"Vox Populi Vex Dei", Balliu ndan detaje nga protesta për Politiko, thirrje qytetarëve: Shikoni xhepin tuaj, shikoni faturat

Në prag të protestës së thirrur nga opozita më 8 shkurt, Koordinatori Rajonal i Tiranës dhe Drejtuesi Organizativ i Partisë Demokratike, Klevis Balliu, ka dhënë një intervistë për Politiko.al, ku ka ndarë pritshmëritë e tij për këtë tubim, skenarin e protestës dhe hapat e ardhshëm të opozitës.

Balliu shprehet i bindur se protesta do të ketë një pjesëmarrje të jashtëzakonshme dhe do të shërbejë si një mesazh i qartë për ndryshimin e pashmangshëm politik.

“Do të jetë një protestë me një pjesëmarrje të jashtëzakonshme, përmasat e së cilës do t’i japin fund çdo dyshimi për ndryshimin e paevitueshëm më 11 maj”,  tha ai.

Ai theksoi angazhimin e opozitës në mbrojtjen e votës së lirë dhe kundërshtimin e asaj që e cilëson si “diktaturë” të kryeministrit Edi Rama.

Gjithashtu, ai u drejton një thirrje të gjithë qytetarëve, duke i ftuar të bëhen pjesë e kësaj beteje për të drejtat e tyre ekonomike dhe politike.

“Ejani në protestë për familjen tuaj, për fëmijët tuaj dhe për xhepin tuaj!”, bën thirrje Balliu.

Më poshtë, intervista e plotë me Klevis Balliun për Politiko.al:

Cilat janë pritshmëritë tuaja për protestën e 8 shkurtit?

Balliu: Do të jetë një protestë me një pjesëmarrje të jashtëzakonshme, përmasat e së cilës do t’i japin fund çdo dyshimi për ndryshimin e paevitueshëm më 11 maj.

Cili është skenari i protestës?

Balliu: Vox Populi, Vox Dei (Zëri i popullit, zëri i Zotit).

Nëse protesta e 8 shkurtit nuk sjell ndryshimin e dëshiruar, cilat janë hapat e ardhshëm të PD-së? A ka plane për protesta të tjera apo përshkallëzim të veprimeve opozitare?

Balliu: Ne nuk tërhiqemi kurrë. Asgjë nuk përjashtohet, por ndryshimi është i pashmangshëm, për këtë ju garantoj. Sot opozita është më e bashkuar dhe më e fortë. Ne kemi marrë mbi 500 mijë vota pa vulën, pa logon, madje me logon tonë kundër dhe pa asnjë fond. Sot kemi të paktën dyfishin e mbështetjes.

Kryetari Sali Berisha e ka quajtur këtë protestë një betejë për votën e lirë dhe kundër “diktaturës” së Edi Ramës. Si do të ndihmojë konkretisht kjo protestë në mbrojtjen e zgjedhjeve të lira?

Balliu: Aty ku ka protesta, bie diktatura; aty ku ka heshtje, ngrihet diktatura.

Çfarë mesazhi keni për shqiptarët që janë ende skeptikë për të dalë në protestë?

Balliu: Shikoni xhepin tuaj, shikoni faturat e dritave dhe të ujit, shikoni pensionet dhe rrogat tuaja. Ndërkohë që Edi Rama gëlltit 33.600 euro për një shishe verë, ai deklaron se nuk ka para për të rritur rrogat dhe pensionet tuaja.

Ejani në protestë për familjen tuaj, për fëmijët tuaj dhe për xhepin tuaj!

Nesër, në orën 17:00, bashkohuni në protestë për një Shqipëri të shqiptarëve, jo për pushtetarët!

Intervistoi: Elva Kurti