“Veliaj ka mbaruar punë me rininë”, Këlliçi në Tufinë: Paratë tuaja nuk do shkojnë më për inceneratorët

Belind Këlliçi ka vazhduar turin e takimeve me qytetarët në kuadër të zgjedhjeve lokale të datës 14 maj, ku ai kandidon për kryetar bashkie të Tiranës përballë Erion Veliajt.

Këtë herë ai zhvilloi takim me banorët e Tufinës, një zonë rreth 2 kilometra larg qendër së Tiranës. Në bashkëbisedimin që pati me banorët, u vu në dukje mungesa e ujit të pijshëm, e investimeve në shkollën e zonës, por dhe për rrugën që të çon deri atje.

“Jemi në një fushatë që nuk është fushatë e zakonshme. Erjon Veliaj trumbeton kryeqytetin europian të rinisë. Ai ka mbaruar punë me rininë këtu dhe i jep mend rinisë në Europë. Këto arritje pash që kryebashkiaku i shpalli para dy tre ditësh. Problematikat që ka Tirana sot duhet të ishin zgjidhur prej vitesh. Unë jam këtu për të pranuar dhe gabimet që ka bërë Partia Demokratike në të kaluarën, por jam këtu ama për të qenë para jush me këmbë në tokë, për të dhënë premtime të prekshme dhe tëg realizueshme."

"Ju jap fjalën që siç jam i pakorruptuar sot, ashtu do të jem dhe nesër i pakorruptueshëm në mbrojtje të interesit tuaj. Çfarë premtoj unë! Çështja e ujit të pijshëm do marrë një zgjidhje. Nuk po them këtu 24 orë në ditë se s'kam ndërmend t'ju gënjej. Me ekipin e inxhinerëve, kemi marrë një formulë që mandatin e parë ta çojmë këtë mungesë uji që keni 1 apo 2 orë, ja po e quaj 3, deri në 14 në ditë."

"Kushdo që t'ju vijë këtu, jo Belindi, po kushdo që do vijë këtu dhe t'ju thotë se do sjell 24 orë ujë të pijshëm, ju gënjen, përzejeni. Paratë e taksapaguesve nuk do të shkojnë më për inceneratorë, por do shkojnë për qytetarët, do shkojnë për familjet në nevojë, do shkojnë për çiftet e reja, për të bërë të mundur që këtu të rrinë të rinjtë."

"Paratë do shkojnë në infrastukturë, në ndriçim, në trajtimin e çështjes së ujit të pijshëm. Pa disktutim përpos këtyrë çështjeve, do ketë një disiplinim dhe një sjellje normale të policisë bashkiake. Kështu që ju premtoj që brenda 100 ditëve të para do ketë një disiplinim të plotë të kësaj strukture.”

"Për shkollën, e para nuk do ju mungojë baza materiale, e sigurtë dhe rikonstruksionin, merreni që sot mbajeni shënim do të ndodhë. Mbas 14 majit, për 400 metra rrugë kur bëhet fjalë për fëmijët, brenda dhjetorit të këtij viti e ke të zgjidhur". 

"Koalicioni "Bashkë Fitojmë" kandidon Belind Këlliçin në Tiranë, zgjedhja është o Belind Këlliçin me koalicionin “Bashkë Fitojmë”, o Erion Veliajn me PS-në. Erion Veliajn e kam futur në mes të shënjestrës, do t’ia marr shpirtin bashkë me ju deri më 14 maj përditë. Nuk do i ndahem as edhe një moment,” tha Këlliçi.