‘Rama e ka tmerr’, çfarë është projektligji i parashkrimit që Berisha e kërkon me ngulm

Kreu i Partisë Demokratike, Sali Berisha insistoi sërish dhe sfidoi kryeministrin Edi Rama për ligjin e parashkrimit për; kryeministrin, zëvendëskryeministrin, ministrat dhe zyrtarë të lartë të shtetit.

Në mbledhjen me grupin e deputetëve, Berisha tha së fundmi se nuk mund të ketë parashkrim për kryeministrin dhe ministrat e qeverisë sepse sipas tij, “përdorin të gjitha manovrimet që krimet e tyre të kalojnë parashkrimin”.

“Ligji që kemi sjellë këtu ka një bazë solide kushtetuese po këtë e mban Linda e Parlamentit, ligji ka 6 muaj që pret në sirtarë dhe ne do ta denoncojmë me forcën më të madhe, nuk ka sjellë amendamentin e dorëzuar para 7 muajsh për heqjen e të drejtës së parashkrimit për kryeministrin, i them Edi Ramës bëhu burrë dhe ta bëjmë këtë nen ta firmosim, firmose ti ta firmos dhe unë po ta mban, por nëse nuk e firmos do të jetë neni i parë që do të firmoset me ardhjen e PD në pushtet, koha tregon se është jetike për të ndëshkuar hajdutëritë që u bëhen shqiptarëve nga kryeministri dhe ministrat dhe tij, nuk mund të ketë parashkrim për ta sepse përdorin të gjitha manovrimet që krimet e tyre të kalojnë parashkrimin, do të luftojmë që ky ligj të kalojë në parlament dhe ata që firmosin për plaçkitjen e qytetarëve duhet të ndiqen nga drejtësia gjer ditën e fundit të jetës së tyre pa asnjë lloj mbrojtje, janë krime të shëmtuara që mjerojnë qytetarët, parashkrimi është amnisti, nuk mund të ketë amnisti për qeveritarët.

Ai nuk firmos se ka tmerr, por ky nen do ta ndjekë mbrapa deri sa të votohet në parlament. Rezoluta për gjenocidin në Kosovë ka mbi 9 muaj në parlament,  e mbanë kryetarja Linda me urdhër të Edi Ramës, ky është një akt i pashembullt në histori, Edi Rama me këtë qëndrim dëshmon se është një vasal”, tha Berisha.

Por çfarë parashikon Kodi Penal?

Nuk mund të bëhen ndjekje penale kur nga kryerja e veprës deri në çastin e marrjes së personit si të pandehur kanë kaluar:

a) dyzet vjet në rastin e krimeve që parashikojnë dënim me burgim të përjetshëm;

b) njëzet vjet për krimet që parashikojnë dënim jo më të ulët se dhjetë vjet burgim ose dënim tjetër më të rëndë;

c) dhjetë vjet për krimet që parashikojnë dënim nga pesë gjer në dhjetë vjet burgim;

ç) pesë vjet për krimet që parashikojnë dënim gjer në pesë vjet burgim ose gjobë;

d) tre vjet për kundërvajtjet penale që parashikojnë dënim gjer në dy vjet burgim;

dh) dy vjet për kundërvajtjet penale që parashikojnë dënim me gjobë. Veprat penale të kreut II, seksionit I, nenet 76 - 79/c, nuk i nënshtrohen parashkrimit.

Projektligji për heqjen e parashkrimit për kryeministrat, zëvendës kryeministrat, ministrat, kryetarët e kuvendit dhe ish-funksionarëve u paraqit nga Berisha në tetor 2022. Sipas këtij projektligji parashikohet edhe për kohën ku ishte Berisha kryeministër që të hetohet.

E thënë me fjalë të thjeshta, nëse mazhoranca socialiste pranon të miratojë ligjin për heqjen e parashkrimit, as Rama, as ish-zëvendësit e tij, as ministrat nuk i shpëtojnë dot ndjekjes penale për aferat korruptive të 10 viteve të fundit që kanë të bëjnë kryesisht me konçensionet, tenderat abuzivë, aferave të tilla si inceneratorët etj.

Kështu, me ligjin në fuqi kur kalojnë 10 vite nga detyra nuk mund të hetohet personi që ka krye këto vepra penale, ndaj shumica e aferave të tyre korruptive mbeten të pa ndëshkuara.