Zhupa denoncon nga Saranda: Shkolla e re iu dhurua oligarkëve, nxënësit ndjekin mësim me dy turne

Viti shkollor 2025 vijon me problematika të rënda për nxënësit e qytetit, të cilët detyrohen të ndjekin mësimin me dy turne për shkak të mungesës së infrastrukturës së përshtatshme.

Deputetja demokrate Ina Zhupa ngriti sot alarmin nga Saranda, duke denoncuar situatën e shkollave 9-vjeçare, ku nxënësit zhvillojnë mësim nga ora 13:00 deri në 18:00 për turnin e dytë.

Zhupa theksoi se kjo situatë po dëmton cilësinë e mësimdhënies dhe po vështirëson jetën e prindërve, të cilët duhet të shoqërojnë fëmijët në orare të papërshtatshme.

Zhupa akuzoi Bashkinë e Sarandës se ka vendosur ta japë godinën për interesa private, duke e shndërruar në objekt për oligarkët e afërt me pushtetin, me synimin për ta kthyer në resort apo strukturë turistike.

DEKLARATA:

Jemi në vitin 2025 dhe ende qytete si Saranda vuajnë nga mësimi me 2 turne.

2 shkolla 9 vjeçare të Sarandës, ofrojnë mësim për nxënësit e Sarandës nga ora 1 e drekës deri në oren 6 pasdite për turnin e dytë, duke e bërë të pamundur jetën normale të prindërve që duhet të shoqërojnë nxënësit në këto orare të papërshtatshme por dhe duke ofruar një mësim jo cilësor.

Këto shkolla, në fakt janë shkolla të amortizuara, janë shkolla që nuk ofrojnë laboratore, janë shkolla që nuk kanë cilësi në mësimdhënie dhe në mjete didaktike.

Pavarësisht se u harxhuan 348 milion lekë nga taksat e qytetarëve shqiptar për të ndërtuar një shkollë të re me emrin “Eco Kampus” në Sarandë, kjo nuk u vu për 8 vite në funksion.

Dhe më një vendimarrje të pushtetit lokal, të Bashkisë Sarandë, ata vendosen që këtë godinë të ndërtuar me taksat e qytetarëve për t’u shndërruar në një shkollë ta shëndrronin dhe ta jepnin në një tokë për oligarkët dhe klientët e pushtetit, për ta kthyer në hotele e në resorte turistike.

Kjo është e papranushme, është kundra interesit publik dhe i lë nxënësit dhe prindërit e Sarandës në një gjëndje të mjerueshme.

Unë i bëj thirrje sot nga Saranda, të tërhiqen nga kjo vendimarrje kundra interesit publik.

Nga kjo vendimarrje e cila nuk i bënë nder qytetit të Sarandës dhe t`i japin mundësinë nxënësve të Sarandës që të bëjnë mësim në shkollen e re, duke e hapur atë shkolle. Duke vënë mjetet e duhura asaj shkolle dhe secili nga prindërit të jetë më i qetë kur i çon fëmijët për të studiuar me 1 turn në qytetin e Sarandës.

Ndaj është detyra e gjithëve për të ngritur zërin për këtë realitet, që është realitet i veçantë në gjithë Europën por që e vuan edhe qyteti i Sarandës.