Po shkon numri i të vrarëve më lart se temperaturat...

Muaji aktual (korriku), është muaji më i nxehtë i 2024 për momentin. Temperaturat kanë shkuar mbi 40 gradë celsius, gjë që ka sjellë jo pak vështirësi në jetën e cilitdo qytetarë.

Mirëpo po në këtë muaj, pa u dashur të 'shfletosh" muajt e tjerë, temperaturat po hasin një konkurrencë tepër të fortë, vrasjet\plagosjet.

Rritja e temperaturave, "çalimi" i drejtësisë apo shprehja e famshme " hëngshit kokat tuaja" mund të jetë shkaku?

Sipas një sondazhit të zhvilluar nga Instituti Agenda, që ka marrë në analizë shifrat e fataliteteve nga krimet apo aksidentet rrugore, viti 2024 është më i sigurti për jetën e qytetarëve shqiptarë në dekadën e fundit.

Kështu, në 6 muajt e parë të 2024, nga krimet humbën jetën 18 persona, ndërsa nga aksidentet 74, pra në total 92 viktima.

Krahasuar me të njëjtën periudhë të vitit 2023, kjo shifër ka pësuar një ulje të ndjeshme, me 17 viktima më pak.

Regjistrimi i këtyre shifrave përgjatë këtij viti, duket se reflektohet dhe në perceptimin qytetar. 76.5% e të anketuarve nga ky sondazh mendojnë se kriminaliteti është më i ulët ose shumë më i ulët në zonat ku banojnë.

Sondazhi i zhvilluar nga Instituti Agenda ka qenë elektronik dhe është zhvilluar në datat 1-2 Qershor të këtij viti, ku pjesë e tij kanë qenë rreth 2000 qytetarë.

Por si rritet siguria, kur ti je duke punuar, për të nxjerrë në fund të ditës ushqim për familjen, për të mundësuar shkollën, për të mundësuar një çati mbi krye, dhe papritur të vrasin në krye të detyrës, vetëm dhe vetëm se ti ishe duke bërë punën tënde ndërkohë që 'kris' arma papritur e pamenduar?

 

Korriku, 'përvëlohet' nga i nxehti dhe nga plagosjet/humbjet e jetës

 

25 Korrik/ Qëllon me armë 32- vjeçarin pas sherrit për borxhin e pashlyer

Një 36- vjeçar, Edmir Demiraj, është vënë në pranga nga policia, pasi qëlloi me armë zjarri, pas një sherri 32- vjeçarin, Jetmir Moriqi.

Sipas policisë, 36- vjeçari dyshohet se ka qëlluar me armë zjarri në drejtim të shtetasit Jetmir Moriqi, gjatë konfliktit ndërmjet tyre, për një borxh të pashlyer. 

25 Korrik/ Plagosje me thikë në fshatin Lapardha 2 në Berat, 40-vjeçari përfundon në spital!

Një plagosje me thikë ka ndodhur në fshatin "Lapardha 2" në Berat në një lokal të fshatit, ku dy shtetas janë konfliktuar mes tyre për motive banale.

Pasi kanë konsumuar alkool në lokal, ata janë konfliktuar brenda ambienteve të lokalit, fillimisht me fjalë dhe më pas konflikti ka degjeneruar jashtë ambienteve të lokalit në grushte e shkelma, derisa 42-vjeçari Elton Cani e ka qëlluar me mjet prerës (thikë) 40-vjeçarin Leonard Duka.

I plagosuri është transportuar me ambulancë drejt Spitalit Rajonal Berat, ku pasi ka marrë mjekim, ndodhet jashtë rrezikut për jetën.

24 Korrik / Babai plagos të birin me armë gjahu

Një 83-vjeçar ka plagosur me armë gjahu djalin e tij në fshatin  Stropckë të Pogradecit. Sipas njoftimit të policisë 47-vjeçari në gjendje të dehur ka dhunuar babanë e tij.

Pas këtij konflikti i moshuari ka marrë armën e gjahut dhe ka plagosur djalin. I plagosuri u nis me helikopter drejt Tiranës për shkak të gjendjes së rënduar shëndetësore.

Uniformat blu kanë shoqëruar në Komisariat burrin, ndërkohë është sekuestruar arma e gjahut në cilësinë e provës materiale.

23 Korrik / Elezaj me armë pa leje në restorantin e VIP-ave, plagos gjatë festës një vajzë e dy vëllezërit e saj!

Djali i biznesmenit të njohur të ujit Lajthiza, Edison Elezaj 32 vjeç në një festë pas mesnate në një restorant vipash, ka qëlluar me armën që mbante pa leje, dukë lënë të plagosur 3 të rinj, anëtarë të një familje, një vajzë 36 vjeç binjake me vëllain dhe më i vogli mes tyre, 34 vjeç, të cilët u paraqitën rreth orës 01:35 në një spital privat në Tiranë me dëmtime. Vëllezërit kanë lënë spitalin pasi kanë marrë mjekim, ndërsa vajza 36-vjecare – thotë policia – është ende nën kujdesin e mjekëve, por jashtë rrezikut për jetën.

Fillimisht policia thotë se shkrepja e armës ishte aksidentale, por më tej njoftoi se 32-vjeçari akuzohet për plagosje të rëndë me dashje. 2 miq të rij që fshehën armën pas ngjarjes, u arrestuan.

 “Rreth orës 01:30 të mëngjesit të sotëm, ata kanë qenë duke festuar së bashku me persona të tjerë nga rrethi i tyre shoqëror dhe familjar, në një lokal në Rrugën e Kavajës”, thotë policia.

Rrethanat e ngjarjes mbeten të paqarta, por policia tha në një njoftim paraprak se 32-vjeçari “dyshohet se aksidentalisht bëri një shkrepje të pavullnetshme”.

Më tej, në një njoftim të dytë zyrtar, blutë e Tiranës rënduan situatën dhe thanë se e shpallën në kërkim 32-vjeçarin për veprën penale, “plagosje e rëndë me dashje”

Versioni I/ Njoftimi i policisë i orës 09:00

Tiranë/Informacion paraprak

Më datë 23.07.2024, rreth orës 01:35, janë paraqitur në një spital privat, për ndihmë mjekësore, shtetasit E. P., 36 vjeçe, A. P., 36 vjeç, dhe D. P., 34 vjeç, me dëmtime të shkaktuara dyshohet nga armë zjarri.

Këta shtetas, rreth orës 01:30 të mëngjesit të sotëm, kanë qenë duke festuar së bashku me persona të tjerë nga rrethi i tyre shoqëror dhe familjar, në një lokal në Rrugën e Kavajës.

Nga tërësia e veprimeve hetimore paraprake është bërë i mundur identifikimi i autorit të dyshuar, shtetasit E. E., 32 vjeç, banues në Tiranë. Ky shtetas dyshohet se aksidentalisht, me një armë zjarri të cilën e mbante pa leje, ka bërë një shkrepje të pavullnetshme, dhe si pasojë e saj janë dëmtuar shtetasit e mësipërm.

Shtetasit D. P., dhe A. P., pas marrjes  së ndihmës mjekësore janë larguar për në banesë, ndërsa shtetasja E. P., ndodhet në spital, nën kujdesin e mjekëve, jashtë rrezikut për jetën.

Grupi hetimor, nën drejtimin e Prokurorisë, po vijon punën për dokumentimin e plotë ligjor të këtij rasti dhe kapjen e shtetasit E. E.

Versioni II /Njoftimi i policisë ora 14:27

Në vijim të informacionit paraprak të dhënë mëngjesin e sotëm, ju informojmë se:

Në vijim të veprimeve të shpejta hetimore, nga  Sektori për Hetimin e Krimeve të Rënda në DVP Tiranë, është bërë i mundur dokumentimi i plotë i autorësisë së ngjarjes, dhe si rezultat:

- u shpall në kërkim shtetasi E. E., 32 vjeç, për veprën penale "Plagosja e rëndë me dashje", parashikuar nga neni 88/2 i Kodit Penal;

- u arrestuan shtetasit A. D., 38 vjeç, dhe D. Z., 35 vjeç, të dy banues në Tiranë, për veprën penale "Veprime që pengojnë zbulimin e së vërtetës", kryer në bashkëpunim, parashikuar nga neni 301/25 i Kodit Penal.

Gjithashtu, gjatë kryerjes së veprimeve procedurale, si dhe këqyrjes së kamerave të sigurisë, është bërë e mundur gjetja e armës së zjarrit pistoletë TT, e cila dyshohet se është përdorur gjatë ngjarjes.

Pas kryerjes së krimit nga shtetasi E. E., dy të arrestuarit, i kanë marrë armën e zjarrit dhe më pas e kanë fshehur atë, me qëllim pengimin e zbulimit të veprës penale dhe të autorit të saj.

Materialet i kaluan Prokurorisë.

21 Korrik / Kishin dinamit në kroskot, plagosen dy vëllezër

Një makinë tip Ford Focus ka shpërthyer teksa ishte në lëvizje për pasojë janë plagosur rëndë dy vëllezër, Algert dhe Eraldi Mina të cilët ndodheshin në mjet.

Ngjarja e rëndë është regjistruar rreth orës 17:20 në lagjen "Xhile Liçi", në unazën e Gramshit. Shpërthimi ishte shkaktuar prej dinamitit që vëllezërit e mbanin brenda në makinë, dyshohet për të gjuajtur peshk.

Edhe policia përmes një njoftimi të shpërndarë më vonë konfirmoi këtë tezë duke hedhur poshtë dyshimet e para se kishim të bënim ngjarje kriminale, lëndë tritoli të vendosur në makinën e vëllezërve për ti eliminuar ata.

"Në përfundim të veprimeve të para, rezultoi se nuk ka pasur shpërthim nga jashtë të automjetit (pra nuk kemi të bëjmë me lëndë eksplozive) por dyshohet se drejtuesi i automjetit ka pasur në kroskotin e automjetit lëndë plasëse të dyshuar Amonit Malor, me fuqi të ulët veprimi, lëndë e cila dyshohet se ka shpërthyer për shkak të nxehtësisë" thuhet në njoftimin e mëvonshëm të policisë së Elbasanit.

Në momentin e shpërthimit të makinës me targa "AB 713JT" në timon ka qenë Algerti, ndërsa Eraldi ka qenë pasagjer. Ky i fundit ka marrë edhe plagët më të rënda, pasi ka qenë më afër kroskotit dhe dëmtimet më të mëdha i ka në gjymtyrë.

Shpërthimi ka qenë aq i fuqishëm sa dëmtoi edhe xhamat e banesave përreth por dhe makinave që ndodheshin të parkuara aty.

Pasi morën mjekimin e parë në spitalin e Elbasanit, të dy vëllezërit u transportuan me urgjencë në spitalin e Traumës në Tiranë.

21 Korrik/ Tre të vrarë dhe një i plagosur në Memaliaj

Tre të vrarë dhe një i plagosur është bilanci i një atentati të ndodhur mbrëmjen e 20 korrikut 2024 që tronditi qytetin e Memaliajt. Ngjarja është shënuar rreth orës 23:20 në një lokal në lagjen nr.3, para godinës së Bashkisë Memaliaj.

Shënjestër e atentatit ka qenë Shyqyri Kalemi, babai i Andrea Kalemit, i cili nuk i mbijetoi dot 6 plumbave të kallashit që iu derdhën në turp.

Po ashtu, kanë humbur jetën kamerieri 36-vjeçar, Gledio Muka dhe klienti 47-vjeçar, Marsel Çela, dy viktima të pafajshme të cilët kanë qenë në lokal në momentin e ngjarjes.

I plagosur ka mbetur edhe Artur Kalemi, xhaxhai i Andrea Kalemit. Ai ka qenë i ulur në një tavolinë jashtë bashkë me të vëllanë Shyqyri (Shyqo) Kalemi, kur ndaj tyre është qëlluar me breshëri kallashnikovi.

Artur Kalemi, 57 vjeç, ndodhet në reanimacion në Spitalin e Gjirokastrës dhe ka marrë dy plagë, një në kofshë dhe një në kraharor.

Autorët, që dyshohet se kanë qenë të paktën 3 persona, kanë ardhur me makinë të zezë nga qyteti i Memaliajt në drejtim të lokalit. Një prej tyre ka zbritur nga mjeti dhe ka qëlluar me breshëri në drejtim të 74-vjeçarit Shyqri Kalemi, i cili ishte ulur në një tavolinë jashtë lokalit. Plumbat kapën dhe vëllanë e tij, si edhe kamerierin që ishte pranë tavolinës. Ndërkohë, klienti që mbeti vdekur ka qenë brenda në lokal.

Hakmarrja ndaj Kalemit pistë hetimi

74-vjeçari është babai i Andrea (Adriatik) Kalemit. Emri i tij përmendet që me vrasjen e dy vëllezërve Mevlan e Adriatik Çaça në Belgjikë 13 prill 2001 deri tek ajo e biznesmenit sarandiot Edmond Papa në Tiranë në dhjetor 2022.

Pista kryesore në të cilën po heton policia është ajo e hakmarrjes, pas një zinxhiri vrasjesh mes dy fiseve që luftën e nisën shumë herët, për trafikut e kanabisit nga jugu i Shqipërisë drejt Greqisë. Besohet se autorët janë informuar nga persona të tjerë se Shyqyri Kalemi, bashkë me të vëllanë po qëndronin në ambientet e jashtme të lokalit, pranë bashkisë Memaliaj. Nga mënyra e ekzekutimit, vrasja dyshohet se është kryer me pagesë.

Dyshohet se vrasja ka lidhje me sagën e vrasjeve të nisura në 2022, me eliminimin me eksploziv të Aleksandër Sadikajt, i cili ishte kushëriri i Kalemit, dhe disa muaj më vonë, në Tiranë të biznesmenit Edmond Papa.

20 Korrik/ Skandali me mikrokreditë, vetëvritet Olsi Ibro

Olsi Ibro, bashkëshorti i pronares së Micro Credit Albania, një nga shoqëritë e mikrokrediteve të hetuara nga prokuroria e Tiranës për skemën mashtruese me qëllim vjedhjen dhe zhvatjen e qytetarëve, i ka dhënë fund jetës mëngjesin e (20 korrik 2024) duke u vetëhedhur nga një pallat në ndërtim në rrugën 'Ramaza Shijaku' në Tiranë.

Mësohet se Ibro është hedhur nga tarraca e pallatit dhe trupi i tij i pajetë është gjetur mëngjesin e sotëm nga roja kur ka ardhur në punë.

Në vendin e ngjarjes hetuesit kanë gjetur disa kokrra fostoksinë, çka dyshohet se mund të ketë pirë dhe para hedhjes nga tarraca. Por, nëse ka gëlltitur apo jo do e përcaktoj ekspertiza në Institutin e Mjekësisë Ligjore.

19 Korrik/ U dhunua brutalisht nga bashkëjetuesi i vajzës me të cilën fliste në Instagram, ndërron jetë në spital 42 vjeçari nga Bilishti

Rigels Kaso 42 vjeçari nga Bilishti që u gjet në Bulevardin e Kasharit, i dhunuar me sende të forta, ka ndërruar jetë në spital pasi qëndroi për disa ditë në koma.

Kaso u dhunua me 15 korrik, pasi fliste me një vajzë në Instagram, por në të vërtetë pas saj qëndronte i dashuri.

Ky i fundit e dhunoi Kason në Kashar. Më vonë 42 vjeçari u gjet nga kalimtarë i shtrirë dhe pa ndjenja. 

Kaso u dhunua nga 34 vjeçari Bajram Gjeleshi, pasi komunikonte në instagram me bashkëjetuesen e Gjeleshit.

34 vjeçari zbuloi mesazhet në instagram dhe shkoi në vendtakimin që Kaso kishte lënë me bashkëjetuesen e tij.

Në rrugën Sokrat Miho ku pritej të ndodhte takimi u shfaq Gjeleshi që dhunoi Kason, i cili morë dëmtime të rënda në kokë.

16 korrik/ U përplas me motor, vdes në moshën 27-vjeçare Ildi Pajtoni

Amarildo Pajtoni, i njohur si Ildi Pajtoni, ka ndërruar jetë si pasojë e një aksidenti tragjik. 27-vjeçari ndodhej prej disa ditësh në koma, si pasojë e një aksidenti me motor. Lajmi për ndarjen e tij nga jeta është konfirmuar nga familjarët e tij. Prej afro dy javësh 27-vjeçari ndodhej i shtruar në spitalin e Traumës në Tiranë, por fatkeqësisht nuk ka mundur që t’i shpëtojë dot plagëve të marra.

Lidhur me ngjarjen e ndarjes së tij nga jeta, edhe Policia e Kavajës ka dalë me një njoftim zyrtar, ku bën me dije se shoferi i kamionit me të cilin u përplas i riu nuk ishte në ndikimin e alkoolit, por ndaj tij ka nisur një procedim për shkeljen e rregullave të qarkullimit rrugor.

"Në lidhje me aksidentin rrugor të ndodhur rreth orës 10:15, të datës 26.06.2024, në autostradën “Kavajë-Rrogozhinë”, ku motomjeti me drejtues shtetasin A. P., 27 vjeç, banues në Tiranë, ka goditur nga mbrapa automjetin me drejtues shtetasin kosovar J. S., 38 vjeç, dhe si pasojë mbeti i dëmtuar 27-vjeçari, i cili u transportua në Spitalin e Traumës, ju informojmë se: Në lidhje me këtë rast janë kryer të gjitha veprimet hetimore dhe procedurale, në drejtimin e Prokurorisë së Durrësit. Në përfundim të këtyre veprimeve, nisi procedimi në gjendje të lirë për shtetasin J. S., për veprën penale “Shkelja e rregullave të qarkullimit rrugor”. Nga kryerja e testit të alkoolit, 38-vjeçari rezultoi 0.00 mg/l. Dyshohet se për shkak të dëmtimeve nga ky aksident, ditën e djeshme, shtetasi A. P. ka humbur jetën në Spitalin e Traumës, Tiranë,"-bën me dije Policia./ PUNOI NETA FERO