Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

E dha televizori!

Politiko 29 Gusht 2018, 22:08

Naun Shundi

E dha televizori! Një shprehje e njohur dhe e stërdëgjuar nga veshët e shqiptarëve, e thënë nga një organ tjetër: goja e shqiptarëve. Nga goja te veshi dhe nga veshi te goja, është një rrugëtim sa i shkurtër, po aq i gjatë. Ekzistojnë media që synojnë veshët , siç ka nga ato që synojnë gojën. Por, me e frikshmja është ajo që synon syrin dhe nëpërmjet tij (duke përfshirë edhe veshët) synon trurin njerëzor.

Kur shikon një gjë me zë dhe figurë, s’ke nga ja mban pa thënë me vete: “Ja! E tha televizori! Pra, është e vërtetë, lind problemi”. A janë të vërteta të gjitha ato që thuhen në mediat vizive? Sa ndikojnë faktorët e jashtëm, që një lajm ta deformojnë, ose ta kthejnë në anti – lajm?! Këtu vijmë te financimet, kapjet dhe “kazanët” . Është e kuptueshme që kazani do të nxjerrë produktin, në raport të drejtë me çka ti i hedh brenda. N.q.s ti hedh mish të kontaminuar, tërë shikuesit kontaminohen. Nëqoftëse ti hedh mjaltë , shikuesit do të lumturohen, pavarësisht mizerjes në të cilën jetojmë.

Ka edhe nje të mesme mes kontaminimit dhe mjaltit. Dhe kjo është e vërteta. Të gjithë thonë që po thonë të vërtetën. Por, të vërteta ka pa fund. Problemi qëndron te seleksionimi i këtyre të vërtetave . Ca duhen thënë dhe ca jo. Kush e bën këtë seleksionim? Sigurisht, atyre që u intereson vetëm e “vërteta” e tyre dhe jo e të tjerëve. Megjithatë, edhe pse demokracia e vërtetë është respektimi i pakicës, ne synojmë dhe luftojmë që këtë pakicë, ta bëjmë “pakicëzë”, në mos, t’a eliminojmë fare. Ndryshe nuk ka si shpjegohet , që të gjitha mediat e shkruara dhe ato audiovizive, duke përjashtuar televizionin modest “FaxNeës” , nuk i kushtojnë asnjë vëmendje protestës “Mbro Teatrin”. Kjo protestë zhvillohet çdo ditë në qendër të Tiranës. Pranë sheshit (që në fakt është kodër) Skënderbej. E kanë marre fjalën për të protestuar me dhjetra personalitete të shquara , jo vetëm nga fusha teatrore, por edhe dhjetra e dhjetra studiues, akademikë, profesorë, e plot qytetarë.

Mendoj se ky përbën një lajm të përditshëm. Nuk përbën lajm fakti që u përplas një makinë në një shtyllë. Nuk përbën lajm, lajmet e përditëshme se djali vrau babanë, nusja vrau burrin dhe vjehrrën, komshiu vrau tetë veta dhe është në gjëndje të mirë mendore, aksidenti la kaq të vdekut dhe disa të plagosur që janë jashtë rrezikut për jetën. Ju që na i mbushët mediat tona me të tilla tmerre, nuk ju tmerron psikologjia e tmerrit dhe terrorit që po përhapni? Nuk ju vret ndërgjegjja se paratë e fituara kanë kosto shumë të lartë?! Ju lutem! Përdoreni pushtetin e katërt për mirë dhe jo për keq. Mos spekuloni me naivitetin e turmës! Kuptojeni! Jeni të përkohshëm, siç jemi të gjithë.

Edhe epitafin mbi varr, do të na e vënë të tjerët.