Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Dorëheqje, shkarkime, përplasje dhe akuza, ngjarjet që trazuan oborrin e socialistëve

Politiko 31 Dhjetor 2018, 11:30

Në fushatën e fundit zgjedhore, socialistët lobuan fort që ta kishin të vetëm timonin e drejtimit të vendit dhe 2018-ta ishte viti i parë i plotë që socialistët qeverisën pa pasur askënd në prehër. Por zhvillimet e ndodhura, me gjasë do kenë bërë që disa prej tyre “të pendohen”. 2018-ta i pati të gjitha sa i takon kampit rozë, dorëheqje, shkarkime nga detyra, debate por edhe akuza ku në shënjestër ishin zyrtarë të lartë të socialistëve.

Dorëheqjet

Pak ditë, pas një vizite të Ramës në Gjermani, Saimir Tahiri u shfaq para mediave ku njoftoi dorëzimin e mandatit të deputetit. Në fjalimin e “lamtumirës”, Tahiri nuk la pa shigjetuar edhe kundërshtarët e tij brenda PS-së, Veliajn dhe pasardhësin e tij në ministrinë e Brendshme, Fatmri Xhafaj.

Fatmir Xhafaj qëndroi në detyrën e ministrit të Brendshëm afro një vit, por gjatë gjithë kësaj kohe, ai ishte në qendër të sulmeve. Xhafaj i rezistoi akuzave sa i takon të vëllait me të ashtuquajturën, audio përgjimi “Babalja”, dhe kur dukej se e gjitha po kalonte, kryeministri Edi Rama njoftoi dorëheqjen e tij. Ky vendim, bërë që të qarkullonin edhe zëra se dorëheqja e Xhafajt lidhej me përplasjet e brendshme në kampin rozë.

Xhafaj refuzoi të jepte dorëheqjen atëherë kur çështja e vëllait të tij ishte në kulmin e vëmendjes, por në këtë periudhë një tjetër socialist dha një shembull krejt të kundërt nga ai i ish-ministrit. Arben Isaraj, njoftoi dorëheqjen nga posti i Drejtorit të Përgjithshëm të Shërbimeve të Transportit Rrugor, pasi vëllai i tij u ndalua nga policia.

Shkarkimi ministrave

Kur dukej se lajmet nga qeveria për 2018-ën ishin mbyllur, tre ditë para ndërrimit të viteve, Edi Rama vendosi të shkaktonte një furtunë në kabinetin qeverisës. 7 ministra u shkarkuar, së bashku me zëvendëskryeministrin ndërsa u rikthye edhe ministria për Marrëdhëniet me Parlamentin. Një lëvizje të tillë, pak kush e kishte menduar, madje siç u fol as ata që u shkarkuan nuk kishin dijeni më herët për këtë vendim.

Asnjë kryeministër më parë nuk kishte bërë një akt të tillë duke krijuar thuajse një qeveri të re pa mbërritur ende gjysma e mandatit. Nga qeveria u larguan ata të cilët etiketoheshin si figura të forta të PS-së ndërsa habia u shtua edhe më pasi Rama njoftoi zëvendësuesit e tyre, figura pa lidhje të forta me socialistët dhe me profil të ulët politik.

Përplasjet

Përplasjet brenda PS-së gjatë 2018-ës nuk i kanë mbuluar dot as kujdesi që tregojnë socialistët sa herë shfaqen para kamerave. Ligji për teatrin solli përplasjen mes kryeministrit Rama dhe ministrit Majko. Ky i fundit refuzoi të votonte pro ligjit për shembjen e godinës së teatrit, dhe mes Ramës dhe Majkos pati një debat në Kuvend. Të nesërmen, ministri i paraqiti dorëheqjen nga posti që mban ende, por kjo dorëheqje nuk u pranua nga ana e kreut të ekzekutivit.

Raportet mes Erion Braçes dhe Arben Ahmetajt, janë të njohura por ato u bënë edhe më evidente gjatë 2018-ës. Në komisionin e Ekonomisë, palët patën qëndrime të ashpra madje duke u reflektuar edhe qëndrimin që mbanin ndaj tyre. Pamjet ku Braçe luante me telefon teksa ministri po fliste përballë tij, bën xhiro në të gjitha mediat.

Taulant Muka është zëvendësministri që qëndroi më pak në detyrë dhe i vetmi i cili theu heshtjen duke bërë publike ato që kishte parë. Muka tregoi se çfarë ndodhte gjatë mbledhje të qeverisë, ku kërkohej angazhim për të rritur performancën në rrjetet sociale, ndërsa bëri publike edhe komunikimet me Ramën. Ky i fundit, vendosi t’i përgjigjej duke e cilësuar si “larvë politike”.

Socialistët në shënjestër

E ashtuquajtura çështja “Xhisiela”, përfshiu në akuza, kreun e grupit parlamentar të PS-së, Taulant Balla, deputetin socialist, Rexhep Rraja dhe kryebashkiakun e Krujës, Artur Bushi. Dëshmia e një oficeri policie se emrat e mësipërm kishin qenë në komisariatin e policisë së Fushë-Krujës, dhe se ushtruan presion dhe kërcënuan punonjësin e policisë, pas ngjarjes ku ishte i përfshirë djali i deputetit Rraja, ishte në qendër të vëmendjes për disa javë.

Emri i Taulant Ballës do të lidhej gjithashtu edhe me një akuzë sa i takon një sasie prej 4.5 milionë eurosh e cila do të vinte në Shqipëri. Për herë të parë akuzën e artikuloi kreu i opozitës, Lulzim Basha, dhe pak ditë më vonë në portin e Durrësit, në një makinë “Toyota Yaris”, do të gjendeshin 4.5 milionë euro që po hynin ilegalisht në vend.

Taulant Balla do të përmendej sërish për lidhjen me shtetasin Edmond Bego i dënuar me burg për trafik droge. Opozita tha se Bego kishte fituar disa tendera në zonën elektorale të Ballës, ndërsa emri i tij do të përmendej edhe në rastin e Unazës së Re. Opozita publikoi dokumente që tregonin njohjen Balla-Bego pasi kishin udhëtuar disa herë së bashku jashtë shtetit.

Kryebashkiaku i Durrësit, Vangjush Dako, ishte në qendër të akuzave, për disa javë gjatë 2018-ës pas publikimit të disa përgjimeve të anëtarëve të një grupi që merrej me trafik droge. Opozita kërkoi arrestimin e kryebashkiakut ndërsa prokuroria njoftoi nisjen e një hetimi, por deri më tani nuk ka asgjë të re sa i takon kësaj çështjeje.

Precedenti Lleshaj

Sandër Lleshaj u propozua nga Edi Rama për të pasuar Fatmir Xhafajn në postin e ministrit të Brendshëm. Por kur dukej se emërimi i tij do të ishte një formalitet, e kaluara prej ushtaraku u bë “sebep” që Presidenti ta refuzonte dekretimin e tij. Në pafuqi kushtetuese për ta bërë ministër, Rama e emëroi Lleshjan si zëvendësministër ndërsa u emërua disa javë më vonë si ministër pasi më parë Presidenti e shfuqizoi atë nga grada “gjeneral”. E gjithë kjo përplasje ligjore, shënoi edhe një precedent të pa ndodhur më parë në Shqipëri.

Merkato e deputetëve

Në 2018-ën nuk u prish as tradita e lëvizjes së deputetëve nga një krah në tjetrin. Tre deputetë të zgjedhur nën siglën e PDIU-së njoftuan bashkimin e tyre me grupin parlamentar të Partisë Socialiste.