“Dhuratë për çdo familje”/ Rikthimi i basteve sportive, ç’deklaronte Rama para tre vitesh

Qeveria e drejtuar nga Edi Rama duket se po i hap rrugë riformalizimit basteve sportive, të mbyllura në Janar 2019.

Më shumë se 3 vite më parë, shefi i qeverisë kishte një tjetër qëndrim. Ai deklaroi se ky ves duhej zhdukur pasi shkatërronte familjet.

Megjithatë, sot duket se kryeministri ka ndryshuar mendje lidhur me bastet sportive dhe po konsideron rihapjen e tyre.

Ministrja e Financave dhe Ekonomisë Delina Ibrahimaj, gjatë konferenca mbi treguesit e ekonomisë gjatë 3-mujorit të parë të vitit deklaroi se në fillim të javës së ardhshme do të hidhet për konsultim publik ligji për hapjen e basteve.  

“Ligji parashikon rihapjen e basteve online, jo të të gjitha basteve siç kanë qenë më parë. Ligji do të hidhet për konsultim publik javën e ardhshme. Më pas do të kalojë në Kuvend. Pra, do të ketë tryeze konsultimi me të gjitha grupet e interesit në mënyrë që të arrijmë me një draft ligjor sa më të konsoliduar dhe të parashikojë mbrojtjen sociale për ata kategori që janë të prekura nga ky ligj. Kjo në fakt ishte dhe arsyeja kryesore që e ndaluam këtë gjë", tha ministrja ndër të tjera.

Ç’deklaronte Rama para tre vitesh

Në mesin e vitit 2018, kryeministri Edi Rama, pasi e kishte përgatitur për disa vite terrenin, do të merrte një nga vendimet më të guximshme të qeverisjes së tij, mbylljen e të gjitha lotarive dhe basteve, me përjashtim të një kategorie të caktuar që do të merrnin lishencë kombëtare, siç janë kazinotë e telebingot.

Një nismë, megjithëse populiste, pasi vinte pak muaj para zgjedhjeve lokale të atij viti, ishte e mirëpritur nga shumica e shoqërisë, pasi pikat e basteve që kishin mbirë në çdo cep pallati po shkatërronin individë dhe familje.

Vetë kryeministri në tetor të 2018-ës, në një takim me gratë socialiste do të shprehej se “mbyllja e lotove do të jetë një dhuratë për çdo familje për Vitin e Ri”.

Asokohe, Rama thoshte se bastet janë shumë të përhapura dhe të lidhura me burimet kriminale të financimit.

Në parlament në vitin 2018 kryeministri Edi Rama deklaroi se ishte kundër basteve të çfarëdolloji. “Ama në 1 janar të vitit të ardhshëm ne do ta sanksionojmë këtu në parlament nuk ka më asnjë lloj basti, nuk ka më asnjë lloj kazinoje elektronike në asnjë zonë të banuar”, pohoi Rama në parlament në 18 tetor të vitit 2018.

Por në gusht të vitit të kaluar kryeministri Rama ndryshoi mendim dhe po rikthen aktivitetin e basteve për të cilat pohoi se kanë lulëzuar gjithë këto vite në të zezë.

“Por nëse e shohim përpara se ku duhet të jemi sot si nata me ditën edhe mua më bën të prirur për të qenë i hapur ndaj kësaj zgjidhje sepse është gjynah që kjo veprimtari të zhvillohet nga duart e njerëzve që shkelin ligjin dhe kanë figuruar aktiv dhe përfitime krejt të paarsyeshme, element me profil të lartë të krimit të organizuar.”, tha Rama në 31 gusht të 2022-it.

Shifrat

Sipas të dhënave zyrtare, në buxhetin e shtetit të ardhurat nga lojrat e fatit në vitin 2018, viti i fundit para së të mbylleshin, ishin rreth 55 milionë euro, dhe një vit më pas, pasi ishin mbyllur, të ardhurat ranë me 43 milion e 400 mijë euro ose me rreth 80%. Ndikimi i tyre në buxhet sipas ekspertëve, edhe pse në kushte informaliteti të lartë, ishte i konsiderueshëm, ndërkohë që mbi 7 mijë qytetarë humbën edhe vendet e punës.