Vangjeli: Kompania 'Eco Riciklim' u denoncua disa herë nga PD, por prokurorët specialë ende asnjë hetim

Zëdhënësja e Antikorrupsionit në PD, Genta Vangjeli ngre shqetësimin se kompania Eco Riciklim shpk është denoncuar disa herë nga PD, pasi ështe kallëzuar në SPAK për vepren penale ‘Shkeljes së barazisë së pjesëmarrësve në tendera apo ankande publike’.

Ppërmes një deklarate për media Vangjeli tha se pas një viti nga dorëzimi i kallëzimit penal në SPAK dhe pas disa denoncimesh të vazhdueshme të PD, fenomeni nuk është ndalur, por vijohet me gjoja gara publike duke keqmenaxhuar fondet publike.

Deklarata e plotë:

Është e disata herë që kompania Eco Riciklim shpk denoncohet nga PD.

Eco Riciklim drejton monopolin e procedurave tenderuese me objekt asgjësimin e mbetjeve spitalore të prokuruara nga MSH dhe institucionet e varësisë.

Para disa ditësh në buletinin e APP së, nr.14, datë 25 Mars 2025 u publikua njoftimi i fituesit nga QSUNT për operatorin e vetëm pjesëmarrës në garë, Eco Riciklim, me objekt: ‘Trajtim dhe asgjësim i mbetjeve spitalore të rrezikshme për 24 muaj (kodet 18.01.01, 18.01.03, 18.01.08)’, me vlerë të ofertës 100 % të fondit limit.

https://openprocurement.al/sq/htender/list/corporate/L61814009B?

Kontrata e mësipërme kulmon me vlerën më të lartë krahasuar me të gjitha kontratat e tjera të regjistruara në databazën e ‘Open Procurement’ për procedurat e kësaj natyre.

Kjo kontratë u shpall në datën 20 Shkurt 2025.

Për të bërë të mundur që 1.7 milion euro të shkonin prapë te Eco Riciklim kryhet një veprim taktik nga pronari Arbër Teqja, i biri i nëndrejtoreshës së QSUNT.

7 ditë pas shpalljes së tenderit në 27 Shkurt 2025, ai shet pjesën e tij të aksioneve te një kompani tjetër.

Në garën për këtë tender mori pjesë vetëm ky ofertues dhe në mungesë konkurrence, sigurisht u shpall fitues.

Oferta ishte plot 100 % të vlerës fondit limit ose fiks 1.7 milion euro me tvsh.

Sipas Spending Data vetëm me Eco Riciklim, Arbër Teqja ka fituar 5.6 milion euro për kontrata publike nga MSH dhe institucionet e varësisë, përfshirë edhe QSUNT ku punon e ëma si nëndrejtoreshë.

Ka një vit që KM Edi Rama, Ministrja e Shëndetësisë e kohës O.Manastirliu,  nëndrejtoresha e Qendrës Spitalore Universitare Nënë Tereza (QSUNT), djali i saj ish ortaku i kompanisë Eco Riciklim shpk Arbër Teqja, etj janë kallëzuar në SPAK nga Partia Demokratike për veprat penale të ‘Shpërdorimit të detyrës’, dhe ‘Shkeljes së barazisë së pjesëmarrësve në tendera apo ankande publike’.

Deri tani asnjë reagim nga Spak ….

Prokurorët të verifikojnë ligjshmërinë e zhvillimit të këtyre procedurave dhe përfituesit fundorë të këtyre parave publike.

Pas një viti nga dorëzimi i kallëzimit penal në SPAK dhe pas disa denoncimesh të vazhdueshme të PD, fenomeni nuk është ndalur. Vijohet me gjoja gara publike duke keqmenaxhuar fondet publike.

Atëherë çfarë emri duhet t’u vëmë këtyre prokurorëve specialë?

Janë duke punuar kundra korrupsionit apo kanë lidhje speciale me të?