Intervista/ Boçi në Politiko: Me rikthimin e vulës PD doli nga një rreth vicioz; Basha tashmë renditet pas Jenisherit

Vula dhe logoja e Partisë Demokratike iu rikthyen dje, pas një sage gati tre-vjeçare, grupimit më të madh të opozitës që drejtohet nga Sali Berisha, pasi Gjykata e Apelit vendosi të mos pranojë ankimimin e bërë nga Lulzim Basha, duke lënë në fuqi vendimin e shkallës së parë i cili njohu Kuvendin dhjetorit të vitit 2021.

Lidhur me këtë vendim, ka folur në një intervisëtë në Politiko.al nënkryetari i PD-së, Luçiano Boçi.

Ai thotë se akti i djeshëm shënon fundin e një “loje luftash” cinike e imponuar nga faktorë jashtë PD-së që kërkonin shkatërrimin e saj. 

Ish-deputeti Boçi ka sqaruar se çfarë domethënie ka ky akt për demokratët, ndërsa ka përcjellë një mesazh edhe për ish-liderin e PD, Lulzim Basha.

Sa i rëndësishëm ishte ky vendim në këto momente jo vetëm për PD-në, por edhe për opozitën shqiptare?

Me vendimin e djeshëm mori fund një lloj “loje luftash” cinike e imponuar nga faktorë jashtë PD-së që kërkonin shkatërrimin e saj, por duke përdorur karaktere politike të dobëta brenda PD-së.

PD doli nga një rreth vicioz dhe u shemb ai muri që pengonte komunikimin politik midis demokratëve, miqve dhe njerëzve që kishin luftuar prej vitesh në një llogore, por edhe midis PD demokratike dhe pjesës dërmuese të qytetarëve.

Mbjatja peng e simboleve të PD ka qenë një nga projektet më cinike për të eleminuar dhe dobësuar PD demokratike dhe opozitën, nje padrejstësi e madhe politike e servirur para publikut si një ceshtje juridike e brendshme.

Në fakt, ka qenë një luftë e pastër e një regjimi me pamjen e Narkoshtetit me qëllim revanshin politik dhe zhdukjen e pluralizmit.

Çfarë do të thotë kthimi i vulës dhe logos te PD e Sali Berishës?

Berisha ka qenë lider legjitim dhe pas marrjes së vulës juridike është përgjegjësi e madhe e PD tanimë për t'u paraqitur para elektoratit, akt ky që rikthen besimin te shqiptarët.

Është një gëzim për zgjidhjen e një ngërçi, por gjithashtu është edhe një angazhim total te pjesa drejtuese dhe anëtarësisë për të marrë në dorë drejtimin e vendit.

Ardhja e vulës te PD përkthehet në pranimin e një drejtësie të madhe ndaj tij se sot është lideri i opozitës i vetmi i burgosur për arsye politike në Evropë dhe një situatë e tillë kërkon vazhdimësinë e aksionit politik të PD-së.

Në drejtim të kërkimit të lirisë duhet vijuar me aksionin politik parlamentar për reformën zgjedhore, aksionin për kërkimin e drejtësisë, për të luftuar korrupsionin dhe sikurse vijon, paraqitja e programit të PD që ka nisur të shpaloset para qytetarëve, si në fjalët e Berishës, por edhe në takimet e departamenteve të PD.

Çfarë do të ndodhë me kampin ‘Basha’ pas këtij vendimi?

Duhet ndarë në dy kampe. Së pari, veçojmë demokratët , ish drejtuesit, deputetët që kanë aksionet e tyre brenda PD-së dhe që duhet t’u japin vlerë duke u rikthyer në gjirin e saj, jo duke ua kërkuar me deklaratat mediatike, por duke i ofruar dorën e zgjatur të miqësisë që kemi patrur më parë.

Kujtojmë se kemi bërë beteja e duhet të vazhdojmë te jemi një për të marrë pushtetin dhe drejtimin e vendit që shqiptarët e kërkojnë.

Kampi tjetër janë Basha -Alibeaj, të cilët janë dy figurat që nuk kanë rëndësi se cdo ndodh me ta, pasi e kanë shkruar fatin e tyre politik me vendimet e tyre dhe ndaj PD sepse kanë qenë ata që me inciativat e tyre sollën këtë situatë 3 vjecare në parti.

Pra, kanë vetëpërjashtuar ekzestencën e tyre nga PD. Nga pikëpamja e rëndësisë, Basha renditet pas Jenisherit.

/Politiko.al - S. Gjidede/