“Djegia e afatit pasi opozita doli nga kërkesat”, Gjiknuri: I kemi votat për të kaluar reformën zgjedhore

Bashkëkryetari i Komisionit për Tryezën Zgjedhore, Damian Gjiknuri në një komunikim për mediat pas përfundimit të takimit u shpreh se qeveria ka pranuar shumë kërkesa të opozitës, por shkak për mosarritjen e një marrëveshje janë bërë kërkesat e shtesë të minutave të fundit nga ana e tyre.Sipas Gjiknurit, Kodi Zgjedhor duhet të mbyllet brenda këtij sesioni parlamentar dhe se mazhoranca i ka votat edhe pa opozitën për të kaluar reformën zgjedhore në parlament.

“Gjatë gjithë kësaj kohe këshilli politik dhe komisioni ka trajtuar me seriozitet rekomandimet e ODIHR dhe është munduar të adresojë dhe një pjesë të mirë të kërkesave të opozitës. Sot kemi një kuadër gati të përfunduar. Ne kemi gjetur hapësirën dhe do t’i përfshijmë kërkesat e opozitës, por nuk mundet që pasi biem dakord dhe reflektojmë, të fillohet dhe të dilet me kërkesa të reja. Gjithsesi, ne do vazhdojmë ndjekjen e procesit.

Nesër do informojmë Kuvendin , dyert e komunikimit janë të hapura me opozitën për të mbyllur edhe ato pak çështje. Kemi adresuar edhe kërkesat më serioze që opozita i kishte parakushte. Edhe ato që para 2 ditësh i quanin parakushte ne i kemi adresuar.

Miqtë ndërkombëtarë inkurajuan dialogun. Nuk kam ardhur të interpretoj të vërtetat. Ne kemi adresuar kërkesat që asnjë opozitë nuk mund të ketë imagjinuar ndonjëherë në Shqipëri. Do i bëj me pika pjesën më të madhe të kërkesave të opozitës, do çuditeni kur për disa thoshin këtë ose s’ka, ndërsa më pas heqin dorë.

Skema e administratës zgjedhore do jetë e rregullt, komisionerët do të rekrutohen, jemi të hapur për çdo lloj takimi. So vazhdojmë punën sepse vendi ka nevojë për Kod Zgjedhor. Opozita jashtëparlamentare është në të mirën e saj të na bashkëngjitet megjithatë e kam thënë, Kuvendi i ka votat. Shqetësimet i kemi reflektuar, se opozita ka një problem me Vettingun, atë e njeh Kushtetuta nuk e njeh opozita. Kodi Zgjedhor duhet të mbyllet brenda këtij sesioni parlamentar”,ka thënë Giknuri.