballkanit Perëndimor nuk është më një çështje teknike, por një çështje sigurie. “Sot, zgjerimi i BE-së nuk është më thjesht një çështje burokratike apo ekonomike. Ai është një çështje sigurie dhe stabiliteti. Shqipëria duhet të jetë e përgatitur për këtë realitet të ri dhe duhet të nisë një debat kombëtar mbi detyrimet që kemi ndaj këtij procesi. Por, fatkeqësisht, qeveria shqiptare nuk ka një plan të qartë dhe nuk ka një vizion strategjik për këtë moment historik,” tha ajo.

Tabaku bëri thirrje që të përfshihen më shumë aktorë në këtë proces, duke theksuar se vendimmarrja nuk mund të jetë e kufizuar vetëm brenda qeverisë:

“Integrimi nuk është pronë e qeverisë! Integrimi nuk mund të jetë një proces burokratik i mbyllur në një sirtar të ministrive! Ky është një proces kombëtar që duhet të përfshijë qytetarët, biznesin, shoqërinë civile dhe të gjithë faktorët e interesuar. Duhet të kemi një diskutim të hapur mbi detyrimet që na presin, mbi reformat që duhen bërë dhe mbi kostot që do të mbajë biznesi shqiptar.”

Ajo kritikoi mungesën e transparencës në qeverisje dhe faktin që mazhoranca nuk ka organizuar asnjë debat të gjerë për implikimet që ka integrimi europian për ekonominë dhe shoqërinë shqiptare.

Ligjet klienteliste, pengesë për integrimin

Në fjalën e saj, deputetja demokrate ngriti shqetësime të forta për disa ligje dhe praktika të qeverisë që janë në kundërshtim me standardet europiane, duke përmendur konkretisht ligjin për Agjencinë e Auditit, ligjin për Zonat e Mbrojtura, si dhe kontrata që shkelin Marrëveshjen e Stabilizim-Asociimit (MSA). “Ne nuk mund të pretendojmë se jemi të angazhuar për integrimin, ndërkohë që miratojmë ligje që bien ndesh me frymën dhe rregullat e BE-së. Ligje si ai për Agjencinë e Auditit, që u diskutua sot, apo paketat e klientelizmit si Paketa e Maleve, janë shembuj të qartë se qeveria po e çon Shqipërinë në drejtimin e gabuar. Ne nuk mund të vonojmë më reformat dhe zbatimin e detyrimeve tona europiane!” deklaroi ajo.

Duke mbyllur fjalën e saj, Tabaku dha një mesazh të qartë për qeverinë dhe për gjithë aktorët politikë dhe institucionalë në vend:

“Boll kohë ka humbur Shqipëria! Boll kohë kanë humbur shqiptarët! Momenti për të marrë përgjegjësi dhe për të vepruar është tani. Shqipëria nuk mund të vazhdojë të ecë me ritmin e propagandës qeveritare. Duhet punë, reforma dhe mbi të gjitha, vullnet politik për të çuar përpara procesin e integrimit europian.”