Zgjedhjet në PD/ Gjana tregon sa anëtarë kanë të drejtë vote, ngre problem mosdorëzimin e listave të monitoruesëve

Kreu i Komisionit Zgjedhor në PD, Jemin Gjata ka folur për zgjedhjet në parti, ndërsa na ndajnë katër ditë nga mbajtja e tyre. Ai tha se janë mbi 75 mijë anëtarë që kanë të drejtë votë.

Gjana tregoi se nuk do të votojnë ata anëtarë që në fushatën e fundit zgjedhore kanë qenë vëzhgues apo aktivistë të partive të tjera politike jashtë koalicionit me Partinë Demokratike. Ai sqaroi edhe çështjen e kartave të anëtarësisë.

“Në mbledhje është marrë vendimi për të shkyçur sistemin e listave të anëtarësisë. Hapja e sistemit do të bëhet ditën e premte në prani të anëtarëve të Komisionit. Do printohen listat e votuesve. 7 5.067 anëtarë dhe do vulosen listat. Kartat e anëtarësisë do të mbeten te Komisioni, i cili do t’i depozitojë në Komisionin e Zgjedhjeve të Partisë Demokratike.

Ky komision pas shpalljes së rezultateve do ia dorëzojë sekretarit organizativ do i regjistrojë në sistem. Do nxjerrë kartat e reja të anëtarësisë. Dhe për arsye të sentimenteve, do kthejmë edhe dokumentin e vjetër ekzistues. Për këta individë që paraqiten me kartë", tha Gjana në një konferencë për mediat nga selia blu.

Ky i fundit deklaroi se ka mbetur pezull miratimi i Komisioneve. Kjo pasi, sipas Gjanës, vetëm kandidati Lulzim Basha i ka dorëzuar listat me emrat e përfaqësuesve në qendrat e votimit.

Ai shtoi se kandidati tjetër, Agron Shehaj ka dorëzuar një listë, ku asnjë prej emrave nuk është anëtar i PD. Sipas Gjanës, emrat e dorëzuara nga Shehaj janë një "listë blof".

Sa i përket kandidatëve të tjerë në garë, kreu i Komisionit Zgjedhor tha se kanë ngritur pretendimin se duan kohë. Duke i cilësuar lojra, Gjana tha se kjo çështje nuk duhet të lihet për momentin e fundit.

Ai shtoi se është vendim i Kryesisë dhe kriter unik që procesi të monitorohet nga anëtarët e PD. Lidhur me këtë, Gjana theksoi se askush nuk do delegohet pa bërë verifikimet. Gjithashtu nënvizoi se janë marra të gjitha masat sa i përket bazës materiale.

"Kemi miratuar komisionet me tre anëtarë të degëve. Ka sjellë listat vetëm përfaqësuesi i Lulzim Bashës. Ndërsa të tjerët nuk kanë sjellë asnjë emër që do i përfaqësojë në qendrat e votimit. Është zhvilluar mbrëmë një diskutim i gjatë i kësaj çështje.

Shehaj dhe përfaqësuesi i tij dorëzuan një listë ku askush nuk ishte anëtar i Partisë Demokratike. Është një listë blof dhe është e papranueshme të bëhen lojëra të kësaj natyre. Mbrëmë është bërë e qartë, asnjë emër nuk mund të shkojë në Komision pa u miratuar nga Komisioni Zgjedhor. Pretendimi i tyre, na duhet ende kohë për të gjetur emrat.

Nuk do të presim deri në momentet e fundit. Në asnjë rast askush nuk do delegohet pa bërë verifikimet. Janë marrë masat për të gjithë bazat materiale. Janë tërhequr nga komisioni, dhomat e fshehta dhe materialet e tjera që na duhen në ditët e votimit. Përfaqësuesit e kandidatëve kanë qenë të ftuar të ishin pjesë e grupit që do tërheqin materialet. Pastaj do presim ditën e zgjedhjeve dhe zhvillimin e procesit në ditën e zgjedhjeve.

Është vendim që ka dalë nga kryesia dhe është edhe detyrim. Nuk mundet të kandidosh për këtë parti dhe nuk mund të monitorosh procesin brenda kësaj partie nëse nuk je anëtar i Partisë Demokratike. Disa janë kritere unike. Edhe kur flasim për vlefshmërinë e votës ne kemi marrë të njëjtat kritere si në zgjedhjet lokale në Shqipëri”, deklaroi Gjana.