EKSKLUZIVE/ Salianji flet nga qelia: 7 muajt e izolimit mes portave me shul të rëndë dhe dritave me orar

Prej 7 muajsh, thotë se sheh vetëm ngjyrën gri të betonit, një dritë elektrike, por edhe atë me orar dhe dëgjon portat që hapen e mbyllen rëndshëm me shul të hekurt. 

Kështu e përshkruan izolimin ish-deputeti Ervin Salianji, në një intervistë EKSKLUZIVE për POLITIKO.AL, i cili prej shtatorit të vitit të kaluar po vuan dënimin në Burgun e Fierit, ndëshkim të cilin ai e konsideron të motivuar politikisht dhe hakmarrje nga ana e mazhorancës për shkak të denoncimeve të vazhdueshme ndaj qeverisë dhe ministrave.

Ai thekson që në krye të herës se 'privimin e lirisë nuk ta rrok mendja kur e ke, por e ndjen në pore kur ndodh'. 

"Po, janë 7 muaj, shtatë muaj mes mureve e dyerve, hekurave që cijasin e fiksjes së dritave me orar, e portave me shul të rëndë dhe ngado të rrotullohesh, sheh grinë e betonit.
Privimin e lirisë nuk ta rrok mendja kur e ke, por e ndjen në pore kur ndodh. Prandaj është shkruar e percaktuar me ligj, që privimi nga liria, është privim nga një prej të drejtave më të qënësishme të njeriut.
Izolimi është formë ekstreme e dënimit ndermerret kryesisht për vepra të rënda penale, për ata që kane vrarë, rrezikuar jetë njerëzore padrejtesisht, e krime të tjera të mynxyrshme. E veç izolimit ekstrem ndjehet po aq ndjesia e padrejtesisë ekstreme. Në rastin tim opinioni publik ashtu si dhe une vetë ende nuk e di kush është krimi për të cilin më dënuan. Reflektoj gjatë mbi këtë absurd, dhe ky reflektim e di që është edhe një pjese e fitores sime.
Kjo sepse me burgosjen time, u tentua që të ngrihej muri i frikes për të tjerët, qe askush mos të guxonte, ta mbyllte, ta kycte e ta therrmonte me dhembe të vërtetën e Shqiperisë se krimit, ndryshe e bluante krimi i pushtetshem. Ky ishte dhe është qellimi i denimit, une kete e di. Siç edhe di që pikerisht me burgosjen time, ata që deshën ta mbysin të vërtetën u përballen me të kundërtën. Sot, më shumë se dje në liri, shqiptaret që ndjekin politikën e dinë këtë padrejtësi si drita e diellit.
Mbetet që, dënimi u krye pa ligj, pa një gjykatë të pavarur dhe paanshme siç e parashikon Kushtetuta, dhe akoma më keq me një dëshmitar të provuar si të blerë nga drejtuesit e lartë të policisë së shtetit, me urdhrin e Fatmir Xhafaj dhe bekimin e më pas ndërhyrjen e Edi Ramës, me një vendim gjykate që po ta lexosh është pike e presje cfare ka thënë Rama në publik nga dita e parë e publikimit të skandalit e deri në kërcënimet në parlament apo konferenca shtypi. Ngado ta kapësh procesin që u bë ndaj meje, është një katastrofë juridike, një turp gjyqësor", shprehet Salianji.

Ai përsërit dhe shpreh bindjen se vepra penale me të cilën u dënua është e motivuar tërësisht polititikisht. 

"Në Shqiperi, thuhet që gjema më e madhe zgjat tre dite, e kjo kujtesë e shkurter mund t’i vlejë vetem një personi, atij që merr pushtet për të shtypur 3 milion njerëz me thundren e perdhunës.
Do ta them me theks të perhershëm që Vepra penale me të cilën u akuzova dhe u denova, është tërësisht e motivuar politikisht.

Pra, nuk jam në burg as se kam përfituar, abuzuar, vjedhur apo dëmtuar interesat e shoqërisë dhe interesin e publikut, por për të kundërtën, sepse kam mbrojtur interesin publik. Jam në burg sepse denoncova lehtësimin e trafikut të drogës nga ish-Ministri i Brendshëm dhe mbrojtjen qe i bente ai, një të denuari me 7.4 vite burg në Itali per trafik ndërkombetar droge. Diten e denoncimit tim, pothuajse 10 vite nga dhënia e denimit, Agron Xhafaj u dorëzua në Itali për të shlyer atë që po i bishtnonte prej mbrojtjes që gëzonte nga i vëllai", tregon Salianji nga qelia. 

Ai shton se nga të gjitha denoncimet që ka kryer, rasti i dosjes 'Babale' ka qenë më efektivi. 

"Në qindra denoncime që kam bërë, ky ka qënë me efektivi. Brenda dites u faktua, dhe shoqeria perfitoi sepse një trafikant ndërkombëtar droge, i arrestuar në një operacion ku mori pjesë dhe DEA amerikane, qendronte në liri. Pas denoncimit tim, u dorezua në burg, dhe pak ditë me pas, vellai i vet që i jepte mbrojtje në detyrën e Ministrit të Brendshëm, në konflikt të tmerrshëm interesi, dha dorëheqjen nga detyra.
Denimi ndaj meje, për këtë vepër është i pari që jepet në Shqipëri, është i paprecedentë. Çka e ben teresisht politik.

Si çdo i burgosur politik, këto muaj kanë qënë një përvojë e vështirë, për shkak të kushteve të veçanta që lidhen me heqjen e mandatit të deputetit, me heqjen e lirisë, me ndalimin e kandidimit për zgjedhjet e 11 Majit, të gjitha për shkak se jam kundërshtar i atij që gjithnjë e më shumë njihet si regjimi i Edi Ramës, për shkak se i kam mundur në disa beteja e zona elektorale ku unë kam qënë drejtues.
Përpos brengës së izolimit të padrejtë dhe dorezimit në burg pa arsye, kam ndjere e ndjej fuqinë e madhe të solidaritetit nga qytetarët, media, shoqeria civile, klasa politike. Kjo më ka motivuar më shumë për të shpresuar e punuar për NDRYSHIM, për një shoqëri me të drejtë.
Kam qënë e jam në reflektim të thellë për gjithçka ndodh në skenën politike e në mundesitë që qytetaret duhet të kenë per të rikthyer besimin", thotë Salianji. 

VIJON...

Përgatiti Suela Gjidede