Nga njohja në moshën 17-vjeçare te përplasjet në dyert e SPAK, si përfundoi në divorc pas 3 dekadash çifti Meta-Kryemadhi

26 vjet pasi Monika Kryemadhi i tha "po" në Bashkinë e Tiranës me dëshmitar Erion Braçen, Ilir Meta njoftoi mbrëmë divorcin me të.

Meta-Kryemadhi njihet si një prej çifteve më të rëndësishme të politikës shqiptare dhe kanë kaluar shumë beteja së bashku.

Ata janë njohur në fillim të viteve 90- 91 dhe së bashku nisën rrugëtimin në radhët e FRESSH, organizata rinore partnere e PS- së. Diku rreth vitit 1993, ata u afruan më shumë me njëri- tjetrin, duke krijuar një marrëdhënie dashurie e cila në vitin 1998, do të kurorëzohej në martesë zyrtare në Bashkinë e Tiranës, me dëshmitar Erion Braçen dhe ambasadorin zviceran të kohës.

Ata krijuan një familje, paralelisht me karrierën e tyre politike, të cilën e zhvilluan në radhët e PS- së, deri diku rreth prillit 2004 kur Ilir Meta inicioi LSI- në sot, Partia e Lirisë. Sot kanë tre fëmijë, Bora, Besari dhe Era. 

Meta ka patur pozicione shumë të rëndësishme si askush tjeter, si kryeministër, zv,kryeministër, kryetar parlamenti, ministër I jashtëm, ministër ekonomie duke arritur deri në president i Republikës, ndërsa Monika Kryemadhi, ka qenë thuajse rregullisht, deputete.

Vlen për t’u theksuar fakti që Kryemadhi refuzoi statusin e Zonjës së Parë, duke ia kaluar vajzës së saj për 5 vitet kur Meta ishte president.

“De facto”, ajo ishte kryetare e LSI- së përgjatë 5 viteve të presidencës së bashkëshortit, për t’i hapur krahun sërish atij në vitin 2021, pasi mbylli mandatin presidencial.

Hetimi në SPAK

Kohët e fundit, të dy këto personazhe po hetohen nga Prokuroria e Posaçme SPAK.

Janë marrë në pyetje nga prokurorët e SPAK, madje Kryemadhit i kanë sekuestruar edhe telefonat.

Të pyetur nga mediat, pas daljeve nga dyert e prokurorisë, Meta nuk I ka kursyer tonet e ashpra ndaj drejtuesit Altin Dumani, ndërsa Kryemadhi I ka përqëndruar sulmet në drejtim të kryebashkiakut të Tiranës, Erion Veliaj.  

"Vazhdoj t’i qëndroj çdo deklarate time të lidhur me reformën në drejtësi. Nuk e sfidoj as sistemin e drejtësisë, as sistemin ku ne jetojmë dhe punojmë, pavarësisht problematikave që kemi,. Nëse do sfidoja nuk do isha nga deputete e pakta që ka dorëzuar në SPAK 6 padi për inceneratorin apo ndërtimit pa leje të inerteve në lidhje me inceneratorin. Të gjithë kemi ndasitë dhe qëndrimet tona. Lufta ime është betejë politike, as me prokurorët. Ata do bëjnë punë e tyre, unë jam një e paditur nga Veliaj. Ndaheni me Ilir Metën për sulmet ndaj SPAK? Ndahemi", tha Kryemadhi disa ditë më parë pas 5 orësh në SPAK.

Mbrëmjen e djeshme, gjatë emisionit “Çim Peka live” në Syri.Tv, ish presidenti Meta, tha se Kryemadhi "është tanimë ish bashkëshortja", dhe se vendimin ai ia kishte komunikuar djalit të tyre Besar Meta, 24 vjeçar, i cili sipas tij, disa herë i kishte kërkuar që të dy prindërit të gjenin “një zgjidhje të qetë, përsa kohë keni shumë tensione dhe probleme. Mendoj se kam gjetur një zgjidhje shumë të qetë”.

Teksa brenda mbledhjes së kryesisë tha se vendimin për divorc e mori për shkaqe politike, në një intervistë për Report Tv kreu i Partisë së Lirisë Ilir Meta pranoi se vendimi për t’u ndarë edhe ligjërisht nga Monika Kryemadhi është diktuar nga beteja në SPAK. Meta thotë se vendimin për t’u divorcuar e mori pas deklaratave të Kryemadhit në Prokurorinë e Posaçme ndërsa shton se nuk ka asnjë pretendim pasuror

Nga ana tjetër, Kryemadhi i tha Zërit të Amerikës se nuk preferonte për momentin të komentonte vendimin e bashkëshortit të saj dhe se më parë donte të mësonte arsyet që e kishin çuar zotin Meta në kërkesën për divorc, të depozituar të enjten në Gjykatën e Tiranës.

Krisja e marrëdhënieve në PL

Tronditja e marrëdhënieve mes tyre u shpërfaq dhe publikisht, kur riformatimi i strukturave drejtuese të Partisë së Lirisë, la jashtë tyre Kryemadhi.

Disa javë më parë, të dy shkëmbyen dhe polemika gjatë mbledhjeve të forumeve drejtuese të Partisë.

Ndërsa evidentoi një “grup armiqësor” në radhët e LSI- PL- së, duket se Meta ka përfshirë në të edhe bashkëshorten por që duhet ta largojë në emër të nepotizmit nga postet drejtuese të partisë së tij.

Ata u përplasën në konventën e partisë kur Kryemadhi u shfaq me bluzën ‘Ja ku jam’.

Për raportin bashkëshortor me Ilir Metën, përtej ndarjes politike, Kryemadhi ka folur edhe në emisionin Opinion. Përgjigjja e Kryemadhit ishte tronditëse pasi tha se ky raport është i ngrirë.

“Raporti im bashkëshortor me Metën është një raport për momentin i ngrirë për shkak të konfliktit në parti se sigurisht që brenda familjes tonë, familjes së vogël, ka ndërhyrë njerëz të cilët mendojnë që duke shkatërruar pozicionimet apo lidhjet familjare do të kenë karrierë politike. Mendoj që nuk është hera e parë që unë dhe Ilir Meta kemi këto konflikte. Ne nuk kemi këto konflikte parimore, morale midis njëri-tjetrit. Konfliktet tona janë vetëm konflikte politike.

Patjetër që reflektohen në jetën private sepse në qoftë se ne jemi dy njerëz të cilët punojmë nga mëngjesi deri në darkë në politikë, sigurisht që marrëdhënia është e përditshme edhe në familje. Ajo që mua më bën përshtypje dhe që e them gjithmonë, është që njeriu sa të rrojë do të mësojë.

Mendjelehtësia më e madhe si te burrat, edhe te gratë qëndron kur mendojnë që lumturinë e tyre dhe pushtetin e tyre mund ta ndërtojnë duke rrënuar lumturinë dhe familjen e dikujt tjetër, por kjo nuk ndodh. Pse nuk ndodh? Nuk ndodh sepse marrëdhënia morale është shumë më e rëndësishme se marrëdhënia financiare”, deklaroi Kryemadhi.

Prej disa muajsh sipas VOA Meta nuk jeton më as në shtëpinë e familjes. Edhe në kërkesën për divorc, ai ka paraqitur si adresë personale, atë të Partisë së Lirisë.