Nga vijnë fondet për ekspozitat private të kryeministrit Rama, a po e përdor pushtetin për shitjen e pikturave?

“Improvizim” është quajtur ekspozita e pikturave dhe skulpturave mikse që kryeministri Edi Rama ka çelur pak ditë më parë me punimet e tij në “Zapion Megaro” në Athinë.

Në ekspozitë u paraqitën 33 punime të krijuara prej vitit 2015 dhe 15 punime të tjera janë të vitit të fundit, ku bien në sy ngjyrat e gjalla, format abstrakte, punimet prej qeramike, pikturat murale, ndërsa disa nga punimet janë krijuar mbi fleta dokumentesh pune.

Të pranishëm në hapjen e ekspozitës në kryeqytetin grek ishin edhe kryeministri grek Kyriakos Mitsotakis dhe ministri i Jashtëm grek Nikos Dendias.

Ekspozitat në botë

Kjo nuk është ekspozita e parë që hapet me krijimet e Ramës.

Kreu i qeverisë, që pas 2013-ës kur erdhi në pushtet ka ndërtuar paralelisht edhe një karrierë artistike, shpesh të bazuara në lidhjet e tij politike.

Ai ka hapur ekspozita në Fierence të  Italisë, Mynih e Berlin të Gjermanisë, Stamboll të Turqisë, Hong Kong të Kinës deri në New York.

Së fundmi, pas skandalit McGonigal në media u publikuan fakte se si në vitin 2015 u sposorizua një ekspozitë e Ramës në Kinë.

Ndër sponsorët gjeneralë, kryesonte CEFC, konglomerati kinez i energjisë. Pranë kësaj kompanie u punësua Dorian Duçka i cili rezulton në akt akuzën e FBI si personi B, që bashkë me Agron Nezën dhanë informacione për nisjen e hetimit për lobimin e PD përmes Nick Muzin.  

Të ardhurat

Gjatë kohës kur ishte në opozitë, bie në sy që Edi Rama nuk ka deklaruar para për shitjen e pikturave. Ai ka deklaruar vetëm të ardhura nga shitja e librit ‘Kurban’. Dy vjet pasi erdhi në pushtet, Rama nisur të deklarojë shuma monetare nga shitja e krijimeve të tij.

Në vitin 2015, Rama deklaron 2 694 009 të ardhura nga puna artistike dhe libri ‘Kurban’. Në vitin 2016, Rama deklaron krijimtari 1 285 665 lekë të ardhura nga puna artistike. Kulmin e arrin në vitin 2017, kur deklaron 3 894 352 lekë nga shitja e piktura.

Ky fakt ngre dyshime se Rama ka përdorur pushtetin e tij dhe pasurinë e shqiptarëve, për të shitur pikurat dhe për të hapur ekspozita nëpër Evropë e më gjerë.