Zgjedhjet 2025: Ligji për një palë, toleranca për tjetrën

Nga Politiko.al

Zgjedhjet e 2025-ës kanë prodhuar jo vetëm gara për mandate, por edhe episode që sfidojnë nocionin e barazisë përpara ligjit.

Ditën e sotme, Prokuroria e Tiranës ka nisur procedim penal në gjendje të lirë ndaj Flamur Nokës, Sekretar i Përgjithshëm i Partisë Demokratike, për veprën penale “kanosje apo dhunim ndaj pjesëmarrësve në zgjedhje”.

 Procedimi erdhi pas kallëzimeve të dy qytetarëve, të cilët pretendojnë se janë penguar të votojnë në zonën e Vorës.

Por kjo ngjarje ka ngjallur reagime të forta, pasi për raste të ngjashme – në disa raste të dokumentuara me video – ku persona të lidhur me Partinë Socialiste janë parë të qëndrojnë në hyrje të qendrave të votimit, shpesh duke ushtruar presion mbi votuesit, nuk janë ndërmarrë veprime nga organet e drejtësisë.

Madje, në disa raste, këta individë janë trajtuar publikisht nga përfaqësues të institucionit të akuzës si “qytetarë të zakonshëm”.

Ky standard i dyfishtë ngre pikëpyetje serioze mbi pavarësinë dhe paanshmërinë institucionale në një moment kritik për demokracinë vendase.

 Ndërkohë që partitë politike akuzojnë njëra-tjetrën për tentativa intimidimi apo manipulimi të procesit, qytetarët mbeten përballë një pasqyre ku rregullat e lojës duken se ndryshojnë në varësi të ngjyrës politike.

Qendra e votimit në shkollën "Luan Hajdaraga" në Qesarakë është mbushur me patronazhista, të cilët kanë zënë vend brenda ambienteve të shkollës, duke intimiduar zgjedhësit.

Janë drejtues shkollash e kopshtesh që raportohet se rrijne në ambientet e lokalit ngjitur dhe herë pas here hyjnë edhe në QV, duke ushtruar presion të drejtpërdrejtë mbi votuesit, shprehet partia Demokratike në denoncimin e saj.

Një incident u regjistrua sot gjatë procesit të votimit në QV 1122 në Njësinë Administrative Maqellarë, Dibër.

Sipas A2 CNN, ka ndodhur një përplasje verbale mes përfaqësuesve të Partisë Socialiste që më pas ka degjeneruar në dhunë fizike.

Sipas burimeve nga vendngjarja, kandidati i Partisë Socialiste, Danjel Gjura, thuhet se ka goditur me grusht Florian Lazri punonjës i Ujësjellësit, gjatë një debati që mendohet të jetë zhvilluar në lidhje me veprimtari të karakterit elektoral dhe ndikimin mbi votuesit. Lazri thuhet se ishte në mbështetje të kandidatit Agron Malaj.

Kandidatja për deputete e PD në Sarancë, Ina Zhupa ka denoncuar të afërm të kandidatit socialist, Vasil Llajo, se po intimidon qytetarët. Zhupa ka ndarë në Facebook foto të Dhimitër Llajos, i cili ka nxjerrë jashtë qendrës së votimit fletën e votimit dhe udhëzon qytetarët se si të votojnë.

Opozita ka denoncuar punonjës i ISHSH Gjirokastër Ilir Ruka, pasi sipas tyre duke orientuar deri në kutinë e votimit 10 persona për të votuar për Partinë Socialiste.

Ky veprim është një shkelje flagrante e ligjit dhe mund të ndikojë negativisht në integritetin e procesit zgjedhor.

Po ashtu vëllai i kandidates së PS në Elbasan, Ervina Meta, Bledar Ferhati që intimidon votuesit dhe komisionarët duke qëndruar me orë të tëra në qendrën e votimit nr 25/87  në Belsh, raporton Syri Tv.

Në një klimë të tensionuar politike, veprime të tilla jo vetëm ndikojnë në perceptimin publik për rejtësinë, por edhe në besueshmërinë e vetë procesit zgjedhor.