Përfundon afati i kandidaturave për President/ ‘Digjet’ raundi i parë i votimit, nesër mblidhen ‘Ligjet’

Ka përfunduar në orë 16:00 afati i fundit për të dorëzuar kandidaturat për Presidentin e ri. Në Kryesinë e Kuvendin nuk është dorëzuar asnjë kandidaturë, çka bën që të digjet edhe raundi i parë i votimit i caktuar nga maxhoranca nesër në orën 17:00.

Ndërsa po nesër do të mblidhet edhe Komisioni i Ligjeve në orë 10:00, për të shqyrtuar kandidaturat e dorëzuara, megjithëse nuk pati të tilla.

Mbledhja e 10 majit mes maxhorancës dhe disa deputetëve demokratë nuk gjeti konsensus në përcaktimin e raundit të parë të votimit dhe afatit të fundit për dorëzimin e kandidaturave. PS miratoi e vetme raundin dhe afatin e kandidaturave, pa marrë mbështetjen e disa prej deputetëve të pranishëm të PD.

Idrizi dhe Mediu kundër Alibeajt

Të premten, kreu i grupit parlamentar të PS Taulant Balla, zhvilloi një takim me Mesila Dodën, Shpëtim Idrizin, Fatmir Mediun dhe Agron Dukën lidhur me procesin e zgjedhjes së Presidentit të ri.

Në përfundim të takimit, Idrizi u shpreh se është koha që të flitet me emra konkretë për duke zgjedhur një President në konsensus me palët. Idrizi kundërshtoi idenë e Enkelejd Alibeajt, duke kërkuar një president me eksperiencë politike.

“Është detyrim kushtetues në mënyrën se si sillet Presidenti që në tre raundet e para duhet për konsensus. Shqiptarët kanë nevojë për President konsensual. Theksuam që Presidenti i Republikës duhet të jetë një preson me eksperiencë politike. Sot kemi nevojë të hyjmë me emra konkret dhe të mos i lemë shqiptarët në terr dhe kemi detyrim të zgjedhim një person me konsensus”, tha Idrizi.

Sakaq, edhe Fatmir Mediu shprehu të njëjtin mendim si Idrizi. Edhe kërkoi që Presidenti i ri të vijë nga një karrierë politike.

“Si aleance për ndryshim kemi vendosur që propozimet do ti bëjmë brenda opozitës, jashtë opozitës asnjë qëndrim. Unë nuk i ndaj as të rithemelimit apo ca emri i vini ju. Të gjithë deputetet duhet të marrin pjesë me një kandidat të përbashkët”, tha Mediu.

Alibeaj kërkon proces real

Ndryshe nga aleatët, Enkelejd Alibeaj mungoi në takim me Taulant Ballën. Megjithëse pohoi se do të bëhej pjesë e procesit, Alibeajt i dorëzoi Dodës, Ballës dhe Mediut të premten, një dokument ku parashtronte se presidenti i ri duhet të zgjidhet me një proces gjithëpërfshirës, transparent dhe konsensual.

“Në mbledhjen e grupit kemi rënë dakord që të marrim pjesë në këtë proces, por në një proces real, të sinqertë, siç e do figura e presidentit. Një figurë që del mbi palët, neutral, t’i qëndrojë të gjitha sfidave që del nga kjo detyrë. Jemi ofruar për të pasur një proces. Procesi është i pari, i rëndësishme, një proces i sinqertë, bazuar në një procedurë, garancia e parë. Presidenti, qytetari i parë, që simbolizon unitetin e popullit. Për këtë arsye, siç besoj jeni në dijeni, ia kam përcjell qëndrimin zyrtar të PD, përfaqësuesve të maxhorancës, edhe të grupeve parlamentare, dhe e shohim të udhës që as për aparencë mos të perceptohet si lojë apo farsë. Kushtetuta e ka të qartë; presidenti zgjidhet me 84 vota. E përsëris, se ka maxhoranca legjitimitetin për të zgjedhur ajo e vetmja presidentin, për të bërë farsa, pasi së paku 3 deputetë, janë gjeneruar si non-grata”, tha Alibeaj.

‘Rithemelimi’ cakton negociatorë Bylykbashin dhe Boçin

Komisioni i Rithemelimit deklaroi i prerë se nuk do t’i bashkohet tryezës së maxhorancës në procesin e nisur për zgjedhjen e presidentit. ‘Rithemelimi’ caktoi deputetët Oerd Bylykbashi dhe Luçiano Boçi si negociatorë me opozitarët për çështjen e Presidentit.

Boçi dhe Bylykbashi janë të mandatarit e ‘Rithemelimit’ për të biseduar dhe diskutuar me partitë opozitare.

Çfarë parashikon Kushtetuta?

Kushtetuta e Shqipërisë parashikon që raundi konsiderohet i bërë edhe nëse nuk paraqitet asnjë kandidat.

Pra, deri më datë 16 maj mund të mos ketë kandidat të propozuar nga asnjëra palë dhe raundi do të quhet i ezauruar, për të vijuar pastaj me përcaktimin e datës së raundit të dytë.

Kandidatura duhet të zyrtarizohet brenda datës 24 maj, pasi ligji parashikon se procesi i zgjedhjes së Presidentit të Republikës në Kuvend nis jo më vonë se 60 ditë para mbarimit të mandatit të Presidentit aktual.

Në këtë rast, Ilir Metës i përfundon mandati më 24 korrik.