Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

"Dy javët e para të shkollës do të jenë përsëritje", Shahini jep detaje nga riorganizimi i planeve mësimore për vitin e ri shkollor

Politiko 3 Shtator 2020, 17:29

Ministrja e Arsimit, Besa Shahini ka zhvilluar një takim gjatë me drejtues të Drejtorive dhe Zyrave të Arsimit Parauniversitar, referuar masave të ndërmarra për fillimin e vitit të ri shkollor 2020-2021.

Gjatë takimit, Shahini është shprehur se është bërë një riorganizim i planeve mësimore, me qëllim që dy javët e para të fillimit të vitit të ri shkollor të jenë prapë përsëritje për të gjithë nxënësit, të cilët pavarësisht mësimit në kushte shtëpie, ende nuk ndihen të sigurt për dijet që kanë mundur të përthithin.

Paralelisht, me gjithë përgatitjen për hapjen e shkollave, Shahini nënvizon se “ne kemi bërë edhe gjithë ndërtimin e platformës për mësimin online dhe organizimin e punës për mësim në kushte shtëpie”, ndërsa nënvizon faktin se kjo do të ndihmojë sidomos në zonat ku ndoshta shkollat nuk mund të punojnë me orar të plotë për të gjithë nxënësit dhe nxënësit duhet të bëjnë mësim të kombinuar – një pjesë të kohës ta kalojnë në shkollë, dhe një pjesë të lëndëve apo disa ditë të bëjnë mësim në kushte shtëpie.

Ndërsa thekson se gjatë gjithë verës mësuesit tanë kanë bërë xhirimet e orëve mësimore për kanalin e dedikuar “RTSH Shkolla”, Ministrja Shahini nënvizon gjithashtu se tashmë “kemi një platformë unike, ku i kemi të gjitha videot dhe mësuesi mund të rrijë në kontakt me nxënësin, të cilit i duhet të punojë në kushte shtëpie”.

Në lidhje me këtë platformë, Shahini është shprehur se MASR është në diskutim edhe ministrinë e arsimit në Republikën e Kosovës, në mënyrë që e njëjta platformë të përdoret në të gjithë trevën shqipfolëse dhe nxënësit të mund të mësojnë nga njëri-tjetri e mësuesit të kenë mundësi të shkëmbejnë përvojat e tyre më të mira. “Ne tashmë me Kosovën përdorim një kurrikul të përbashkët për arsimin parauniversitar, kështu që nuk shohim asnjë arsye pse nuk do ishte e mundur që ta përdorim një platformë unike për mësimin në kushte shtëpie”, shton ajo.

Në fund, Ministrja Shahini shprehet se “shpreson që kjo gatishmëri për t’u kthyer në shkollë, të vijë edhe me një rritje të përgjegjshmërisë nga të gjithë pjesëmarrësit në shkollë që të përgatiten sa më shumë që është e mundur për ta ruajtur shëndetin e vet, si dhe shëndetin e atyre që i kanë përreth, si në shkollë, bashkëmoshatarët e tyre dhe mësuesit, apo edhe kur të kthehen në shtëpi, anëtarët e familjes”.