Këshilli i Mandateve mblidhet për Xhaçkën/ PD e kërkon në mbledhje, PS shmanget. Diskutimet mes palëve

Këshilli i Mandateve u mblodh sot për të shqyrtuar kërkesën e Partisë Demokratike për heqjen e mandatit të deputetes dhe ministres Olta Xhaçka, pasi akuzohet se ka konflikt interesi përmes bashkëshortit të saj si investitor strategjik dhe se ka përfituar nga detyra që ka mbajtur.

Palët patën diskutime gjatë mbledhjes. Përfaqësuesit e opozitës kërkuan që në mbledhje të ishte e pranishme edhe Xhaçka, kërkesë që sipas socialistëve nuk qëndronte dhe as nuk parashikohej në Rregullore.

Mazhoranca kërkoi shtyrjen e mbledhjes me arsyetimin se anëtarët e tyre, nuk janë njohur me dokumentacionet e plota të paraqitura nga opozita. Një kërkesë e tillë nuk ka marrë pëlqimin e opozitës.

Enkelejd Alibeaj paralajmëroi që çështjen do ta çojnë në Gjykatë Kushtetuese.

Pjesë nga diskutimet

Lindita Nikolla: Është paraqitur një mocion i nënshkruar nga 14 deputetë për mbarimin e mandatit të deputetes Olta Xhaçka. Këshilli i Mandateve dhe Imunitetit bën verifikimin e mocionit, dokumenteve që janë dorëzuar dhe momentin e marrjes së mandatit të Xhaçkës. Mocioni i paraqitur duhet t’i nënshtrohet vlerësimit për verifikimin e kërkesave.

Enkelejd Alibeaj: Nga ana e 1/10 të deputetëve është depozituar mocioni. Kërkesa është e depozituar, e nënshkruar nga 14 deputetë. Përveç depozitimit të mocionit, janë të bashkëlidhur dhe faktet dhe provat përkatëse.

Faktet për dhënien e statusit të investitorit strategjik që ka lidhje me Olta Xhaçkën. Janë fakte të tjera që bëjnë lidhjen mes shoqërisë që ka përfituar statusin e investitorit me deputeten dhe ministren Olta Xhaçka.

Klotilda Bushka: Nisur nga traditat e mëparshme për çështje të tilla, është e udhës që kolegët të marrin kohë për të lexuar dokumentacionin. Do ishte në seriozitet të punës të këshillit që kolegët të lexojnë materialet. Janë fakte të njohura. Një pjesë e jona kanë qenë në angazhime jashtë vendit. Kështu që kërkesa ka ardhur në datë 20, jemi njohur vetëm kur është bërë njoftimi i rendit të ditës. Për hir të një serioziteti, një leximi më të qartë të anëtarëve të këshillit, të shtyjmë në javën tjetër këtë çështje.

Enkelejd Alibeaj: Nuk është se kërkojmë që një çështje kaq serioze të mund të bie në joseriozitet. Po mund të jetë e logjikshme për t’iu njohur me dokumentacionin. Do bëja një kërkesë, Xhaçka duhet të ishte këtu. Edhe Xhaçka duhet t’i jepet koha dhe mundësia për të dhënë shpjegimet e veta.

Për ta shtyrë, me idenë e njohjes së dokumentacionit e ul seriozitetin. Dje në seancë plenare e kanë ndjekur shumë dhe e kanë njohur thelbin e fakteve të dokumentacionin. Mund të gjejmë një zgjidhje të mesme, jemi mbledhur sot për të respektuar vendimmarrjen që sot të ecim me prezantimin e kërkesës.

Më pas nëse i qëndronin faktit që doni të njiheni me dokumentacionin, të mund të vendoset në një seancë tjetër. Kushdo do marrë vesh që kush janë këta parlamentar dhe shkojnë pa përgatitur. Të ecim me këtë pjesë, të bëhet prezantimi dhe aq.

Taulant Balla: Kuvendi nuk ia nënshtron mocionin debatit parlamentar, nëse keni ndërmend të bëni debat për këtë debat s’ka. Nëse keni ndërmend të bëni teatër me këtë çështje, teatër s’ka.

Ajo që tha zonja Bushka s’ka nevojë për koment nga ju. Mendova që ju e keni seriozisht por shoh që ju vetë s’e keni seriozisht se e kam parë kemi bërë dhe diskutime dje, s’ka asnjë dyshim në faktin që këtu nuk bëhet fjalë për një cështje që ka thelb, ka substancë, megjithatë diskutimi këtu është i karakterit kushtetues. Nuk e heqim as nuk e japim ne mandatin, E heq mandatin Gjykata Kushtetuese. 

Lexojeni atë të shkretë rregullore, nuk është i detyruar në asnjë rast, dhe kur vjen kërkesë nga prokuroria dhe në rastin në fjalë që deputeti të jetë prezent. Në rast se e konsideron ai të nevojshme mund të jetë.

Ndaj është diferenca mes teatrit, bujës politik dhe substancës. Në vlerësimin tim substancë zero këtu. Kërkesa e zonjës Bushka është kërkesë në parim, këtu mbledhja të ndërpritet anëtarët të njihen me dokumentacionin, kërkesën e natyrshëm një moment tjetër.

Enkelejd Alibeaj: I fundit organ që e ndan shapin nga sheqeri është Gjykata Kushtetuese, ama ky këshill sot, seanca plenare nuk do të lemë asnjë cent për ta çuar deri në gjykatë kushtetuese. Ca shembulli mund të japim ne me shtyrjen.