Beteja e re Basha-Berisha, cila PD do të regjistrohet pas shpalljes së datës së zgjedhjeve të pjesshme vendore

Presidenti Ilir Meta deklaroi këtë të premte se ka nisur procedurat për të shpallur datën e zgjedhjeve të pjesshme vendore, për bashkitë që nuk kanë kryetar.

Meta tha se i ka dërguar një letër Komisionerit Zgjedhor për të marrë informacion mbi bashkitë që nuk kanë kryetar në mënyrë që të vijohet më pas me procedurat që ndjekin për zgjedhjen e krerëve të tyre.

Në këtë mënyrë, Meta është duke shkuar drejt shpalljes së datës së zgjedhjeve të pjesshme lokale.

"Sot jemi për të bërë me dije se kemi filluar procedurat për t'i dhënë zgjidhje dhe një çështje që Gjykatën Kushtetuese u shmang. Prej kohësh kemi një situatë absurde, kemi bashki pa kryetar.

Përmes një letre drejtuar Komisionerit Shtetëror të Zgjedhjeve kam kërkuar informacion kush janë saktësisht ato bashki në të cilat përgjatë kësaj periudhe 30 qershor 2019- janar 2022 ku kryetarëve u ka përfunduar mandati në mënyrë të parakohshme është shkaku ligjor dhe ku është  e domosdoshme organizmi i zgjedhjeve të pjesshme”, tha Meta.

Presidenti tha se nuk ka nevojë të konsultohet me askënd pasi këto janë zgjedhje lokale dhe jo të përgjithshme. Kujtojmë se për zgjedhjet lokale e 30 qershorit Presidenti ka treguar më herët një takim me Bashën në Gjermani, ku ky i fundit i ka kërkuar të shtyjë zgjedhjet e 30 qershorit.

“Basha erdhi në Gjermani, dhe iu lut presidentit, duke iu përgjëruar, me lot në sy që presidenti të anulonte protestën e opozitës në 8 qershor por edhe të shtynte zgjedhjet”, deklaronte Meta disa javë më parë, ndërsa sot njofton nisjen e procedurave për zgjedhjet e pjesshme vendore në kulmin e tensioneve brenda Partisë Demokratike.

Ky hap i presidentit në fakt duket si një beteje e re mes Bashës dhe Berishës, pasi duke patur parasysh përplasjet mes tyre natyrshëm lind pyetja se cila PD do të regjistrohet në këto zgjedhje, ajo e përfaqësuar nga Basha apo ajo e Berishës.

Konstitucionalisti Kristaq Kume ka sqaruar në ‘Zona Zero’ në Top Neës këtë pikëpyetje dhe thotë se në KQZ duhet të regjistrohet PD e përfaqësuar nga Basha, pasi ai njihet deri më tani nga Gjykata pasi ka vulën dhe selinë.

"Ligjërisht është Basha, ai që ka vulën figurative dhe institucionale, ai që në KQZ e pret e i merr propozimet e tij për kandidatët. Edhe grupimi tjetër mund të përfaqësohet por jo si subjekt politik, por me qytetarët, pa parti. Unë nuk shoh rrugë tjetër", tha Kume.

Kujtojmë se beteja mes tyre është në gjykatë. Komisioni i Rithemelimit të PD ka depozituar sot në Gjykatë për regjistrim ndryshimet statutore të votuara në Kuvendin e 11 dhjetorit (thirrur nga Sali Berisha).

po ashtu, edhe Lulzim Basha ka depozituar pranë Gjykatës së Tiranës kërkesën për pasqyrimin e ndryshimeve të statutit të partisë dhe organeve të reja, të zgjedhura në Kuvendin Kombëtar të datës 17.07.2021. Gjykata e Tiranës ka regjistruar çështjen dhe tashmë pritet shqyrtimi i saj gjyqësor në bazë të ligjit.

Vakancat në bashki

Shkodra ishte bashkia që do të krijonte precedentin e parë të drejtimit pa kryetar. Në zgjedhjet lokale të qershorit 2019, për shkak se prekej nga ligji i dekriminalizimit, Valdrin Pjetri dha dorëheqjen nga marrja e detyrës.

Ndaj, në krye të Bashkisë vijon të jetë Voltana Ademi, mandati i së cilës ka përfunduar prej 2 vitesh. Saga e bashkive pa kryetar do të vazhdonte më pas me Durrësin. Pas një deklarate të pamatur, pak ditë pas tërmetit tragjik të 26 nëntorit kryetarja Valbona Sako dha dorëheqjen nga posti, për t’u zëvendësuar me Emirjana Sakon.

E radhës eshte Bashkia e Vorës, ku shkak do të bëhej sërish ligji i dekriminalizimit, i cili do të prekte kryetarin e saj, Agim Kajmaku. Ky i fundit u zëvendësua nga Gentian Picari. Ndarja nga jeta e kryetarit të Bashkisë Rrogozhinë, Haxhi Memolla, do të vendoste në krye të këtij institucioni nipin e këtij të fundit, Edision Memollën.

Ndërsa në zgjedhjet parlamentare të 25 prillit, kryetari i Bashkisë Dibër, Dionis Imeraj, do të garonte për deputet, ndaj karrigen e tij në krye të Bashkisë e zuri Shkëlqim Murrja.

I fundit që do të mbyllte sagën e bashkive pa kryetar ishte kryebashkiaku i Lushnjës, Fatos Tushe, i cili u shkarkua nga Kryeministri Rama, pasi u arrestua për korrupsion nga SPAK-u. Vendin e tij e zuri nënkryetarja e Bashkisë, Eriselda Sefa.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm