Gjykata Kushtetuese lë në detyrë Metën, si nisi përplasja për shkarkimin e presidentit pas 25 prillit

Presidenti Ilir Meta do vazhdojë të qëndrojë në presidencë deri në korrik të këtij viti, kur dhe mbaron zyrtarisht mandati i tij.

Mbrëmë vonë, Gjykata Kushtetuese ka “rrëzuar” Kuvendin, duke lënë në detyrë presidentin,

Ndryshe nga çfarë pretendoi Kuvendi, gjykata konstaton se presidenti Meta nuk ka kryer shkelje të Kushtetutës dhe se veprimet e tij kanë qenë konform tagrit që i njeh ligji.

“Gjykata Kushtetuese, pasi verifikoi procedurën e ndjekur nga Kuvendi për ngritjen e komisionit hetimor, garantimin e së drejtës së presidentit për t’u dëgjuar dhe për t’u mbrojtur dhe duke mbajtur në konsideratë pavarësinë organizative të Kuvendit, në tërësi konstatoi se nuk ka pasur shkelje kushtetuese gjatë kësaj procedure”, thuhet në njoftimin e Gjykatës Kushtetuese.

Si nisi përplasja për shkarkimin e Metës?

Fill pas zgjedhjeve të 25 prillit vitin e kaluar, deputetët e Partisë Socialiste ngritën një komision hetimor për presidentin Meta, pasi e akuzuan për shkeljen e Kushtetutës para dhe gjatë fushatës elektorale.

Deputetët, pas gjetjeve të komisionit, më 9 qershor të vitit 2021, votuan në favor të shkarkimit të presidentit me 104 vota, duke thënë se ai ka shkelur Kushtetutën e Shqipërisë dhe se “me veprimet, sjelljet dhe mesazhet e dhëna në publik nuk ka garantuar unitetin kombëtar, nuk ka moderuar konfliktin politik, por përkundrazi e ka nxitur atë në terma të tilla, të cilat sollën si pasojë daljen e organizuar të militantëve të partive politike në rrugë duke terrorizuar qytetarët, duke kufizuar lirinë e tyre të lëvizjes si dhe lirinë personale, deri në kryerjen e konflikteve me armë”.

Neni 90 i Kushtetutës së Shqipërisë e parasheh shkarkimin e presidentit nga Kuvendi për shkelje të rëndë të Kushtetutës dhe për kryerjen e një krimi të rëndë.

Sipas këtij neni, propozimi për shkarkimin e presidentit, në raste të tilla mund të bëhet nga të paktën një e katërta e anëtarëve të Kuvendit apo 35 deputetë nga 140 sa i ka Kuvendi i Shqipërisë.

Meta ishte i shfaqur i qetë për këtë proces, duke theksuar se nuk ka shkelur ligjin dhe se do të qëndronte në detyrë deri në përfundim të mandatit kushtetues, që mbaron më 24 korrik.

Gjykata Kushtetuese e Shqipërisë mbylli më 7 shkurt seancën plenare për shqyrtimin e vendimit të Kuvendit, ku palët e përfshira në proces paraqitën pretendimet dhe argumentet e tyre.

Presidenca e Shqipërisë në seancat e Gjykatës Kushtetuese ka mbrojtur qëndrimin se Kuvendi ka shkelur procedura dhe ka depozituar në prokurori kallëzim penal ndaj zyrtarëve të Kuvendit për veprën penale "Falsifikim i dokumenteve".

Ai paralajmëroi se çështjen mund të dërgonte edhe në Gjykatën Evropiane, si institucion mbi atë Kushtetuesen. Kuvendi miratoi më 9 qershor me 104 voto pro shkarkimin nga detyra të Presidentit të Republikës. Meta është presidenti i parë i Republikës që u shkarkua me një nismë të tillë nga Kuvendi.

Meta është zgjedhur president më 28 prill 2017 me 87 vota, me mbështetjen e Partisë Socialiste dhe Lëvizjes Socialiste për Integrim, të cilën e drejtonte vetë Meta.