Dakordësia për t’i dhënë fund kaosit në Kuvend, si u tërhoq Rama nga ultimatumi ‘nuk negociojmë me non-gratat’

Demokratët dhe socialistët u ulën së bashku sot në Konferencën e Kryetarëve, duke arritur në parim dakordësimin për ngritjen e dy komisioneve hetimore; atë për rrjedhjen e të dhënave nga sistemi TIMS dhe për koncesionet në shëndetësi.

Dakortësia do të zyrtarizohet nesër të mërkurën në një mbledhje tjetër ku do të përfshihen në kalendarin e punimeve të Parlamentit nisja e këtyre dy hetimeve parlamentare, ndërsa këmbëngulet që objekti i tyre do të jetë në përputhje me Kushtetutën dhe jo ligjin e ri për komisionet hetimore që ata e kanë ankimuar në Gjykatën Kushtetuese.

Edhe pse zyrtarisht kushti tjetër i demokratëve, ai i riformatimit të Komisionit të Reformës Zgjedhore nuk u pranua, është gjetur një formë që do të nxjerrë jashtë loje Lulzim Bashën dhe Enkelejd Alibeajn.

Pas 21 Marsit kur përfundon mandati i këtij komisioni, nuk do të kërkohet zgjatje e tij pavarësisht nëse do të ketë apo jo një produkt final, por është rënë dakord për një nënkomision parlamentar ku do të diskutohen ligjet që kërkojnë shumicë të cilësuar, përfshirë dhe këtë reformë. Çka pohohet si nga Bardhi dhe nga socialisti Bledi Çuçi.

‘Nuk negociojmë me non-gratat’

Kryeministri Edi Rama teksa ka komentuar situatën e tensionuar në Parlament, muajt e fundit është shprehur i prerë se nuk do të ketë asnjë negociatë me Sali Berishën apo me zëdhënësin e tij, duke iu referuar këtu Gazment Bardhit.

“Së pari ne nuk negociojmë me non gratën dhe me asnjë zëdhënës të non gratës. Këtë e kemi thënë që ditën e parë, nuk është e re.

Non grata dhe zëdhënësit e tij, që kanë marrë përsipër që për një hall krejtësisht personal me drejtësinë e re, të kthejnë parlamentin në një shesh për të bërë përshesh dhe i gëzohen faktit që ndezja deri dhe e flakës në sallën e parlamentit, merr dhenë nëpër gjithë mediat e botës, a thua se kjo sjell gjë tjetër përveç shkarravitjes së imazhit të Shqipërisë, janë në të drejtën e tyre të bëjnë zgjedhjet e tyre”, deklaronte Rama më herët, shprehje që sot nuk ka më vlerë, çka tregon një tërheqje të kryeministrit.

Spiropali: Po respektojmë deputetët!

Ministrja e shtetit Elisa Spiropali e pyetur nëse njohin de facto Rithemelimin si shumicë në Kuvend pas negociatave për kthimin në normalitet, tha për gazetarët se është një parti e marrë peng, por PS po bën detyrën e saj duke respektuar deputetët e zgjedhur nga qytetarët pavarësisht se kush e komandon.  

“Se çmendoj unë për non gratën nuk e them sot, tani që është i mbyllur në shtëpi. Ia kam thënë në sy në kuvend kur nuk ishte i mbyll në 20 metra katrorë të kuvendit, kjo nuk është marrëveshje as me grata as me non grata, kjo është dteyra jonë që kemi bërë me përgjegjësi. Falmujt e radikalizmit ngrihen edhe për të mbuluar cështje partiake, ajo është parti e marrë peng, por deputetët janë të zgjedhur dhe ne i respektojmë.

Ne njohim institucionet, depuetët, ne debatojmë me ta pavarësisht se kush është pas tyre. Unë besoj se sot jemi të gatshëm të themi që deputetët duhet të jenë në kuvend paravësisht çështjeve të drejtësisë që nuk zgjidhen në kuvend”, tha Spiropali.