"Vendi drejt diktaturës", ish-ministri i Jashtëm: Berisha personi i duhur për të drejtuar PD

Ish-ministri i Jashtëm Aldo Bumçi ka folur për mundësinë e një ringritje të Partisë Demokratike dhe deklaroi se vendi është drejt diktaturës pasi zgjedhjet u dhunuan.

Në një lidhje me "Skype" me televizionin MCN, ai tha se 50 mijë lek për pensionistët në fushtaë ishte një nga format për blerjen e votës, ndërsa theksoi se një tjetër shkelje ishte dhe përdorimi i fondeve në fushatë.

Sipas tij, Rama ndërhyri edhe në vendimet e gjykatës për të penguar regjistrimin e partisë, duke treguar se sistemet e drejtësisë janë afër një kolapsi.

"Interesi i shqiptarëve sot është të bëhen bashkë rreth opozitës sepse ky vend ka shkarë në diktaturë që ka dhunuar zgjedhjet për të disatën herë duke i hequr të drejtën qytetarëve për të ndikuar. Është krim ndaj qytetarëve dhe në këto zgjedhje shkeljet kanë qenë publike ato kanë nisur disa kohë para zgjedhjeve me një ndërhyrje brutale të qeverisë që s’ka respektuar kodin zgjedhor. 50 mijë lekë të vjetra në kohë fushate për pensionistët, është një blerje vote."

"Përdorimi i fondeve shtetërore, aktivisti pas patronazhistëve të gjitha këto janë shkelje të kodit zgjedhor dhe shpërdorim administrate për vota. Përdorimi i fondeve në fushatë, kemi parë në Tiranë me qindra rrugë e sheshe që shtroheshin dhe lëvizjen e një 1.3 mln zgjedhësve nga pikat e votimit."

"Këto janë shkelje të kryera publikisht siç është dhe marrja e emrit të PD dy ditë para zgjedhjeve, që partia kryesore opozitare të mos garojë dot. Kemi një kapje të shtetit ku drejtësia bazike mungon dhe jemi pothuajse në kolaps të drejtësisë."

Në vijim ai tha se është e mundshme që të kemi një bashkim duke respektuar rregullat demokratike ku ekziston vota, vullneti i anëtarëve të partisë dhe respektimi i tij. Sipas tij, tashmë prej më shumë se një viti është e qartë se ku qëndron shumica e vullnetit të demokratëve,

"Dihet tashmë se ku është shumica, pakica nuk duhet të nënshtrohet, por shumica e demokratëve e ka treguar se ku është dhe duhet ta respektojmë. Bashkimi është i mundshëm mbi këto rregulla, dhe Berisha për shkak dhe të moshës dhe të gjithë faktorëve të tjerë është personi i duhur për të drejtuar në këto momente PD e cila ka qenë në një sulm të turpshëm për asgjësimin e saj."

"Berisha s’ka një plan për të ardhmen siç mund ta ketë çdo i ri, ai s’po projekton një PD sipas interesave të tij, s’ka qëllim të krijojë një PD që ta kontrollojë prandaj ai është personi i duhur për ta mbajtur këtë PD dhe për ta rritur atë."

Bumçi tha se nuk janë fraksionet që kanë sjell humbjet, në disa bashki mundet por në shumicën e bashkive janë shkeljet e kodit zgjedhor nga Partia Socialiste.

"Nuk ka arsye për ndarje të partisë, fraksione po, por që deputetët të mos njohin shumicën e tyre, e shoh të vështirë që dikush të ketë një projekt për të mirën e vendit kur nuk njeh shumicën e demokratëve. Për mua është e padrejtë marrja e emrit të PD nga një grup deputetëtsh.

Ndërsa sa i përket paralajmërimeve për protesta, Bumci tha se aktualisht janë të fokusuar te dokumentimi i shkeljeve zgjedhore.

"Jemi të angazhuar në hartimin e dosjes së zgjedhjeve që ja kemi bërë të ditur shqiptarëve, dhe po merremi me dokumentimin e shkeljes së zgjedhjeve. Kjo quhet një sistem autoritar zgjedhor ku zgjedhjet lejohen për ti dhënë autoritete regjimit dhe jo për të mundësuar rrotacionin. Do bëjmë të ditur dhe më pas do marrim vendime për aksionin tonë opozitar."