"Turizmi skandaloz i Rilindjes"/ Blushi: 84% e ujrave për notim rezultojnë të ndotura!

Sekretari i Përgjithshëm i Partisë së Lirisë ka ngritur ditën e sotme një tjetër shqetësim që lidhet me turizmin.

Në një deklaratë për mediat Blushi solli në vëmendje Raportin e Agjencisë Europiane të Mjedisit që sipas tij tregon realitetin e hidhur që propaganda nuk e mbulon dot më: vetëm 16% e ujërave në Shqipëri janë të përshtatshme për notim me cilësi të shkëlqyer, ndërsa 84% janë me ujëra të ndotura. 

Blushi shprehet se përgjegjësi kryesore është qeveria që sipas tij është kthyer në qeverinë e mashtrimeve dhe abuzimeve të përbindshme që e kanë fundosur Sqhipërinë në një rekord të zi. 

Deklarat e plotë e Blushit

Raporti tronditës i Agjencisë Europiane të Mjedisit tregon realitetin e hidhur që propaganda nuk e mbulon dot më: vetëm 16% e ujërave në Shqipëri janë të përshtatshme për notim me cilësi të shkëlqyer, ndërsa 84% janë një turp kombëtar dhe një rrezik për shëndetin publik, ujëra të ndotura njësoj si higjiena personale e Edi Ramës dhe si kjo qeverisje që kundërmon dhe u ka zënë frymën shqiptarëve të ndershëm dhe patriotë.

Infrastruktura turistike vijon të jetë në gjendje skandaloze, shërbimet mungojnë, dhe pushteti vendor është kthyer në një rreth vicioz patronazhizmi, paaftësie dhe abuzimi.

Në kulmin e sezonit turistik, Shqipëria po përjeton momentin më të errët të dekadës në këtë fushë, ku çdo operator turistik, nga Alpet deri në Ksamil, ankohet për rënie drastike të numrit të vizitorëve dhe fitimeve.
Kompanitë serioze po largohen njëra pas tjetrës.

Rasti më tragjik i lëngatës së këtij sektori dhe dështimit në turizëm, është Vlora, qyteti simbol i turizmit shqiptar, që po mbytet në etje.

Prej javësh nuk ka ujë të pijshëm, sepse ndërmarrja e ujësjellësit është kthyer në një strofull patronazhistësh, të cilët marrin rroga të paligjshme, por nuk janë në gjendje të çelin një rubinet me ujë të pijshëm për qytetarët dhe turistët e shumtë.

Ky është realiteti i “Rilindjes”, që në tre mandate nuk garantoi dot as ujë të pijshëm, as ujë për t’u larë por që edhe detet, liqenet e lumenjtë po i kthen në të pashfrytëzueshëm siç konstaton edhe vetë Agjencia Europiane e Mjedisit.

Pensionistët nuk mendojnë më për bregdetin, sepse mezi mbijetojnë me pensionet mizerabël me të cilat mezi shtyjnë ditët e jo më muajin.

Në këtë kaos total, Edi Rama ka guximin të vijojë mashtrimet me propagandë banale, duke i shitur si turistë pasagjerët e Rinasit apo ata që kalojnë kufirin për të shkuar në Kosovë.

Në Shqipëri, turizmi po vdes, njerëzit po varfërohen, ndërsa Edi Rama vijon të ndajë pasuritë kombëtare si plaçkë me oligarkët dhe klientët e tij “strategjikë”.

Në vend të shfrytëzohen nga komunitetet vendase, këto pasuri u janë dhënë me koncesione klientëve politikë, duke i kthyer në burime fitimi për një pakicë të lidhur ngushtësisht me interesa korruptive e kriminale me pushtetin.

Është koha për reflektim dhe veprim. Shqipëria ka nevojë për një plan të qartë dhe konkret për të shpëtuar turizmin dhe me të, të ardhmen ekonomike të vendit.

Turizmi, si një nga sektorët më të rëndësishëm të ekonomisë kombëtare e familjare, meriton më shumë vëmendje për zhvillimin e qëndrueshëm të zonave me pasuri natyrore të mrekullueshme dhe të gjithë Shqipërisë.

Turizëm nuk janë vetëm hotelet e luksit dhe resortet me 5 yje, por në radhë të parë janë bujtinat mikpritëse familjare me gatime e prodhime bio në çdo stinë, që duhet të mbështeten nga shteti, është trashëgimia e çmuar kulturore që meriton të promovohet, janë brigjet, malet e lumenjtë përrallorë dhe të gjitha pasuritë natyrore kombëtare, që në vend të gjenerojnë të ardhura për familjet shqiptare, keqshfrytëzohen nga koncensionarë.

SPAK merr të pandehur kreun e Komisionit të Prokurimeve Publike, Jonaid Myzyri.

Është koha për të reflektuar mbi domosdoshmërinë për t'i dhënë frymëmarrje këtij sektori jetik për ekonominë, nëpërmjet një plani konkret, të qartë dhe efikas, që do të frenonte edhe shpopullimin e vendit, duke rikthyer shpresën për zhvillim të qëndrueshëm dhe të ardhme të sigurtë".