Postimi provokues i Vuçiç me flamurin serb mbi Kosovë në 17 mars, çfarë ‘fshihet’ pas kësaj date

Presidenti i Serbisë Aleksandar Vuçiç ka postuar së fundmi në rrjetet sociale flamurin e Serbisë mbi hartën e Kosovës.

Kjo fotografi kontroverse ngjalli shumë debat në opinion publik në Kosovë dhe në rrjetet sociale ka filluar një fushatë për t'i bërë report postimit të presidentit serb.

Kjo foto e Vuçiç është publikuar në 17 mars, por çfarë përfaqëson në vetvete kjo datë?

Publikimi i kësaj fotoje vjen në kuadër të 17 vjetorit të trazirave të marsit 2004.

Trazirat filluan pasi dy fëmijë shqiptar në pjesën veriore të Mitrovicës u mbytën në Lumin Ibër. Disa fëmijë, që mbijetuan, në orët e vona po atë natë, treguan para kamerave se ata ishin ndjekur nga serbë dhe se kishin mundur të iknin, kur disa nga shokët e tyre u mbytën në lumë.

Të nesërmen (17 mars 2004) filluan protestat në shumë qytete të Kosovës, që shumë shpejt u përshkallëzuan në dhunë. Gjatë këtyre trazirave u dogjën disa shtëpi dhe kisha serbe, diçka e ngjashme ndodhi me shtëpitë shqiptare në pjesët me shumicë serbe.

Për pasojë, 19 persona, 12 prej tyre shqiptarë, humbën jetën gjatë këtyre trazirave.

Serbët mohuan se kishin shkaktuar mbytjen e fëmijëve, ndonëse ishin raportuar shumë herë kërcënime nga serbët ndaj shqiptarëve në pjesën veriore të Mitrovicës, që ka shumicë serbe.

UNMIK-u, për të mos ndezur situatën, nuk tregoi të vërtetën se çfarë kishte ndodhur, raportojnë mediat në Kosovë.

Kofi Annan, asokohe sekretar i përgjithshëm i Kombeve të Bashkuara, i dha detyrën norvegjezit Kai Eide për hartimin e një raporti, që do të pasqyronte situatën në Kosovë. Eide e mori këtë detyrë shumë seriozisht dhe pas shumë vizitave në Kosovë dhe Ballkan përgjithësisht, ku takoi përfaqësues të të gjitha partive, komuniteteve, feve etj., në tetor 2005 dorëzoi raportin e porositur.

Edhe pse Eide në këtë raport konkludonte se shumë gjëra janë përmirësuar në Kosovë nga viti 1999 dhe rekomandonte se koha ka ardhur për fillimin e bisedimeve për statusin përfundimtar të Kosovës.

Disa ditë më vonë, të njëjtin rekomandim për Këshillin e Sigurimit të OKB-së e bën edhe Kofi Annan. Kurse më 17 shkurt 2008, bazuar në këtë propozim, Kosova shpallet shtet i pavarur dhe sovran. Kushtetuta e Kosovës, që i jep asaj të gjitha kompetencat e shtetit, hyri në fuqi më 15 qershor 2008.