“112 mijë lekë vlen dinjiteti im?”/ Klotilda Bushka, nga lotët e pafajësisë tek statusi ‘e pandehur’

Në muajin shkurt, Klotilda Bushka u shfaq duke ‘lotuar’ në mbledhjen e grupit parlamentar të PS, teksa tentonte t’i shpëtonte hetimit që SPAK kishte nisur ndaj saj për “pengim të zbulimit të së vërtetës”.

Asokohe, Bushka u deklarua e pafajshme para kolegëve të saj socialistë, gjysma e të cilëve janë në të njëjtat pozita si ajo ose ndoshta edhe më të rënda. Deputetja e Ramës deklaronte me mallëngjim se Ajolën dhe Erionin i kishte miq, e siç duket në këtë status, lipset t’i ndihmonte edhe kur bëhej fjalë për korrupsion e pastrim parash.

“Janë vetëm 112 mijë lekë. Kolegë, kaq vlen dinjiteti im?”. Ishte kjo fraza që përdori Klotilda Bushka, e njëjta që sot, është marrë zyrtarisht e pandehur në dosjen “Veliaj”. Po le të pyesim sot zonjën Bushka: çfarë vlere ka dinjiteti kur pengon punën e drejtësisë?

Intimidim në emër të miqve

Sipas dosjes hetimore të SPAK, Bushka intimidoi Ina Goxhajn, ish-drejtoreshë ekzekutive e Qendrës ‘Byl-A’ dhe njëherazi kushërirë e saj, e cila u thirr për të dëshmuar në SPAK. Ky moment do të vendoste në lëvizje Bushkën e cila e thirri Goxhajn në shtëpinë e prindërve të saj dhe e urdhëroi të mohonte gjithçka gjatë marrjes në pyetje nga SPAK.

Herën e dytë zonja Bushka e ka takuar Ina Goxhajn në një studio avokatie dhe i ka thënë që gjërat duhet të mohoheshin në mënyrë kategorike. Shqetësimi tjetër i Klotilda Bushkës ishte të mos mësohej se adresa e BYL-A ishte shtëpia e saj.

Mirëpo, ndërhyrja e Bushkës nuk ka mjaftuar, derisa Ajola Xoxa i ka sekuetruar telefonin Goxhajt duke i kontrolluar bisedat dhe më pas, i ka dhënë një telefon të ri.

Siç del nga hetimet e SPAK, Ajola Xoxa, avokatët e saj dhe Klotilda Bushka morën vendimin që Ina Goxhaj të mos paraqitej në SPAK. Madje, Bushka i ka kërkuar në mënyrë kategorike të mos e përmendë emrin e Ajola Xoxës dhe as të tregonte se si kishin funksionuar. Ina Goxhaj thotë se i kanë bërë presion gjatë takimit duke i thënë që në momentin që Ajola do të shkonte në deklarim ajo do ta merrte vesh se çfarë kishte thënë Ina.

Nga pafajësia te statusi ‘e pandehur’

Bushka i dha konotacion “morali” mbështetjes që i kishte dhënë Ajolës dhe Veliajt në skemën korruptive që kishin ngritur, për të dalë si ‘viktimë’ e drejtësisë që sipas saj, nuk ia kishte dëgjuar versionin.

“E njoh Ajolën. Erioni është miku im i fëmijërisë, kemi punuar bashkë. Me ta kam përjetuar kalvarin e vuajtjeve muajt e fundit. E kam mbështetur Ajolën si mike dhe kolege, me Erionin për shkak të angazhimeve kam pasur mundësi të flas më rrallë. Pas kontrollit të banesave dhe zyrave të Erionit, disa njerëz janë vënë në dijeni të një shqetësumi, se ata janë intimiduar dhe kërcënuar për t’u marrë dëshmi nën presion”, deklaronte Bushka.

Për të përfocuar imazhin e figurës së pastër politike, Bushka futi në lojë familjen, fëmijët dhe dinjitetin të cilin pretendoi se nuk mund ta shiste për 112 mijë lekë.

“Bashkëshorti im ka një biznes në formën e personit fizik, që ofron shërbime të teknologjisë së informacionit, që prej viti 2006. Dhe i ka faturuar një organizate jofitimprurëse ‘Byla’, për shërbime hostimi, mirëmbajtje, faqe interneti, me një kosto rreth 16 euro në muaj. Faturimi total, për një periudhë disavjeçare arrin në shumën 112 mijë lekë, me faturë fiskale, të paguar në bankë për shërbime të kryera realisht. Të dokumentuara të gjitha, unë i disponoj dokumentet. Janë vetëm 112 mijë lekë. Kolegë, kaq vlen dinjiteti im? Si mund të mendohet një gjë e tillë. Si mund të balancohet kjo me koston e krijuar mbi emrin e dinjitetin tim të ndërtuar në një jetë të tërë. Po me familjarët e mi, prindërit e mi të moshuar, që sot dëgjojnë se vajza është nën hetim. Si t’ua shpjegoj fëmijëve dhe shokëve të tyre. Si t’ua shpjegoj se mamaja është e pafajshme derisa të provohet e kundërta dhe se prezumimi i pafajësisë nuk mund të jetë vetëm footnote në fund të deklaratës”, deklaroi Bushka.

Heshtja përballë sakrifikimit të Veliajt

Dy ditë më parë Rama konfirmoi përfundimisht se shanset pqër rikthimin e Veliajt në krye të Bashkisë së Tiranës janë zero. Ne mbledhjen e fundit që mbajti me deputetët dhe strukturat e bashkisë, kryeministri tha se Tiranës i mungon drejtimi dhe se Veliajn e ka zëvendësuar me deputetët.

“Tiranës i mungon drejtimi prej një kohe jo të shkurtër për një kryeqytet. Kemi riorganizuar tërësisht veten duke vendosur deputetët në pozicion më kërkues, për sa i përket pikërisht për të qëndruar afër dhe për të identifikuar problemet në territoret e kujdestarisë së tyre”, tha Rama.

Edhe pse e pranishme, Klotilda, mikja e Veliajt, u shfaq e buzëqeshur teksa përshëndetej me kolegët e partisë. Kur vjen puna tek urdhrat e Ramës duket se Klotilda i harron miqtë që dikur, i ndihmoi të fshihnin aferat dhe korrupsionin.

Dikur pyeti “kaq vlen dinjiteti im?”. Sot, përgjigjen nuk e japin më kolegët socialistë me duartrokitje, por SPAK me një status: “e pandehur”.