Ç’paralajmëron deputeti i PD? A ka një pakt mes ‘të mëdhenjve’ të qeverisë dhe Zotos që të dënohet 2-3 vjet dhe të shpëtojë tjerët?

Deputeti Belind Këlliçi reagoi në emër të Partisë Demokratike pasi Gjykata e Posaçme pranoi kërkesën e ish-deputetit socialist, Alqi Bllako të arrestuar për aferën e inceneratorit të Fierit, për zbutje të masës së sigurisë, duke zëvendësuar masën “arrest në burg” me atë të “arrestit në shtëpi”.

Në një deklaratë për mediat, deputeti tha se lirimi i Bllakos lidhet me garancinë që ka dhënë se nuk do të fliste për t’i prishur punë partisë në pushtet, PS.

“Vetëm pasi ka dhënë garanci se nuk do të fliste dhe t’i prishte punë partisë dhe udhëheqësit”, thotë Këlliçi. Ai shton se “vetëm pasi kupola ka marrë vendimin për skemën e re që do të ndjekë dhe që përfshin vetëm një ‘kokë turku’, atë të Klodian Zotos”.

Por, çfarë paralajmëron Këlliçi me këtë skemë të re?

Burime të rezervuara i thane Politiko.al se ekziston mundësia se mes zyrtarëve të lartë në qeveri dhe pronarëve të inceneratorëve ka një pakt që vetë Zoto, njëri prej pronarëve të inceneratorëve, i cili ndodhet në arrati, të dënohet dy deri në tre vjet dhe të shpëtojë të tjerët.

Më konkretisht, plani parashikon që Zoto dënohet pak vjet dhe pavarësisht aferës me miliona euro, shumë shpejt merr garancinë për ‘biletën e lirisë’. Në këtë mënyrë, shpëton edhe të tjerët të përfshirë në aferë.

Të njëjtat burime thonë se e njëjta linjë po përdoret edhe me ish deputetin Bllako, i cili u lirua vetëm 6 muaj pasi u prangos me kërkesë të SPAK.

“Alqi Bllako është sinjali që kjo kupolë u dërgon bashkëpunëtorëve në krim, të cilët, edhe pse kanë marrë miliona, mund të konsiderohen “hajdutë të vegjël” e të padëmshëm”, thotë ndërkohë edhe deputeti demokrat.

“Kupola u thotë se dikush duhet të bëjë burg, dikush duhet ta marrë një goditje për partinë dhe udhëheqjen. Por, në fund, partia kujdeset për ty. Mund të ta kthejë “arrestin me burg” në “arrest shtëpie” ose, edhe po u dënove, mund të mos bësh me shumë se 2-3 vjet. 2-3 vjet për dhjetra miliona euro, ia vlen në fund të fundit. Ky është pakti, ky është kodi i Omertas së mafias në pushtet”, shton ai në deklaratën për mediat.

Alqi Bllako dhe ish-ministri i Mjedisit Lefter Koka (i dënuar me burg) dyshohet se kanë falsifikuar dokumentin për llojin e tokës ku do të ndërtohej inceneratori i Fierit.

Ata ia kanë paraqitur qeverisë sikur ndërtesa e inceneratorit do të bëhej në tokë truall.

SPAK ka provuar se ajo është ndërtuar në tokë arë, vlera e së cilës është më e lirë. Ky falsifikim i ka sjellë buxhetit të shtetit një dëm prej rreth 140 mijë eurosh.