Bogdani ndërroi jetë, reagon politika: Na trondite me ikjen tënde, Gert! Ike shumë i ri

Deputeti i PD, Ervin Salianji ka ngushëlluar ndarjen nga jeta të Gerti Bogdanit, ish-kryetar i FRPD dhe deputet i Partisë Demokratike në Kuvendin e Shqipërisë.

Salianji shprehet se lajmi për ikjen e parakohshme të Bogdanit ishte tronditës. Ai vlerëson se Gerti Bogdani ishte miku, kolegu dhe një nga zërat më energjikë e kontributor i palodhur nga FRPD dhe deri në Parlament si ligjvënës i PD.

Postim

E pabesueshme, kjo ikje pa kohë Gert!

Tronditës lajmi për ndarjen e parakohshme nga jeta i mikut dhe ish-kolegut Gerti Bogdani. Një nga djemtë më të mirë në Partinë Demokratike, një nga të rinjtë më energjik dhe kontributor i palodhur që nga Forumi Rinor dhe deri në Parlamentin e Shqipërisë!

Ngushëllime të sinqerta Edlirës, familjes dhe miqve! Prehu në paqe Gerti!

Dhe Presidenti i Partisë së Lirisë Ilir Meta, ka reaguar në lidhje me ndarjen nga jeta të ish-deputetit të Partisë Demokratike.

Në një postim në rrjetet sociale, Meta shkruan se i ndjeri krijoi një model pozitiv për të rinjtë duke i nxitur të jenë pjesë e vendimmarrjes, ndërsa i shpreh ngushëllimet familjes.

 “Thellësisht i trishtuar nga lajmi për ndarjen e parakohshme nga jeta të ish-deputetit të Partisë Demokratike, Gert Bogdani.

Gjatë gjithë angazhimit të tij politik, ai krijoi një model pozitiv për të rinjtë duke i nxitur të jenë pjesë e vendimmarrjes.

Ngushëllimet më të ndjera bashkëshortes Edlira, dy vajzave të tij, të afërmve dhe të gjithë bashkëpunëtorëve, për këtë humbje të pazëvendësueshme.

I paharruar kujtimi i tij! Të prehet në paqe!”, shkruan kreu i PL.

Për ndarjen nga jeta e Bogdanit, ka reaguar dhe Kryetarja e Kuvendit, Elisa Spiropali .

“Dhimbje e thellë për ndarjen nga jeta të kolegut tonë”, shprehet Spiropali, ndërsa i ka shprehur ngushëllimet famijarëve të tij.

Kryetarja e Kuvendit shkruan se është e tronditur nga ndarja nga jeta e Gerti Bogdanit teksa shprehet “ike shumë i ri, vetëm 44-vjeç”.

“Dhimbje e thellë për ndarjen nga jeta të kolegut tonë, ish-deputetit të Kuvendit të Shqipërisë, babait, bashkëshortit, birit, Gerti Bogdani. Na trondite me ikjen tënde, Gert! Ike shumë i ri, vetëm 44 vjeç!

Ngushëllime nga zemra familjes! U prehsh në paqe! Të ndrittë shpirti”, shkruan kryeparlamentarja.

Kryetari i Partisë Republikane Fatmir Mediu ka reaguar pas ndarjes nga jeta të ish deputetit Gerti Bogdani.

Mesazhi:

Është shokuese, miku im prej vitesh Gerti Bogdani, deputet i Partisë Demokratike, ish kryetar i FRPD një njeri me cilësi të veçanta njerëzore ndërroj jetë.

Të gjithë jemi pa fjalë, kjo është dhimbje e madhe.

Zoti i dhëntë forcë Edlirës dhe fëmijëve, prindërve dhe vëllait të Gertit në këtë moment shumë të vështirë.

Prehu në paqe miku im pranë Zotit që ti besoje aq shumë.

Dhe kryeministri Edi Rama ka reaguar për këtë humbje në politikën shqiptare dhe jo vetëm.

"Keqardhje për ndarjen kaq të parakohshme nga jeta dhe ngushëllime bashkëshortes e familjes Bogdani"

“Një shpirt i lirë dhe i përkushtuar ndaj të tjerëve, një politikan i talentuar dhe me vlera”, kështu shkruan deputeti Lulzim Basha teksa shprehet se ka humbur një mik të paharrueshëm.

“Jam i tronditur nga lajmi për largimin e papritur e të parakohshëm nga jeta të mikut dhe bashkëpunëtorit tim Gerti Bogdani. Ngushëllimet e mia më të ndjera familjes në këto orë të vështira. Mendimet dhe lutjet e mija janë me ta në këtë dhimbje të madhe.

Një shpirt i lirë dhe i përkushtuar ndaj të tjerëve, një politikan i talentuar dhe me vlera, Gerti shërbeu me pasion dhe integritet në funksionet e tij publike, duke nderuar Partinë Demokratike me përfaqësimin dinjitoz brenda dhe jashtë vendit.

Në këtë ditë zie, kur familja ka humbur njeriun e saj më të shtrenjtë, demokratët kujtojnë me respektin më të madh modelin e intelektualit konsensual dhe njërin nga përfaqësuesit e tyre më të përkushtuar, dhe unë një mik të paharrueshëm. U prehtë në paqe!”