Këshilltar i Trump dhe autor i 15 librave, kush është amerikani që vizitoi Berishën në selinë e PD

Kryetari i PD-së, Sali Berisha zhvilloi dje një takim me aktivistë dhe përfaqësues nga Shtetet e Bashkuara të Amerikës, Dr. Jim Garlow si dhe Dr. Jim Johnson shoqëruar nga bashkëshortet e tyre.

Përmes një postimi në faqen e tij në Facebook, Berisha shkroi se me ta shkëmbeu diskutime mbi zhvillimet më të fundit në Kosovë, influencën që rrjeti Soros ka shtrirë në Shqipëri si dhe për mega-skandalin Rama/McGonigal.

Por, kush është në të vërtetë autori amerikan  Dr. Jim Garlow?

Referuar mediave amerikane, Dr. Garlow është autor i 15 librave, komentator, historian dhe aktivist i besimit dhe lirive i cili ka shërbyer gjatë jetës së tij si Pastor në SHBA.

Dr. Jim Garlow njihet edhe si vëzhgues kulturor dhe Pastor i Lartë i Kishës Skyline Wesleyan në zonën e San Diego, CA. Ai dëgjohet çdo ditë në mbi 800 radio në mbarë vendin si NBC, ABC, CNN, Fox, MSNBC, CNBC etj në komentin një minutësh të quajtur "Perspektiva Garlow".

Garlow ka bërë gati 1,100 intervista në radio, TV dhe shtyp - kombëtare dhe lokale - duke mbuluar një gamë të gjerë temash: historike, teologjike, politike, liri fetare, martesë dhe çështje familjare dhe tendenca kulturore.  

Që nga viti 2011, Garlow ka shërbyer si Kryetar Kombëtar i Iniciativës së Foltores, i cili drejton të Dielën e Lirisë së Foltores - një lëvizje që përfshin pastorë në të gjithë Amerikën së bashku me avokatë që fokusohen në çështjet e lirisë fetare.

Dr. Garlow është  autor i librit “Well Versed” i përkthyer së fundmi në gjuhën shqipe.

Ka shkruar libra të shumtë, duke përfshirë bestsellerin e The New York Times, "Cracking Da Vinci's Code" dhe "The Blood Covenant".

Ai ka qënë gjithashtu anëtar i Bordit Këshillues të Besimit të ish-Presidentit Amerikan, Donald Trump dhe mbetet një nga mbështetësit e rëndësishëm e vokal të të djathtës amerikane.

Jim ishte i martuar me gruan e tij të ndjerë Carol Garlow për 42 vjet para vdekjes së saj. Në vitin 2014, ai u martua me Rosemary Schindler. Së bashku ata kanë tetë fëmijë dhe nëntë nipër e mbesa.