“Turp, na kanë përgjuar”, zbardhet debati me dyer të mbyllura nga kryesia e PD, Basha: S'jemi shkollë t’ju mbledhim celularët

Zbardhet një pjesë nga debati me dyer të mbyllura nga Kryesia e PD e mbajtur një ditë më parë.  

Në kryesi diskutimet ishin se kush do të bënte analizën e rezultatit për vetë drejtuesit politikë që u caktuan pak më shumë se një muaj para zgjedhjeve.

Sipas gazetës Panorama, në diskutim e sipër anëtarët Albana Vokshi, Jorida Tabaku dhe Eno Bozdo ngritën shqetësimin për audiot e rrjedhura në media nga mbledhja e kaluar e cila ka qenë me dyer të mbyllura. Vokshi e quajti këtë përgjim, ndërsa kryedemokrati u përgjigj se “nuk mund të bëhemi këtu si në shkollë që t’ju mbledhim celularët”.

Pjesë nga debati

Albana Vokshi: Për procedurë, në mbledhjen e kaluar ka ndodhur një turp. Dikush ka regjistruar me audio diskutimet në kryesi dhe i ka shpërndarë për media. Dikush na ka përgjuar me audio në mbledhje. Është e papranueshme. S’mund të vendosen audio. Nuk duhet të bëhen fshehtazi. Ne nuk është se kemi frikë nga ato që diskutojmë, por duhet të jemi korrektë. Nëse zyra e shtypit e gjykon se mbledhja duhet të regjistrohet, le ta bëjnë, por nuk është normale që të jetë mbledhje me dyer të mbyllura dhe nga këtu të dalin audio.

Jorida Tabaku: Nuk është problem që diskutimet dalin, problemi është që ndryshohen e deformohen. Ndoshta duhet që zyra e shtypit të nisë një informacion se çfarë diskutoi secili dhe është më korrekte sesa të dalin të deformuara.

Enno Bozdo: Edhe unë jam dakord që nuk duhet të dalin audio nga mbledhja e kryesisë në një kohë që mbledhja caktohet me dyer të mbyllura.

Lulzim Basha: Këto nuk janë gjëra për t’u diskutuar në mbledhjen e kryesisë. Nuk mund të bëhemi këtu si në shkollë që t’ju mbledhim celularët e t’i vendosim diku dhe më pas t’i merrni mbrapsht kur të mbarojë mbledhja e kryesisë. Ju këtu jeni njerëz politikë dhe i gjykoni vetë se çfarë duhet të flisni e si duhet t’i flisni. Ndaj ta mbyllim këtu këtë diskutim.

Kujtojmë se në mbledhjen e kaluar Koordinatori Kombëtar për Energjinë në PD, Eno Bozdo mbajti një qëndrim kritik ndaj modelit të ndjekur nga PD vitet e fundit, që sipas tij e çoi partinë sërish drejt humbjes dhe të destinuar të qëndrojë në opozitë për 12 vjet.

Ky qëndrim i Bozdos u bë publik pas qarkullimit në media të një audio-përgjimi nga mbledhja, ku  Bozdo i drejtohej kryetarit Basha se tani është momenti i një reflektimi të thellë dhe një analize konceptuale për të kuptuar problemet që i sollën PD një tjetër dështim.

Po ashtu, ai shprehej kundër qëndrimeve radikale për mosnjohje të zgjedhjeve dhe bojkotimi sërish të parlamentit.