'Ca të nënës e ca të njerkës', pse për Benet Becin drejtësia nuk vihet në peshore

Kreu i bashkisë së Shkodrës Benet Beci është vënë zyrtarisht nën akuzë, në mes të muajit prill, pra pak javë javë para zgjedhjeve të përgjithshme të 11 majit.

Në një dokument të publikuar së fundmi edhe në media, dukshëm zyrtari socialist Beci bashkë me 6 të tjerë akuzohen për kryerjen e veprës penale “Shkelja e barazisë së pjesëmarrësve në tendera apo ankande publike”, në bashkëpunim.

Në dokument nënvijëzohet se nga hetimet rezultoi se “Korporata Elektroenergjitike Shqiptare” sh.a, me datë 18.12.2019, ka zhvilluar procedurën e prokurimit me objekt: “Zhvillimi Strategjik i Sektorit Energjitik (Projekt Kërkimor) me fond limit 69,500,000 (gjashtëdhjetë e nëntë milion e pesëqind mijë) lekë.

Me pak fjalë, për këtë hetim ndaj Becit jo vetëm nuk ka pasur asnjë njoftim nga SPAK para zgjedhjeve, por as nuk janë marrë masa, pasi SPAK e ka marrë atë të pandehur zyrtarisht që në tetor të 2024, si i akuzuar për veprën penale të 'Shkeljes së barazisë në tendera'.

Pavarësisht këtij fakti, Beci vazhdon të ushtrojë i lirë detyrën e tij në krye të bashkisë duke mos u penguar nga autoritetet, te cilat ndryshe kanë vepruar me emra të tjerë të rëndësishëm të politikës si kryebashkiaku Erion Veliaj apo Presidenti i PL, Ilir Meta.

Ata tashmë prej disa muajsh ndodhen në qelitë e paraburgimit, ndonëse për ta nuk është komunikuar akuza zyrtare. 

Konkretisht:  

Kreu i Partisë së Lirisë, Ilir Meta i cili ndodhet në paraburgim që prej 21 tetorit 2024 .

Në dosjen hetimore të SPAK prej 176 faqesh që çoi në pranga ish-Presidentin Meta dhe vuri në akuzë 3 të tjerë, Prokuroria e Posaçme shprehet se janë vërtetuar veprat penale korrupsion, pastrim parash dhe mosdeklarim pasurie në disa raste. Së pari, për marrëveshjen e CEZ me DIA, SPAK thotë se ka administruar prova se Meta në kohën që ka qenë ministër i Ekonomisë dhe Energjetikës ka përfituar para në formën e korrupsionit nga biznesmeni Kastriot Ismailaj, në cilësinë e administratorit të kompanisë DIA.

Sipas prokurorisë ka përgjimeve të realizuara vite më parë, mes të cilave 1 në vitin 2009. SPAK, shprehet se Meta përmes një sms-je i kërkon biznesmenit, Ismailaj para. Marrëdhënia e ngushtë mes tyre sipas organit të akuzës provohet dhe nga udhëtimi i tyre drejt Çekisë, atje ku SPAK ka dyshimet se ka nisur marrëveshja mes CEZ dhe DIA.

Një tjetër çështje në dosjen hetimore, është dhe ajo e shpenzimeve mjekësore të ish-çiftit, Ilir Meta dhe Monika Kryemadhi, në vlerën e rreth 106 mijë eurove, para këto që nuk janë deklaruar prej tyre. Këto shpenzime janë zbuluar nga SPAK dhe janë pasqyruar në dosjen voluminoze. Gjithashtu, shpenzime të tjera të reflektuara në materialin hetimor, është dhe pagesa prej 400 mijë dollarësh e kryer nga LSI për lobim në SHBA, por që nuk është bërë përmes llogarive të LSI-së.

Mes episodeve që SPAK pretendon se ish-Presidenti ka konsumuar veprën penale të korrupsionit dhe pastrimit të parave është ndërhyrja në kohën kur ishte Kryetar Kuvendi për futjen në tregun e fibrave optike të një kompanie private si dhe blerja e një duplexi në zonën e ish-Bllokut. Këto akuza të ngritura nga SPAK, vetë ish-Presidenti, Ilir Meta i ka hedhur poshtë dhe i ka cilësuar politike dhe sipas tij ndodhet në qeli pa akuzë dhe gjyq.

Nga ana tjetër, edhe kryetari i Bashkisë së Tiranës, Erion Veliaj është arrestuar me urdhër të Prokurorisë së Posaçme Kundër Korrupsionit dhe Krimit të Organizuar (SPAK) prej 4 muajsh.

Kujtojmë se oficerët e BKH-së zbarkuan në zyrën e kryebashkiakut të Tiranës më 10 shkurt për ta shoqëruar në ambientet e prokurorisë. Veliaj u la në burg më datë 12 shkurt me vendin të Gjykatës së Posaçme Antikorrupsion (GJKKO) i akuzuar për konsumimin e veprave penale “Korrupsion pasiv i funksionarëve të lartë shtetërorë ose të zgjedhurve vendorë” si dhe “Pastrim i produkteve të veprës penale ose veprimtarisë kriminale”.

Vlen të theksohet se këto vepra penale dyshohen se janë konsumuar plot 9 herë nga çifti Veliaj – Xoxa, kjo e fundit me 3 akuza zyrtare, të cilat janë: “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë), “Pastrimi i produkteve të veprës penale ose veprimtarisë kriminale”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.