Pse u tërhoq Rama nga kërkesa ndaj SPAK për të vënë para drejtësisë Metën dhe Berishën

Kryeministri Edi Rama doli sot në një konferencë të posaçme, në krah me ministrin e Drejtësisë për të shpjeguar se thirrjet e njëpasnjëshme nga forumet më të larta të partisë që drejton SPAK-ut, nuk janë për t’i bërë presion kësaj strukture të pavarur.  

“E gjithë Shqipëria po pret ta shohë para drejtësisë Ilir Metën” u shpreh Rama të shtunën që kaloi në Asamblenë e PS.

Po ashtu Kryeministri qartëson se kërkesa për të nisur një hetim për ish-Kryeministrin Berisha nuk janë thirrje për t’i vendosur prangat, por për të zbardhur akuzat mbi të cilat DASH e shpalli non grata.

“Çfarë presioni është të kërkosh hetimin e një ish-Presidenti dhe një ish-Kryeministri të shpallur non grata nga SHBA me akuzat më të rënda të mundshme që lidhen drejtpërdrejtë me veprimtarinë e institucioneve të këtij vendi dhe ta bësh këtë, thuajse një vit pasi shpallja non grata është bërë dhe pasi sekretari amerikan i shtetit ka kërkuar publikisht në deklaratë se institucionet e këtij vendi duhet të bëjnë punën e tyre.

Dhe që të jemi shumë të qartë, unë nuk kam kërkuar dhe askush nuk ka kërkuar dënim, por hetim. Dënimin nuk e vendosim ne, por të hetohet një çështje që është gur në qafë për të gjithë Shqipërinë dhe nuk është çështje e një personi, është domosdoshmëri. Dhe që të hetohet deri në fund për një drejtësi të pavarur. Kjo drejtësi e pavarur duhet të çlirohet nga cdo kompleks i të kaluarës”, u shpreh Rama.

Mesazhi i Yuri Kim

“Reforma në drejtësi do të jetë e suksesshme kur të mos mendojmë se është e përshtatshme kur drejtuesit politikë në pushtet ose jo të thonë se drejtësia shërben se kur tjetri shkon në burg apo që drejtësia nuk jepet kur nga ana ime përfundon në burg”, ishte reagimi i para pak ditësh i ambasadores amerikane në Shqipëri lidhur me deklaratat e kryeministrit Rama, por ky i fundit ka patur një përgjigje për të.

“Unë jam shumë dakord me këtë, jam pikë për pikë dakord me këtë, thjesht adresa është gabim sepse nuk jam unë ky që them që këtu drejtësia po gabon sepse po vjen nga ana ime, unë po them të kundërtën se ashtu si po vjen në anën tonë, të shkon në çdo anë. Ne duam një drejtësi 360 gradë, nuk duam një drejtësi të pjesshme dhe të njëanshme.

Unë jam shumë dakord me ambasadoren amerikane. Flas për ndërhyrje, për presion, këtë nuk ma thotë mua dot askush në asnjë gjuhë, fare. Siç mua nuk më thotë dot askush që unë ndërhyj në punët e shtypit apo që këtu ka problem me shtypin, nuk i pranoj fare zero. Le ta shkruajnë, nuk më intereson fare, unë them timen, pastaj të tjerët le ta gjykojnë”, tha Rama.

Berisha i përgjigjet Ramës

Ish-kryeministri Sali Berisha i është përgjigjur po sot deklaratave të kryeministrit Edi Rama, ku kërkoi nga SPAK për të disatën herë hetimin e Berishës pas shpalljes ‘non-grata’ nga SHBA.

Në një konferencë për mediet, Berisha u shpreh se Rama po mundohet të tërheqë vëmendjen e shqiptarëve nga kriza përballë së cilës gjenden, duke sulmuar kundërshtarët e tij politikë dhe sistemin e drejtësisë.

"Prej disa javësh kreu i organizatës kriminale të inceneratorëve në një panik të jashtëzakonshëm merret me drejtësinë dhe kundërshtarët e tij politikë. Shkaqet janë madhore, Edi Rama beson se me këto qëndrime të cilat shëmbëllejnë apo janë të denja për Korenë e Veriut, apo regjimin e etërve të tij ka disa synime. Më së pari, të tërheqë vëmendjen e qytetarëve shqiptarë, të cilët po përballen me vështirësi shumë të mëdha në jetën e përditshme për shkak të kësaj qeverie, e cila me firmë e vulë vjedh vjedh e vetëm vjedh. Krijon vetëm mekanizma vjedhje. Dje unë po kontrolloja të dhënat, rezultonte se nga 2014 deri më sot, indeksi i cmimit të ushqimeve është rritur 100%. Unë ju jap një të dhënë, shumica e familjeve shqiptare, shpenzojnë mbi 50 % të të ardhurave vetëm për ushqime. Rritet cdo javë e cdo muaj në këtë vend, në një kohë kur kryeministri e ministrat e tij vijojnë të vjedhin e shpërdorojnë pronat publike", tha Berisha. 

Reagimi i Kryemadhit

Dy ditë më parë, Kryetarja e Lëvizjes Socialiste për Integrim Monika Kryemadhi komentoi deklaratat e kryeministrit Edi Rama i cili i kërkoi SPAK të hetojë presidentin Ilir Meta.

Në Report tv, Kryemadhi tha se i vjen për të qeshur nga ajo fjali e kreut të qeverisë. Ajo shtoi se nëse ka një politikan në Shqipëri që është përballur me drejtësinë gjithmonë, ai është Ilir Meta.

Po çfarë më tremb, më bën të qesh. Në qoftë se ka politikan në Shqipëri që është përballur me drejtësinë gjithmonë e kujtdo ka qenë drejtësia. Ilir Metës i është heq imuniteti në 1992, ja ka hequr Sali Berisha, pse doli në mbrojtje të punëtorëve të fabrikës së Poliçanit dhe shpëtoi policët të cilët populli i kishte marrë peng. Dhe e shiti Partia Socialiste sepse Fatos Nano mendonte që po të fusin Ilir Metën në burg nuk do të merren më me mua”, u shpreh Kryemadhi