Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

DITARI POLITIK

Komisioni i Reformës Zgjedhore/ Gjiknuri thirrje për konsensus, Alibeaj kërkon ekspertë, Mediu del me propozime

Politiko 17 Qershor 2022, 12:02

Komisioni i Reformës Zgjedhore/ Gjiknuri thirrje për konsensus,

Komisioni i Posaçëm për Reformën Zgjedhore ka filluar sot punimet. Në përbërje të komisionit janë 18 anëtarë.

Bashkëkryetari i komisionit Damian Gjiknuri në fjalën e tij nënvizoi rëndësinë për të gjetur pika të përbashkëta mes anëtarëve lidhur me rekomandimet e OSBE/ODIHR për zgjedhjet e vitit 2021. Gjiknuri vlerësoi me rëndësi ekspertizën e OSBE-së.

“Duhet të gjejmë pika të përbashkëta kompromisi për rekomandimet e ODIHR. Ne nuk kemi mundur t’i adresojmë të gjitha rekomandimet e OSBE/ODIHR. Kemi disa rekomandime të reja që vijnë nga zgjedhjet e 2021. Palët mund të diskutojnë dhe për çështje të tjera që mund të dalin. Do bëjmë maksimumin për të gjetur konsensusin. Janë disa vendime për të marrë sot që unë i propozoj. Do kërkojmë ekspertizën e OSBE/ODIHR”, tha Gjiknuri.

Nga ana tjetër, Enkelejd Alibeaj kërkoi edhe përfshirjen e ekspertëve jo vetëm nga OSBE, por edhe nga BE, SHBA, Komisioni i Venecias dhe Këshilli i Evropës. Në total Alibeaj kërkoi 6 ekspertë të pranishëm.

“Kam kërkuar që përveçse dërgimit të një kërkese zyrtare OSBE-së, do tia dërgojmë të njëjtën kërkesë edhe Këshillit të Europës, Komisionit të Venecias, përfaqësues të BE-së dhe SHBA-së që kanë të drejtën të sjellin përfaqësuesit e tyre dhe të marrin pjesë me ekspertizë. Edhe organizata vendase me traditë në ndjekjen e procedurave zgjedhore që kanë përvojë, janë të ftuar që të marrin pjesë në mbledhjet e komisionit të reformës zgjedhore. Sa i takon përcaktimit të numrit të ekspertëve, tradita ka qenë me 4 ekspertë, dy nga njëra anë, dy nga ana tjetër. Unë kërkoj të bëhen 6 ekspertë”, u shpreh Alibeaj.

Anëtari i Komisionit të Posaçëm, Fatmir Mediu, doli me disa propozime konkrete për anëtarët. Mediu tha se së pari Parlamenti duhet t’iu kthehet qytetarëve, ndërsa theksoi se garantimi i zgjedhjeve të lira bëhet duke i respektuar fillimisht ato.

Mediu shtoi se nëse duam një pluralizëm politik fillimisht duhet të kemi sistem zgjedhor teksa aktualin e konsideroi një ‘sistem vrastar’. Deputeti nuk la pa përmenduar edhe votën e paplotësuar të diasporës, teksa kërkoi nga anëtarët e komisionit mbështetje për KQZ-në në këtë çështje.

“Ajo çka i mungon këtij parlamenti është kushtetushmëria. Mendoj që ky është momenti i parë që duhet të jetë reflektimi ynë, kthimi i parlamentit te qytetarët. Një republikë parlamentare iu jep të drejtën qytetarëve për të deleguar me votë njeriun e tyre në parlament. E dyta, garantimi i zgjedhjeve të lira dhe të ndershme nuk është thjesht një çështje e shkrimit të procedurave apo kërkesave që kërkon OSBE/ODIHR, por është respektimi i tyre dhe ne e dimë se kush janë problemet gjatë procesit zgjedhor. Duhet të gjejmë praktikat më të mira për ta shmangur që ligjin dhe vendimmarrjen për zgjedhjet në Shqipëri ta bëjnë grupet kriminale, apo paratë e krimit. E treta, mendoj që një rëndësi jashtëzakonisht të madhe në funksionimin politik dhe demokracinë e këtij vendi, në pluralizmin politik ka sistemi zgjedhor. Sistemi aktual është një vrastar i pluralizmit politik. Ka tentuar gjithmonë për të eliminuar pluralizmin, për t’iu hequr dhe mundësin e organizimit dhe funksionimit normal politik dhe të partive të mëdha. Ka ardhur koha që t’i referohemi sistemeve që janë më funksionale, më produktive, më me pak konflikte, me zgjedhje që i kanë nxjerrë përfundimet shpejt dhe kanë sjellë qeverisje më të stabilizuar që bazohet në radhë të parë te zgjedhjet e lira dhe të ndershme. Sistemi proporcional kombëtar me lista të hapura i jep mundësinë çdo subjekti të konkurrojë bazuar në atë që ka dhe as në marrëveshje dhe asnjë shpërfillje të interesave politike të grupeve të caktuara. Pika e katërt, është serioziteti që duhet të marrim për të mbështetur KQZ-në për votimin e diasporës, mundësinë e përfaqësimit të diasporës. Nuk është thjesht a do kenë mundësi për të votuar ku janë, por a do kenë mundësi për t’u përfaqësuar”, deklaroi Mediu.

Përbërja e Komisionit për Reformën Zgjedhore:
1. Damian Gjiknuri bashkëkryetar (PS)
2. Enkelejd Alibeaj bashkëkryetar (PD)
3. Blerina Gjylameti anëtare (PS)
4. Klotilda Bushka anëtare (PS)
5. Toni Gogu anëtar (PS)
6. Ermonela Felaj anëtare (PS)
7. Arben Pëllumbi anëtar (PS)
8. Blendi Klosi anëtar (PS)
9. Klevis Xhoxhi anëtar (PS)
10. Etilda Gjonaj anëtare (PS)
11. Oerd Bylykbashi anëtar (PD)
12. Dashnor Sula anëtar (PD)
13. Grida Duma anëtare (PD)
14. Kreshnik Çollaku anëtar (PD)
15. Lindita Metaliaj anëtare (PD)
16. Fatmir Mediu anëtar (Grupi Parlamentar Aleanca për Ndryshim)
17. Shpëtim Idrizi anëtar (Grupi Parlamentar Demokraci dhe Integrim)
18. Petrit Vasili anëtar (LSI)