Dritëhijet e një ish-ministri që mund të drejtojë komisionin anti-korrupsion

Sot u zbardh përmbajtja e draftit të propozuar nga Partia Socialiste për mirëqeverisjen dhe thellimin e anti-korrupsionit, i cili mori 67 vota të PS në seancën e së hënës në Kuvend.

Drafti për këtë komisionin është përcaktuar në rendin e ditës për seancën e nesërme të Kuvendit, por mund edhe të shtyhet për shkak se opozita ka paralajmëruar se do ta bojkotojë votimin.

Komisioni i Posaçëm do të përbëhet nga 11 anëtarë, nga të cilët 6 janë përfaqësues të shumicës parlamentare dhe 5 të opozitës, përfaqësues të pakicës parlamentare, megjithatë demokratët kanë qenë të unifikuar në qasjen kundër komisionit antikorrupsion të kërkuar nga mazhoranca.

Ndërkohë emri i deputetit socialist, ish ministrit të Brendshëm, Fatmir Xhafaj është një nga emrat që përflitet por vetë ai i pyetur për Report Tv as nuk e ka mohuar e pohuar. 

Dritëhijet e ish-ministrit Xhafaj

Në një kohë kur Fatmir Xhafaj, drejtonte ministrinë e Punëve të Brendshme dhe kishte në kontroll të rreptë Policinë e Rendit dhe atë Kriminale, skandali i plasi pikërisht në familje.

Kjo pasi vëllai i tij, Geron alias Agron Xhafaj, rezultonte i dënuar në Itali me 7 vjet e 2 muaj burgim për akuzën e “Trafikut të drogës” kryer në bashkëpunim dhe pjesëmarje në grup kriminal.

Në atë kohë u krijua një bindje e habitshme se si ministri i Brendshëm Fatmir Xhafaj që kontrollonte të gjithë aparatin e policisë kriminale, nuk ishte në gjëndje të arrestonte vëllain e tij, që partnerët e tij italianë e kërkonin për ta futur në burg.

Historia me audio-përgjimin e famshëm ‘Babalja’ ku u përfol se përfshihej vëllai i tij Agron (Geron) Xhafaj, largimi më pas vullnetar i këtij të fundit në Itali për të vuajtur dënimin që kishte në shtetin fqinj, ishin momenti më delikat në krye të këtij posti.

Sikur të mos mjaftonte kjo, familja Xhafaj tronditet sërisht nga vetëvrasja e gardistit personal, brenda ambjenteve të Gardës së Republikës.

Ndërkohë nga ana tjetër edhe pas largimit nga posti i ministrit, Xhafaj u kujdes që pusulla e oficerëve të Operacionit Forca e Ligjit, të mos shkonte në adrresën e Geron Xhafaj dhe familjarëve të tij.

Kujdo krimineli i shkoi pusulla e OFL-së, çuditërisht asnjë letër dhe asnjë verifikim mbi pasurinë e Geron Xhafaj dhe familjarëve të tij nuk u krye.

Ky rast tregoi më së miri që operacioni OFL,veproi me dy standarte .

Megjithatë, Xhafaj dhe anëtarët e tjerë ende nuk janë zyrtarizuar si pjesë e këtij komisioni që ka ndezur debate mes mazhorancës dhe opozitës.