Intervista në Politiko/ Koordinatori i PD për votën e Diasporës: Ja tentativat e qeverisë për të manipuluar votën e emigrantëve

Prej 11 janarit platforma online PER ka hapur zyrtarisht aplikimet e emigrantëve që duan të regjistrohen si votues nga jashtë, një risi kjo për zgjedhjet parlamentare të 11 majit të këtij viti. Platforma do të jetë e hapur deri në 4 mars, ndërsa për këtë procesi duket se ka patur interest të lartë nga ana e emigtantëve nga mbarë botën.

Por, si po e përcjell opozita këtë proces, të cilin e cilëson si një moment historik për të ardhmen e vendit.

Ted Kopliku, koordinator i PD për Diasporën në një intervistë në Politiko.al ka treguar hapat që duhet të ndjekin emigrantët që dëshirojnë të jenë të përfaqësuar në 11 maj.

Përpos teknikaliteteve, Kopliku ka vënë në dukje edhe vështirësitë e ndeshura deri tani, apo ku do tentojë qeveria të manipulojë votën e përtej kufirit.

Megjithatë, përfaqësuesi opozitar shprehet optimist se ‘diaspora do jetë ushtria e njerëzve të lirë që do mundë ushtrinë e patronazhistëve që po bëjnë presion mbi administratën edhe në diasporë’.

Nga Suela Gjidede

Pse është e rëndësishme vota e diasporës?

E drejta e votës është një e drejtë kushtetuese që e gëzon çdo shqiptar brenda dhe jashtë vendit. Është e rëndësishme në radhë të parë, që shteti ta sigurojë këtë të drejtë. Diaspora shqiptare, ndër të tjera, është aktore e rëndësishme në ekonominë shqiptare, këto 34 vite demokraci ku ajo është rritur, bashkë me rolin e saj, sidomos në 12 vitet e fundit.

 Është e rëndësishme edhe për një arsye politike, sepse duke qenë larg presionit të regjimit në Shqipëri ata mund të jenë shpëtimtarët e demokracisë e cila është më në rrezik se asnjëherë në periudhën post-komuniste.

Cilat janë hapat që duhet të ndjekë një emigrant që dëshiron të votojë në 11 maj?

Fillimisht duhet një paisje elektronike që ka një kamera për të bërë regjistrimin në platformen PER dhe të tregojë fytyrën gjatë proçesit të regjistrimit bashkë me të dhënat e tjera personale.

Per momentin kusht i nevojshëm për të votuar janë një dokument identifikimi shqiptar në gjendje valide dhe një vërtetim adrese.

Lista e dokumentave të pranuar janë në faqen e KQZ. Partia Demokratike po punon të lehtësojë edhe më tej identifikimin.

 Me fillimin e sesionit të ri parlamentar do kërkohet të bëhet një VKM për të pranuar deri për zgjedhje edhe dokumentë biometrikë jashtë afateve të skadimit apo edhe dokumente të huaj për sa kohë vërtetohet identiteti i shqiptarve që figurojnë në listat e votuesve të KQZ. Kjo pritet për t’u parë javët që vjen nëse do pranohet nga qeveria shqiptare, për t’i lehtësuar edhe më tej votën emigrantëve shqiptar.

Kush është vështirësia që kanë ndeshur shqiptarët në emigracion që kërkojnë përfaqësi?

Vështirësitë janë në përgjithësi të lidhura me moskuptimin e proçesit ose disa defekte teknike (proçesi i fotografisë, editimi i adreses, refuzimi i vendlindjes apo numrit personal), por në përgjithsi proçesi po ecën mirë.

Duhet riprovuar nëse proçesi ngel dhe të dërgohet mail në KQZ për rastet specifike. PD është në ndihmë të këtij proçesi me faqen pd.al/diasporavoton që i shtohet ndihmës që vetë faqja e KQZ jep për proçesin.

Pyetjet dhe përgjigjet e hasura deri tani dhe një ëebsite shumë interaktiv  po shoqëron shqiptarët në të gjithë botën për të bërë regjistrimin në PER për të votuar nga shtetet ku ata jetojnë.

Sa e shikoni dëshirën e diasporës për të votuar dhe sa në favor të opozitës është kjo?

Në ditët e para të regjistrimit ka një interes të lartë për këtë proçes që ndodh për herë të parë në Shqipëri, ndaj shpresoj të vazhdojë me të njejtin ritëm deri me datën 4 mars kur është edhe afati i fundit i regjistrimit.

 Në mendimin tim në një pjesë të madhe diaspora përbëhet nga njerëz që kanë ikur se kjo qeveri ja ka bërë të pamundur jetën këtu dhe për këtë arsye vota e diasporës do jetë votë proteste.

 Ndryshe nga emigrantët e ikur në fillim, për një jetë më të mirë, prej 12 vitesh shqiptarët ikin për shkak të keqqeverisjes.  Kam besim që diaspora do jetë ushtria e njerëzve të lirë që do mundë ushtrinë e patronazhistëve që po bëjnë presion mbi administratën edhe në diasporë.

Sa mundësi ka që vota e emigrantëve të manipulohet?

Ka tentativa fillimisht për të eksportuar presionin nëpërmjet administratës shteterore tek familjarët dhe miqtë e tyre në diasporë. Edhe në këtë tentativë unë besoj që Partia-shtet do arrijë më lehtë se opozita të regjistrojë diasporën, por ajo s’do jetë domosdoshmërisht votë për pushtetin.

Rrezik përbëjnë votimet kolektive, nëse bëhen në formatin e regjistrimet kolektive që pamë në Selanik, ku vetë eksponentë të PS na furnizuan me pamje ku ishin marrë zyra për të bërë proçesin duke vënë në dispozicion të njerëzve të partisë të dhëna sensitive personale. Gjithsesi, PD do ta ndjekë të gjithë proçesin dhe do sigurojë mbrojtjen e çdo vote brenda dhe jashtë vendi.

Ju si opozitë, a keni kontakte me emigrantët për të marrë sugjerime prej tyre, si një moment i ri i Shqipërisë me diasporën?

Eksponentë të lartë të PD janë në takime në të gjithë botën dhe sigurisht që jemi në një fushatë të ngjashme me atë që do bëjmë në Shqipëri pas mbylljes së regjistrimit të Diasporës, por Shqipëria ka marrë përmasat e botës.

Takimet patjetër janë simbolike, sepse takimi me Diasporën është i pamundur në gjithë botën, por ka një ndjeshmëri për sugjerimet e diasporës për ti integruar në ofertën tonë politike për zgjedhjet e 11 majit.

Kjo është një mundësi e mirë për opozitën për të filluar për herë të parë 4 muaj përpara fushatën intensive./Politiko.al/