Olsi Rama, “topi i ping-pongut” mes Bardhit dhe kryeministrit. Refuzimi i interperlancës, shkelje e nenit 80

Grupi i drogës "Xibraka", epiqendra e lajmeve ditëve të fundit,  u zbulua në janar të vitit 2015, gjatë një operacioni të policisë të asistuar nga agjentë të policisë gjermane, ku u sekuestrua sasia rekord e kokainës prej 100 kg.

Droga u gjet në një magazinë në fshatin Xibrakë 10 km larg qytetit të Elbasanit. Tetë persona u arrestuan brenda dhe pranë magazinës së drogës, mes tyre Sajmir Batku, nipi ish-diktatorit Enver Hoxha, Ermal Hoxha dhe dy shtetas kolumbianë. Në kërkim u shpall Genci Xhixha, i cili njihet si kreu i një rrjeti të fuqishëm të trafikut të kokainës në Europë dhe më gjerë.

Për të bërë të mundur nxjerrjen e kokainës ishin marrë dy kolumbianë që kishin njohuri për procesin e nxjerrjes së drogës së shkrirë.

 Hetimet nisën pas informacionit të përcjellë nga autoritetet gjermane që në datën 17.12.2014, për trafik kokainë nga Shqipëria drejt Gjermanisë.

Por pas kaq shumë vitesh, ku anëtarët e kësaj bande janë marrë me gjykata dhe gjyqe ku kanë kërkuar ulje dënimi etj, kreu i Grupit Parlamentar të Partisë Demokratikë, Gazment Bardhi, ka “shkundur” pluhurin nga kjo dosje teksa ka publikuar disa dokumenta të cilat kanë prishur qetësinë e Olsi Ramës dhe vëllait të tij, kryeministrit të Shqipërisë, Edi Ramës.

Kreu i Grupit të PD-së, Gazment Bardhi ka denoncuar Olsi Ramën, si të përfshirë në çështjen e organizatës kriminale të Xibrakës.  Bardhi ka publikuar disa dokumente të prokurorisë, ku përfshirja e Olsi Ramës sipas tij është lënë pa emër, por sipas tij është identifikuar makina që ai përdor.

“Nga të dhënat e sistemit TIMS rezulton gjithashtu se Olsi Rama, vëllai i kryeministrit dhe anëtarët kryesorë të grupit kriminal të Xibrakës, Genci Xhixha, Ermal Hoxha dhe Gentjan Gjonaj kanë përdorur disa herë, së bashku dhe veç e veç, automjetin me targa AA653DM.

Gjatë periudhës Prill – Dhjetor 2014, kur u planifikua dhe u zbatua plani për ngritjen e laboratorit të kokainës, automjeti me targa AA653DM është përdorur për hyrje-dalje nga Shqipëria nga Olsi Rama, Genci Xhixha (bosi i grupit kriminal), Ermal Hoxha (anëtar i grupit kriminal) dhe Gentian Gjonaj (anëtar i grupit kriminal). E ndërsa tre të tjerët janë identifikuar nga Policia, duke përshkruar edhe automjetet me të cilët kanë lëvizur gjatë takimit me grupin kriminal në bazën e tyre në Tiranë, 45 vjecari, përdorues i automjetit me targa AA653DM nuk është identifikuar me emër.

Pra, policia dhe prokuroria, i vendosin në dosje moshën fikse të personit, por jo emrin! “Pak kohë më parë, bëra të njohur faktin se disponoj prova që e lidhin Olsi Ramën, vëllanë e kryeministrit të Shqipërisë, me organizatën kriminale të trafikimit të drogës në Xibrakë, organizatë kjo e zbuluar 10 vite më parë nga organet ligjzbatuese gjermane.”

 

PJESE NGA DOSJA E PUBLIKUAR NGA BARDHI

 

Ndërkaq ditën e djeshme (2 prill) Olsi Rama, ka kallëzuar penalisht Bardhin, lidhur me akuzat për përfshirje të tij në njohje dhe favorizim të një grupi kriminal.

Në kallëzimin e tij Olsi Rama thotë se shpifja është bërë për një fabrikim pervers me qëllim manipulimin e opinionin publik, për motive të dobëta politike.

Në padi theksohet se faktet e paraqitura nga zoti Bardhi, sipas Olsi Ramës janë të pavërteta dhe janë publikuar me qëllim nga kreu i grupit të PD.

“Sot kam depozituar në SPAK kallëzimin për deputetin e paturpshëm Gazmend Bardhi, i cili ka cenuar publikisht nderin dhe dinjitetin tim publik, si individ, prind dhe drejtues i një klubi të mirënjohur futbolli, duke shpikur një lidhje totalisht inekzistente mes meje dhe një grupi trafikantësh të drogës.

Troç fjala këtu s’mund të ketë dy të vërteta dhe ose unë duhet të shkoj në burg si trafikant ose Gazmend Bardhi duhet të ndiqet penalisht dhe dënohet si fabrikues provash në dëmin tim, të fëmijëve të mi, të klubit të futbollit “Partizani”, të miqve të mi dhe të njohurve të mi.”

Kurse kreu i grupit parlamentar të PD, Gazment Bardhi kërkoi interpelancë urgjente me kryeministrin Rama, pas fakteve të publikuara nga demokrati që implikojnë vëllain e kryeministrit në dosjen ‘Xibraka’.

 “Kushtetuta dhe rregullorja të detyron të përfshijë në rendin e ditës interpelancën me Kryeministrin. Sot jam njoftuar publikisht nga Kryeministri, për refuzimin e interpelancës. E keni shndërruar Republikën parlamentare në Republikë kryeministrie. Nuk ka tager ligjor dhe kushtetues që kryeministri të vendosë arsyet dhe temat e thirrjes në interpelancë ashtu siç nuk ka tagër te refuzoje. Kjo është shkelje e hapur kushtetuese”, tha Bardhi.

Përgjigjes së Nikollës e cila tha se “interpelanca nuk parashikon çështje personale”, Bardhi tha se çështja e ngritur nuk ka lidhje me marrëdhënien e Ramës me të vëllain.

Kuvendi i refuzoi Bardhit kërkesën për interpelancë me Ramën dhe ky i fundit, përmes një reagimi në platformën ‘X’, shkruan se kërkesa e Bardhit nuk përkon me qëndrimet dhe veprimtarinë e Këshillit të Ministrave.

Rama thotë se Bardhi duhet të presë SPAK-un që të zbardhë të vërtetën.

"Rregullorja e Kuvendit thotë shprehimisht se, citoj, “interpelanca është kërkesa me shkrim, që i drejtohet kryeministrit, zv.kryeministrit ose çdo anëtari tjetër të kabinetit qeveritar mbi motivet, synimet, qendrimet e Këshillit të Ministrave, lidhur me aspekte te rëndësishme te veprimtarisë se tyre”.

Duke vënë re se akuzat, fabrikimet, fantazitë e një deputeti apo grupi deputetësh, lidhur me familjarët e kryeministrit, zv.kryeministrit ose të çdo anëtari tjetër të kabinetit qeveritar, nuk kanë asnjë lidhje me motivet, synimet, qendrimet e Këshillit të Ministrave, kërkesa për interpelancë  nga deputeti Gazmend B më gjen në pamundësinë e plotë për ta përmbushur.”

 

Sipas Bardhit, prokuroria dhe gjykata shqiptare kanë pranuar se personat e dënuar nuk janë të vetmit persona që kanë qenë të përfshirë në këtë veprimtari kriminale, por një hetim për personat e paidentifikuar është mbyllur më tej.

Në mars të vitit 2016, Prokuroria e Krimeve të Rënda e ka ndarë më vete procedimin për bashkëpunëtorët e paidentifikuar, dosje e cila është pezulluar më pas. 

Ndërkohë në Kushtetutën e Shqipërisë, thuhet se kryeministri dhe çdo anëtar tjetër i Këshillit të Ministrave është i detyruar që tu përgjigjet interperlancave.

Kështu sipas nenit 80 të Kushtetues së Shqipërisë, Rama është i detyruar që t'i përgjigjet kërkesës së Bardhit për interperlancë dhe çdo rast refuzimi të kësaj kërkesë, përbën shkelje të Kushtetutës. /Punoi Neta Fero