Avokatët bojkot seancash për 4 ditë, çfarë parashikon harta e re gjyqësore

Nga sot, Dhoma e Avokatisë njoftoi se për katër ditë me radhë, do të bojkotohen seancat gjyqësore në shenjë proteste ndaj hartës së re gjyqësore të miratuar të premten nga Këshilli i Lartë Gjyqësor. Dhoma e Avokatisë thotë se ky vendim është në shkelje të rëndë të të drejtave dhe lirive themelore të individit. Gjithashtu shton se cënon rëndë aksesin në drejtësi të individit. Sipas avokatëve, reduktimi i gjykatave lë hapësire për shkelje.

Çfarë parashikon vendimi?

Sipas vendimit të Këshillit të Lartë Gjyqësor, nga 22 gjykata të shkallës së parë do të mbeten vetëm 13 të tilla, nga 6 gjykata administrative vetëm dy, ndërsa për të gjithë vendin do të funksionojë vetëm një gjykatë Apeli në Tiranë. Këshilli i Lartë deklaron nga ana e tij se “propozimi mbi “Hartën e Re Gjyqësore” është hartuar duke u bazuar në standardet më të mira ndërkombëtare” dhe se “riorganizimi i rretheve gjyqësore krijon një qasje novatore që rrit efiçencën e sistemit gjyqësor për qytetarët, realizon shpërndarjen e drejtë të ngarkesës së punës midis gjykatave dhe gjyqtarëve dhe nxit specializimin, me pasojë reduktimin e kohës së nevojshme për shqyrtimin e një çështjeje e dhënies së një drejtësie më cilësore”.

Vendimi shkaktoi ‘furtunë’ reagimesh

Kreu i PD Sali Berisha thotë se harta e re e gjyqsorit është një ndëshkim i ri për qytetarët, një rrënim i të drejtës së qytetarëve shqiptarë për një proces të rregullt gjyqësor.

Në një deklaratë për mediat nga selia blu, kryedemokrati tha se reduktimi i numrit të gjykatave cënon dhe kufizon rëndë aksesin në drejtësi të individit.

Ai hodhi akuza ndaj qeverisë, duke shtuar se ky vendim “ndëshkon” banorët e 10 qyteteve të vendit si dhe nënvizoi se kjo rrit kostot për qytetarët, të cilët do të jenë të detyruar të shkojnë nga një qytet në tjetrin për të zhvilluar proceset gjyqësore.

Nga ana tjetër, grupi i Enkelejd Alibeajt bashkë me Fatmir Mediun kanë paraqitur një shkresë ku kërkojn një seancë dëgjimore për Hartën e re Gjyqësore.

Në kërkesë, deputetët shprehen se kanë marrë mesazhe nga qindra qytetarë të cilët ngrejnë si problem kryesor distancën që do t’iu duhet të bëjnë për të shkuar në gjykatën kompetente për gjykimin e një çështje.

Ndërsa ministri i Drejtësisë, Ulsi Manja tha se harta është në përputhje me reformën në drejtësi dhe se ka qenë Këshilli i Lartë Gjyqësor që ka miratuar hartën gjyqësore, në të cilën parashikohet një reduktim i numrit të gjykatave në vend.

Manja tha se harta e re e vendit do të ketë 13 gjykata nga 22 që ishin më parë, ndërsa nga gjashtë gjykata administrative të shkallës së parë do të mbeten dy, një në Tiranë dhe një në Lushnjë.

Sipas VOA, reduktimi i fortë i numrit të gjykatave duket se lidhet ngushtë me largimet e ndjeshme të gjyqtarëve nga sistemi për shkak të procesit të vettingut. Afro gjysma e tyre tanimë janë shkarkuar.

Debati për hartën filloi që pas disa takime konsultative, në të cilat ajo u kundërshtua ashpër nga avokatët, për shkak se sipas tyre pengon aksesin e qytetarëve të drejtësia

Propozimi i Këshillit të Lartë gjyqësor do të duhet të marrë dhe mendimin e Këshillit të Lartë të Prokurorisë, Prokurorit të Përgjithshëm dhe Ministrit të Financave, përpara se t'i përcillet për vendim qeverisë.