“Provokim qesharak, mendova si ishin meme”, si ndryshoi qasja e Edi Ramës ndaj vaksinave ruse  

Qeveria Shqiptare ka ndryshuar qasje ndaj vaksinave ruse dhe kineze. Sot (22 mars) Shqipëria ka marrë 10 mijë vaksina anti-COVID, Sputnik V. Sipas kryeministrit Edi Rama, vaksinat janë dhuratë nga Princi i Kurorës së Emirateve të Bashkuara, Muhammed Bin Zayed.  

Dy ndryshimet e fundit ligjore të miratuara nga Këshilli i Ministrave parashikuan heqjen e të gjitha barrierave proceduriale që u ngritën në fillim nën argumentin se shqiptarët duhet të marrin vetëm vaksina perëndimore e jo lindore.

Si ndryshoi qasja e qeverisë shqiptare ndaj vaksinave ruse?

Në 29 dhjetor të vitit që shkoi, kryeministri Edi Rama e ka quajtur ofertën e ambasadës ruse për vaksinën anti-COVID "Sputnik V" si një provokim qesharak dhe theksoi se fillimisht kishte menduar se reagimi ishte një meme.

“Kam menduar që ka qenë një meme, ajo që pashë që ambasada e Rusisë kishte postuar nga Tëitter Drejtorit të Komunikimit (Endri Fugës), retëeet të shefes së Komisionit Europian. Për një shtet serioz është krejtësisht e papërshtatshme që të bëjë provokime të tilla dhe kur them provokim nuk po i paraprij ndonjë demarshi pranë shtetit rus, sepse ky është provokim qesharak dhe nuk është mirë që një vend serioz si Rusia të bëhet qesharake përmes këtyre lloj postimeve dhe një ambasadë si ajo ruse, që është një ambasadë e rëndësishme të sillet sikur është një seksion i Portokallisë, apo një konkurrent i Portokallisë. Shpreh keqardhje për këtë sepse nuk shoh arsye që ambasada e Rusisë të përfshihet në prodhimin e memeve”, u shpreh Rama.

Një ditë më parë (në 28 dhjetor) ambasada ruse në Tiranë i bëri me dije qeverisë shqiptare se është e gatshme të negociojë për t’i garantuar Shqipërisë vaksinën kundër COVID-19.

Reagimi i ambasadës erdhi pas kritikave të Drejtorit të Komunikimit në Kryeministri, Endri Fuga, i cili dy ditë më herët shprehu rezerva për Komisionin Evropian se ka lënë pas dorë vendet e Ballkanit Perëndimor për sa i takon vaksinës anti-COVID. 

“Ju bëjmë me dije se Fondi Rus i Investimeve Direkte është autorizuar të zhvillojë negociata me vendet, të cilat janë të interesuara për të blerë vaksinat kundër COVID-19.

Nuk kemi dyshime se Rusia është e gatshme të sjellë vaksinën e saj "Sputnik-V" edhe në Shqipëri. Vaksinimi me "Sputnik-V" tashmë filloi në Rusi dhe në Argjentinë, ndërkohë më shumë se 50 vende kanë aplikuar për të blerë 1,2 miliard dozë të preparatit.

Në çdo rast, e përsërisim informacionin e postuar më parë për karakteristikat dhe avantazhet e saj në krahasime me një serë vaksinash të tjera”, thuhej në një njoftim të ambasadës ruse në Tiranë.

***

Këtë qasje Edi Rama e mbështetit nën argumentin se Shqipëria do të hapet ndaj vaksinave linore në të njëjtin moment kur ta bëj këtë hap Bashkimi europian, për t’i qëndruar deri në fund Brukselit.

“Nëse Bashkimi Europian do të hapet ndaj vaksinave kineze dhe vaksinave Ruse ne mënjeherë do të rishikojmë këtë qasje. Për sa kohë BE është i mbyllur ndaj këtyre dy opsioneve, ne jemi në të njëjtin pozicion me BE”, tha ai në fillim të marsit.

Po ashtu edhe gjatë vizitës së tij në Bruksel, ku ndodhej për të marrë pjesë në mbledhjen e Këshillit të Stabilizim Asocimit BE- Shqipëri, çështja e vaksinave, siç pohoi dhe vetë Kryeministri, kishte qenë një temë e diskutuar gjatë. Në konferencën e shtypit me Përfaqësuesin e Lartë të BE-së për politikën e Jashtme, Rama la të kuptohej qartë se po sheh dhe për mundësi të tjera vaksinash. "Edhe pse nuk qe zgjedhja jonë më e mirë, po shohim përtej burimeve tashmë të dëshirueshme të vaksinave”, deklaroi Rama.

7 mars, kryeministri Edi Rama la “dritaren e hapur” për vaksinat ruse dhe kineze , pasi sipas tij nuk është gjeopolitike mosmarrja e tyre.

“Deri dje kënga ime thoshte që çdo mund të ndodhë jeton në Tiranë, sot do të thosha që jetojmë ne Evropë. Evropa ka nisur të mendojë dhe disa vende si Gjermania, që është lokomotiva e saj, ka nisur të hapë dialogun me Kinën dhe Rusinë.

Duket e pabesueshme por e vërtetë. Është e paimagjinueshme që kontinentin më i pasur i planetit ndodhet në këtë situatë, ashtu siç duket e pabesueshme kur shpërthimi i pandemisë i kapi gafil të gjithë dhe gjunjëzoi të gjitha shtetet. Kështu është dhe me vaksinën. Duhet thënë që bota e zhvilluar ka thyer çdo rekord dhe parashikim për shpikjen e vaksinës për COVID-in. Sepse deri sot nuk është parë që një vaksinë të shpikej dhe prodhohej kaq shpejt.

Kjo i atribuohet zhvillimit të teknologjisë e shkencës. Sot janë katër kompani bashkë me atë të fundit amerikane, të shtojmë dhe kinezen dhe rusen bëhen 6. Nuk jam aspak i bindur që mund të ndodhë, por çdo gjë mund të ndodhë në këtë Evropë. Ka rëndësi të bëjmë atë që duhet për njerëzit. Ka shumë njerëz që kujtojnë se mosmarrja e vaksinave kineze dhe ruse nga ne është çështje gjeopolitike. Vaksinat nuk kanë dalë në treg, nuk ka, në ç’sens?

Janë shumë të vogla për nevojat e atyre që i kanë. Ku Evropa nuk ka vaksina sot të gjitha sasitë. Amerika nuk i ka stok vaksinat, prodhon vaksinon. Nuk është vaksina kineze që ka dalë në treg dhe ne s’po i blejmë. Për vaksinat do të lëmë çdo gjë tjetër, por nuk ka, nuk janë. Lufta që bëhet, është ajo të bëhet lufta për të marrë nga ata që kanë, që nuk i mjaftojnë atyre që i kanë”, tha Rama asokohe.