Tirana ndër qytetet më të ndotura në Europë, Muçollari: Ajri që thithin qytetarët nuk është prioritet për qeverinë

Anëtari i Kryesisë së PD, Grigels Muçollari ka folur për raportin e fundit të OKB i cili e rendit Shqipërinë, ndër vendet me ajrin më të ndotur.

Nga selia blu, Muçollari deklaroi se përqendrimi i grimcave të dëmshme në ajër për vendin tonë, është 3 herë më i lartë se norma që sugjeron OBSH. Sipas demokratit, shëndeti, cilësia e jetës dhe ajri që thithin qytetarët, nuk janë prioritet për qeverinë e për kryebashkiakun Erion Veliaj, të cilët fokusohen tek pasurimi i xhepave të tyre.

Muçollari theksoi se qeveria dhe politikat e saj të mjedisit janë shkaktare te ndotjes dhe që të pastrohet ajri dhe mjedisi, duhet pastruar vendi nga kjo qeveri.

Deklarata:

Një tjetër alarm për gjendjen katastrofale te ajrit në Tiranë dhe në Shqipëri, vjen nga matjet e sapopublikuara të Organizatës zvicerane IQAir. Ajo konstaton se në vendin tonë përqendrimi i grimcave të dëmshme në ajër, është 3 herë më i lartë se norma që sugjeron OBSH.

Me gjithë shqetësimet e ngritura në mënyrë të përsëritur, qeveria dhe autoritetet shqiptare nuk kanë bërë asgjë.

Rezultati është ky që shohim e thithim përditë në ajër dhe që nga viti në vit ka përkeqësim. E tregon dhe tabela.

Krejt ndryshe është, për shembull, Kroacia, ku sipas këtij raporti, niveli i ndotjes është reduktuar me 40 përqind.

PM2.5, siç emërtohet përqendrimi i këtyre grimcave, është përgjegjës për shume sëmundje, si astma, kanceri, goditjet në tru, prekjen e mushkërive dhe ndikon edhe në zhvillimin e fëmijëve.

Shëndeti, cilësia e jetës dhe ajri që thithin qytetarët, nuk janë prioritet për qeverinë e për kryebashkiakun.

Për ta, pasurimi, privilegjet, vrapi pas parave, propaganda, janë shqetësimi kryesor.

Kam një pyetje për këdo që na ndjek. A keni sot një të afërm që vuan nga alergjitë, nga prekja e mushkërive, nga tumoret, apo fëmijë që shfaqin probleme me zhvillimin?

Ajri i ndotur, që ndotet çdo vit e më shumë, është një nga shkaqet kryesore. Po çfarë po bëjnë autoritetet për këtë. Asgjë, përkundrazi po ndikojnë në përkeqësimin e situatës. Ju e shihni këtë te makineritë e rënda që janë shtuar, te betonieret, te ndërtimi në çdo skaj, te fabrikat qe nuk respektojnë standardet.

Duhet të kuptojmë se pse qeveritarët tanë nuk e kanë shqetësim ndotjen. Janë gjatë gjithë ditës ose në zyra luksoze, ose në makina po aq luksoze, ose në vilat e tyre milionëshe në periferi ose bregdet, ku ndotja është larg normave të kryeqytetit e të zonave me banim të dendur.

Shqipëria është sot vendi më i ndotur në Europë dhe këtë nuk e shpëlan dot asnjë propagandë, asnjë samit, asnjë pemë që mbillet për publicitet dhe asnjë pyll orbital që nuk ekziston.

Qeveria dhe politikat e saj të mjedisit janë shkaktare te ndotjes dhe askush tjetër. Që të pastrohet ajri dhe mjedisi, duhet pastruar vendi nga kjo qeveri.