Topalli thirrje diasporës: Dorëzoni fizikisht zarfin në zyrat e DHL

Drejtuesja politike e diasporës në Partinë Demokratike, Jozefina Topalli, deklaroi sot se kontributi i emigrantëve shqiptarë është vendimtar për zgjedhjet e 11 Majit.

Në një konferencë për shtyp, ajo theksoi se vota e diasporës është një akt ndërgjegjeje dhe drejtësie ndaj një regjimi që i ka dëbuar nga vendi.

Topalli i bëri thirrje shqiptarëve t'i dërgojnë fizikisht zarfat në zyrën e DHL.

"Diaspora po kontribuon në atë që do të quhet rrotacioni i 2025, ku me votën e tyre në fakt po takohen me ndërgjegjen e tyre, por në të njëjtën kohë ato kanë mundësinë që t’i japin goditjen regjimit i cili i dëboi dhe i largoi nga vendi në një mënyrë shumë civile dhe fort politike, me votën e tyre.

Unë dua t’i falënderoj secilin prej tyre për mbështetjen, për votën, për angazhimin, duke i kërkuar edhe një sakrificë të fundit. E kam bërë dhe dje, do e bëj dhe sot, dhe kam për ta bërë vazhdimisht, për sa kohë që gjatë kësaj periudhe diaspora ka hasur probleme të ndryshme.

Pavarësisht se DHL ka për detyrë që pasi ato të votojnë të shkojë dhe të marrë zarfin e votimit, unë ftoj çdo shqiptar kudo që të jetë, në Greqi, në Itali, Gjermani, Amerikë, apo në cilin do vend tjetër, që të bëjnë sakrificën e fundit dhe të shkojnë tek zyra më e afërt e DHL për të dorëzuar zarfin.

Siç e keni transmetuar dhe ju (mediat), dhe ju falënderoj për këtë, ka pasur disa problematika si moshkuarja në adresën përkatëse për të tërhequr zarfin siç është marrëveshja.

Ka pasur raste që ka munguar fleta e votimit, ka pasur raste që janë gjetur përballë hedhjes së fletës së votimit o në oborr, ose është marrë nga komshia. Me dhjetëra zarfe, dhe kjo nuk është e ligjshme.

Ka ndodhur që kur janë nisur zarfet, të ketë pasur duplikata, ka ndodhur edhe shumë raste të tjera.

Unë shfrytëzoj rastin për t’i bërë thirrje KQZ që t’i kërkojë DHL që të përmbushin detyrimet e tyre ligjore dhe logjistike.
Thyerja e afateve dhe standardeve të vendosura në ligj është një cenim i rëndë i votës së shqiptarëve që jetojnë jashtë kufinjve të Shqipërisë dhe në këtë mënyrë ajo do cenonte tërësisht integritetin e këtyre zgjedhjeve.

Duke thënë këtë, dua të përsëris edhe njëherë një falënderim dhe mirënjohje për shqiptarët që në mënyrë masive po votojnë, po sakrifikojnë dhe po shkojnë edhe tek zyrat e DHL pavarësisht se nuk e kishin detyrim, dhe me votën e tyre, me zarfin e tyre që po sjellin në Shqipëri, sigurisht ato mesa duket do të përmbysin regjimin që i përjashtoi dhe i dëboi nga vendi i tyre.

Ndoshta janë 2 momente kyçe që do bëjnë ndryshimin e madh, diaspora e para dhe e dyta gratë, të cilat nuk pranojnë kurrë që babait të fëmijëve të tyre t’u thonë çyryk e të tjerë e të tjerë.

Ne e shohim me pozitivitet në fakt votimin që po ndodh kudo në botë dhe kjo kërkon një mirënjohje dhe është një moment historik.

Në fakt shqiptarët po votojnë në një akt të fortë drejtësie dhe në akt historik për t’ua kthyer dëbimin që u kanë bërë 1 milion shqiptarëve gjatë këtyre 12 viteve.

Nëse ne nuk do ndalojmë emigrimin dhe dëbimin e shqiptarëve, në një periudhë shumë të shkurtër kohore, ne do kthehemi si azili më i madh i të moshuarve që do ekzistojë në botë, dhe ne shqiptarët brenda kufinjve të Shqipërisë por edhe ato që janë jashtë kufinjve të Shqipërisë nuk mund ta lejojmë kurrë që të humbim vendin dhe kombin tonë, për shkak të cinizmit, të arrogancës apo të frikës që dikush ka për të lëshuar pushtetin", tha Topalli.