Kandidojnë në zgjedhjet lokale të 14 majit, deputetët që do të dorëzojnë mandatin këtë javë

Partia Socialiste, aktualisht kontrollon thuajse 100 % të bashkive të vendit, për 4 vjet me radhë, si asnjëherë më parë. Kjo falë një urdhri për bojkot që dha ish kreu i PD, Lulzim Basha në vitin 2019.

Por për të mbajtur drejtimin e Bashkive, mazhoranca socialiste do të përballen në 14 maj me opozitën, në sado pjesë të jetë e ndarë ajo.

Komisioni Qendror i Zgjedhjeve ka njoftuar se në 27 mars përfundon regjistrimi i kandidatëve, ndërsa në 14 prill fillon fushata zgjedhore për zgjedhjet vendore në vend.

Edi Rama ka konfirmuar rikandidimin e disa kryebashkiakëve, ndërsa po studion përmes sondazheve kandidatët e tjerë. Në selinë blu, Sali Berisha ka shpallur kandidatët përmes një procesi të quajtur “primare”, ndërsa grupi i Enkelejd Alibeajt është zotuar të dalë me skuadrën e vetë në garë.

Ajo që vlen për t’u theksuar në këtë garë është edhe fakti se disa nga kandidatët pritet të lënë ulësen e parlamentit dhe të kandidojnë për drejtimin e bashkive përkatëse.

Kështu, nga PD, për bashkinë kryesore, Tiranan kandidon Belind Këlliçi. Pas dorëzimit të mandatit, në vend të tij pritet të shkojë në Kuvend Asllan Dogjani.

Luciano Boci pritet të dorëzojë mandatin për të garuar në Elbasan. Vendin e tij pritet ta zërë Qani Xhafa.

Zef Hila, u prezantua pak ditë më parë nga Berisha për bashkinë e Vaut të Dejës. Ludovik Hasani pritet të pasojë vendin e tij parlamentar.

Edhe PS ka ‘skrifikuar’ dy deputetë për 14 majin.

Deputeti Besjan Ajazi që do të garojë për Gramshin dhe në vend të tij sipas listave vjen  Shkëlqim Bullarin.

Benet Beci po i PS-së, kandidon në Shkodër dhe ky largim pritet të rikthejë në parlament Ilir Beqajn