Zjarri tek urgjenca e QSUT, Gjergji kërkon zbardhjen e ngjarjes: Papërgjegjshmëri dhe arrogancë e drejtuesve

Kryetarja e Komisionit të Shëndetësisë, Zheni Gjergji, ka folur për mosfunksionimin e urgjencës së re të QSUT-së, pas rënies së zjarrit një javë më parë.

Me anë të deklarate për mediat, Gjergji deklaroise qytetarët po përballen me mbylljen e dyerve për shkak të mosfunksionimit të urgjencës, duke iu drejtuar spitaleve të tjera. Por kjo, thekson Gjergji, nënkupton vonesë që rezulton fatale për disa pacientë.

Deputetja demokrate në emër të grupit të PD dhe Komisionit të Shëndetësisë kërkon zbardhjen e shkaqeve të zjarrit dhe marrjen e masave për pacientët.

Deklarata:

Një javë më parë urgjenca e spitalit më të madh në vend, Qendrës Spitalore Universitare “Nënë Tereza” u përfshi nga zjarri duke nxjerrë jashtë funksioni shërbimet spitalore që ofroheshin aty. Godina e re e urgjencës është përuruar vetëm një vit më pare dhe ka kushtuar plot 17 milion euro.

Ndërkohë që shkaqet e rënies së zjarrit dhe përgjegjësit duhen zbardhur sa më parë nga organet ligjzbatuese, është e papranueshme që vetëm 2 ditë me parë QSUT ka njoftuar zhvendosjen e shërbimeve të urgjencës në Spitalin e Traumës dhe Spitalin “Shefqet Ndroqi”.

Qytetarë të shumtë në emergjencë shëndetësore janë përballur me dyert e mbyllura të Urgjencës së QSUT-së dhe iu është dashur t’iu drejtohen spitaleve të tjera të kryeqytetit, vonesë që ka rezultuar edhe fatale për pacientë në gjendje të rëndë shëndetësore.

Kjo vetëm si rezultat i papërgjegjshmërisë dhe arrogancës së drejtuesve të QSUT-së dhe Ministrisë së Shëndetësisë. Prandaj, në emër të Grupit Parlamentar të PD-së dhe Komisionit Parlamentar për Shëndetësinë kërkoj me urgjencë zbardhjen e shkaqeve të zjarrit në QSUT dhe përgjegjësve, si dhe marrjen e masave për ofrimin e shërbimeve jetëshpëtuese për qytetarët. E gjitha kjo ka ndodhur  për shkak të arrogancës dhe pa aftësisë dhe tregon se sa pa e rëndësishme është jeta e qytetarëve për ministrinë e shëndetësisë.

Ajo cfarë ndodhi në urgjencën e Qendrës Spitalore Universitare “Nënë Tereza”, është tregues i qartë ku ndodhet sot shëndetësia shqiptare.

Qytetarët paguajnë për shëndetësinë më shumë se kushdo në Europë. Por pavarësisht kësaj ata nuk marrin sherbime. Miliardat , Qeveria i çon për biznesin e konçesioneve dhe në xhepat e oligarkëve.

Nuk është vetëm opozita, janë edhe institucionet ndërkombëtare që e tregojnë këtë. Sipas të dhënave nga Organizata Botërore e Shëndetësisë, në vitin 2021 një shqiptar ka shpenzuar mesatarisht për shëndetin 465 dollarë. Kjo shumë në masën 59.7% (277 USD) është përballuar nga xhepi I qytetarëve dhe pjesa tjetër 39.7 për qind nga buxheti i shtetit, duke e renditur Shqipërinë të parën në listën e vendeve ku qytetarët paguajnë për shëndetin e tyre.

Tej çdo fasade dhe  jashtë çdo emocioni politik,  sot shëndetësia shqiptare është në kolaps dhe qytetarët janë ata që e vuajnë.

Këto fakte dhe  mijëra  arsye  të tjera, janë moment për të protestuar dhe ngritur zërin. Prandaj,  të dashur qytetar  ju ftoj, të bëhemi bashkë nesër në orën 5:30, para kryeministrisë, Të nisim një rrugëtim për një Shqipëri pa krim dhe korrupsion, për një vend që ëndërrojmë të ndërtojmë për të ardhmen e fëmijëve tanë.