E PLOTË/ Salianji rrëfen për herë të parë nga qelia: Privimin e lirisë nuk ta rrok mendja kur e ke, por e ndjen në pore kur ndodh

Prej 7 muajsh, thotë se sheh vetëm ngjyrën gri të betonit, një dritë elektrike, por edhe atë me orar, kurse portat i dëgjon teksa  hapen e mbyllen rëndshëm me shul të hekurt. 

Kështu e përshkruan izolimin ish-deputeti Ervin Salianji, i cili e rrëfen për herë të parë në një intervistë EKSKLUZIVE për POLITIKO.AL.

Prej shtatorit të vitit të kaluar po vuan dënimin në Burgun e Fierit për ‘kallëzim të rremë’ lidhur me për audio-përgjimin e dosjes 'Babale', ndëshkim të cilin ai e konsideron të motivuar politikisht dhe hakmarrje nga ana e mazhorancës për shkak të denoncimeve të vazhdueshme ndaj qeverisë dhe ministrave.

Salianji nuk i fsheh emocionet teksa përshkruan se si po e përjeton nga qelia për herë të parë një fushatë elektorale, betejë që ai e ka drejtuar disa herë në terren.

Madje, Salianji thekson se ashtu siç pati premtuar para arrestimit, do të bëjë fushatë edhe nga qelia e burgut, pavarësisht kufizimeve që has në kushtet e izolimit. 

Një moment me rëndësi gjatë kësaj bisede ishte edhe asistimi i strategut amerikan Chris LaCivita në fushatën e opozitës. Salianji i thotë Politiko.al se strategjitë e tij të importuara nga SHBA në fushatën e Partisë Demokratike janë një ngjarje e madhe për Shqiperine e vogël.

Intervista e plotë: 

Z. Salianji, prej shtatorit të muajit të kaluar ndodheni në izolim. Si ka qenë kjo periudhë për ju?

Po, janë 7 muaj, shtatë muaj mes mureve e dyerve, hekurave që cijasin e fiksjes së dritave me orar, e portave me shul të rëndë dhe ngado të rrotullohesh, sheh grinë e betonit.
Privimin e lirisë nuk ta rrok mendja kur e ke, por e ndjen në pore kur ndodh. Prandaj është shkruar e percaktuar me ligj, që privimi nga liria, është privim nga një prej të drejtave më të qënësishme të njeriut.
Izolimi është formë ekstreme e dënimit ndermerret kryesisht për vepra të rënda penale, për ata që kane vrarë, rrezikuar jetë njerëzore padrejtesisht, e krime të tjera të mynxyrshme.

E veç izolimit ekstrem ndjehet po aq ndjesia e padrejtesisë ekstreme. Në rastin tim opinioni publik ashtu si dhe une vetë ende nuk e di kush është krimi për të cilin më dënuan. Reflektoj gjatë mbi këtë absurd, dhe ky reflektim e di që është edhe një pjese e fitores sime.
Kjo sepse me burgosjen time, u tentua që të ngrihej muri i frikes për të tjerët, qe askush mos të guxonte, ta mbyllte, ta kycte e ta therrmonte me dhembe të vërtetën e Shqiperisë se krimit, ndryshe e bluante krimi i pushtetshem.

Ky ishte dhe është qellimi i denimit, une kete e di. Siç edhe di që pikerisht me burgosjen time, ata që deshën ta mbysin të vërtetën u përballen me të kundërtën. Sot, më shumë se dje në liri, shqiptaret që ndjekin politikën e dinë këtë padrejtësi si drita e diellit.
Mbetet që, dënimi u krye pa ligj, pa një gjykatë të pavarur dhe paanshme siç e parashikon Kushtetuta, dhe akoma më keq me një dëshmitar të provuar si të blerë nga drejtuesit e lartë të policisë së shtetit, me urdhrin e Fatmir Xhafaj dhe bekimin e më pas ndërhyrjen e Edi Ramës, me një vendim gjykate që po ta lexosh është pike e presje cfare ka thënë Rama në publik nga dita e parë e publikimit të skandalit e deri në kërcënimet në parlament apo konferenca shtypi. Ngado ta kapësh procesin që u bë ndaj meje, është një katastrofë juridike, një turp gjyqësor.
Në Shqiperi, thuhet që gjema më e madhe zgjat tre dite, e kjo kujtesë e shkurter mund t’i vlejë vetem një personi, atij që merr pushtet për të shtypur 3 milion njerëz me thundren e perdhunës.
Do ta them me theks të perhershëm që Vepra penale me të cilën u akuzova dhe u denova, është tërësisht e motivuar politikisht.

Pra, nuk jam në burg as se kam përfituar, abuzuar, vjedhur apo dëmtuar interesat e shoqërisë dhe interesin e publikut, por për të kundërtën, sepse kam mbrojtur interesin publik. Jam në burg sepse denoncova lehtësimin e trafikut të drogës nga ish-Ministri i Brendshëm dhe mbrojtjen qe i bente ai, një të denuari me 7.4 vite burg në Itali per trafik ndërkombetar droge.

Diten e denoncimit tim, pothuajse 10 vite nga dhënia e denimit, Agron Xhafaj u dorëzua në Itali për të shlyer atë që po i bishtnonte prej mbrojtjes që gëzonte nga i vëllai. Në qindra denoncime që kam bërë, ky ka qënë me efektivi. Brenda dites u faktua, dhe shoqeria perfitoi sepse një trafikant ndërkombëtar droge, i arrestuar në një operacion ku mori pjesë dhe DEA amerikane, qendronte në liri. Pas denoncimit tim, u dorezua në burg, dhe pak ditë me pas, vellai i vet që i jepte mbrojtje në detyrën e Ministrit të Brendshëm, në konflikt të tmerrshëm interesi, dha dorëheqjen nga detyra.
Denimi ndaj meje, për këtë vepër është i pari që jepet në Shqipëri, është i paprecedentë. Çka e ben teresisht politik.

Si çdo i burgosur politik, këto muaj kanë qënë një përvojë e vështirë, për shkak të kushteve të veçanta që lidhen me heqjen e mandatit të deputetit, me heqjen e lirisë, me ndalimin e kandidimit për zgjedhjet e 11 Majit, të gjitha për shkak se jam kundërshtar i atij që gjithnjë e më shumë njihet si regjimi i Edi Ramës, për shkak se i kam mundur në disa beteja e zona elektorale ku unë kam qënë drejtues.
Përpos brengës së izolimit të padrejtë dhe dorezimit në burg pa arsye, kam ndjere e ndjej fuqinë e madhe të solidaritetit nga qytetarët, media, shoqeria civile, klasa politike. Kjo më ka motivuar më shumë për të shpresuar e punuar për NDRYSHIM, për një shoqëri me të drejtë.
Kam qënë e jam në reflektim të thellë për gjithçka ndodh në skenën politike e në mundesitë që qytetaret duhet të kenë per të rikthyer besimin.

Sic e dini, vendi është zyrtarisht në fushatë elektorale, por këto janë zgjedhjet e para që ju gjejnë në izolim. A ju mungon ky moment? Si po e përjetoni?

Më mungojnë shumë, është pasion i madh për mua e tanimë duket se është kthyer në një mision, prej të cilit nuk shpëtoj dot, edhe për shkak të rrethanave! E përjetoj me emocion të fortë, me dhimbjen e madhe të mungeses, me zemërimin e pamundësisë për të qënë kudo e në çdo cep, siç jam unë në zgjedhje, me revoltën e pengimit për të shprehur e ndarë mendime e opinione, për të takuar njerëz e për të biseduar me këdo. Zgjedhjet, betejat elektorale, janë habitati im. Thjesht, më kanë ndaluar me forcë të jem në ambjentim tim natyral e për të kontribuar për një Shqiperi më të mirë e për një shoqeri të lire!

Gjatë emisionit “Top Story” ku ju ishit ftuar para arrestimit tuaj, paralajmëruat se do të bëni fushatë edhe nga burgu. Çfarë strategjie do të përdorni për të komunikuar me elektoratin
tuaj nga burgu?

Mundesitë nga këtu, janë shumë të kufizuara sidomos kur kemi parasysh potencialin që ka fushata në terren, por gjithsesi perpjekjet e mia kanë vazhduar nepermjet komunikimeve përmes avokatit që postohen më pas në rrjete sociale dhe media, e me letra drejtuar miqve e mbeshtetesve. Me takimet me deputetët, drejtuesit e opozitës e komunikime e ndarje mendimesh me ta.

Nuk kam një rol qendror në fushatë dhe përgjegjesi konkrete por ndjej se kam një rol edhe më të madh si zë publik, si politikan i së djathtës dhe si njeri që mu grabit mandati dhe angazhimi politik, qartazi për shkak se do isha fitues ne Elbasan, siç më parë isha në Korçë e Kavajë. Siç po duket qartë qëllimi ka qënë shmangia nga beteja politike!

A mendoni se fushata juaj nga burgu do të ketë ndikim të njëjtë si një fushatë tradicionale?

Fushata më e madhe që unë bëj, është se jam dëshmi e pakontestueshme, e gjallë, e përndjekjes politike, e një sistemi të degjeneruar totalisht në duart e një autokrati. Çdo ditë që unë kaloj këtu, është një denoncim.
Shpresoj dhe mendoj që kjo do ketë ndikim. Edi Rama e organizoi farsën për të më mbyllur gojën, por njerëzit kanë parë që nuk jam dorëzuar.

Me qendrimet e mia, dua të inkurajoj reagimin, qendresën, kurajon për të përballuar qeverisjen e keqe, të korruptuar e të lidhur me krimin.
Jam i bindur se me 11 Maj, qytetarët do të votojnë për një Shqipëri Europiane. Shqipëria Europiane është ajo ku vlerat e padiskutueshme të shtetit të së drejtes, te garancive kushtetuese për të drejtat dhe liritë themelore, nuk vihen më në provë, dhe jo ajo përralla me pasaportë që thuhet nëpër sheshe. Edi Rama dhe qeverisja e tij janë e kundêrta absolute e çdo vlere europiane, me Edin shkohet në despotizëm, ne rotacion dhe shtet me ndarje e balancim pushtetesh shkohet në Evropë!

Si e vlerësoni rolin e strategut amerikan Chris LaCivita dhe strategjitë e tij të importuara nga SHBA në fushatën e Partisë Demokratike?

Eshtë padyshim ngjarje e madhe për Shqiperine e vogël që kryestrategu i fushatës së Presidentit të SHBA të jetë në Shqiperi i angazhuar, e padiskutim shtysë e madhe për demokratët e Partinë Demokratike që kane fatin të kenë keshillat, komtaktet dhe eksperiencen e tij të jashtëzakonshme.

Unë kam ndjekur mesazhet e tij, dhe theksi që ka vënë për zgjedhje të lira e të ndershme dhe për të mos lejuar përndjekjen e kundërshtarit nga qeveria, janë fjalët që i duhen vendit e gjithë qytetarëve, jo vetëm demokratëve.
Prania e tij, është një shtysë qoftë në ndryshimin e perceptimit për opozitën, por siç duket qartë dhe në fushaten ndryshe, konkrete dhe të orientuar drejt shqetesimeve dhe problemeve të perditshme të qytetareve; drejtësia, ekonomia dhe shteti ligjor.

Si mendoni se ndikon denimi juaj në perceptimin publik të Partise Demokratike dhe në besimin e elektoratit?

Thuajse nuk ka pasur studio, analistë, gazetarë apo parti politike në aleancë apo në kundërshti me Partine Demokratike që të mos jenë bashkuar ne idenë e perdorimit politik të drejtesise për burgosjen time. Kjo, i ka dhënë në kuptimin politik një aset opozites për të ritreguar dhe bindur shqiptaret dhe ndërkombëtarët që ky regjim përdor çdo mjet kundër atyre qe nuk i blen dot, nuk i mund e nuk i mposht dot.

Nëse qellimi i qeverise ka qënë frikesimi i qytetarëve, opozitareve apo gazetareve që denoncojne, ky denim dha efektin e kundert. Çdo matje e opinionit apo sondazh tregon që denimi cilësohet politik dhe në vend të demtimit të reputacionit, më dhanë një medalje ari në mbrojtjen e interesit publik

Ju jeni dënuar për ‘Kallëzim të rremë’ lidhur me dosjen ‘Babale’. A do t’i vazhdoni denoncimet tuaja edhe pas përfundimit të dënimit tuaj?

Denimi im është politik, i montuar dhe pa asnjë bazë. Denoncimi i çështjes Xhafaj u faktua si i vërtetë dhe trafikanti nderkombetar i drogës, pas ndalimit në një operacioni të DEA-s amerikane, u dorëzua ditën që bera denoncimin.

Kallezim të rremë s’kam si të kem, se nuk kam bërë kalllezim fare, por denoncim publik nga selia e Partisë Demokratike si deputet dhe Sekretar i Aksionit Qytetar në parti.
Jo vetëm që do t’i vazhdoj denoncimet por dhe nga qelia me kufizimet që kam, kam depozituar kallezime të ndryshme në prokurori dhe do ta denoncoj dhe me fort çdo abuzim, keqtrajtim apo vjedhje që demton interesat e qytetarëve dhe që nxin Shqiperinë. Sigurisht që do të vazhdoj të flas, të denoncoj, të ngre zërin.

Përgatiti: Suela Gjidede-Politiko.al